Xitayning chektin ashqan karantin tedbirliri Uyghurlar hayatigha üsti-üstilep qiyinchiliq tughdurghan

Muxbirimiz shöhret hoshur
2022.08.11
Share on WhatsApp
Share on WhatsApp
Xitayning chektin ashqan karantin tedbirliri Uyghurlar hayatigha üsti-üstilep qiyinchiliq tughdurghan Qamalda qalghan bir a'ile kishiliri. Ürmchi, 2022-yili 5-ay
Social Media

Ashkarilinishiche, Uyghur rayonida karantin tedbirliri seweblik ahaliler ushtumtut  öylirige qamalghandin kéyin, Uyghurlarning eslidinla cheklik bolghan tirikchilik yolliri pütünley étilip qalghan. Kenttiki ahaliler eger öyidin  talagha chiqsa, az dégende 24 sa'et tutup turulidighanliqi heqqide agahlandurulghan. Bu weziyet ahalilerning déhqanchiliq ishlirini aqsatqandin bashqa yene kündilik risqini kündilik tépip yewatqan ushshaq tijaretchilerning  dukanliridiki méwe-chéwe we köktatlirining sésip kérektin chiqishini keltürüp chiqarghan.

Xitayning “Tengritagh tori” da Uyghur rayonining  xeterlik derijisi boyiche katégoriyelerge ayrilip karantin tüzümi yolgha qoyulghanliqi élan qilin'ghandin kéyin, biz bu tüzümning konkirét ijra'ati heqqide rayonning asasiy qatlamliridiki idare-organliridin melumat soriduq. Ghulja nahiyesining mazar yézisidiki bir amanliq mudiri, derwazilarning pichetlen'genliki we ishiklerge qulup sélin'ghanliqini ashkarilidi. U yene déhqanchiliq ishlirida jiddiy éhtiyaji bolghan ahalilerge nöwet bilen sirtqa chiqish ruxsiti bérilgenlikini eskertti. Emma tordiki déhqanchiliqqa a'it téxnika jehettiki melumatlarda, sughurush we yighish qatarliq pesil xaraktérlik meshghulatlarning nöwetlishish bilen bolmaydighanliqi, ahalilerning kolléktip heriketke kélishi kéreklikini eskertilgen.

Bu xadim, yoqurqi tedbirlerning ahalilerge élip kelgen awarichliqliri heqqide melumat bermidi. Emma ijtima'iy taratqulardiki uchurlardin kündilik risqini kündilik tapidighan ushshaq tijaretchiler we ishlemchilerning, bu karantinning éghir zerbisige uchrighanliqi melum. Tordiki sin körünüshlirining biride, bazar taqalghanliqtin sésighan méwe-chéwiler körsitilgen. Yene bir inkasta, bazarda köktatlarning tashlinip qalghanliqi, ahalilerning öyliride köktat yétishtürelmeywatqanliqi bayan qilin'ghan.

Téléfonimizni qobul qilghan ghulja nahiye samiyüzi yéziliq hökümetning bir xadimi, ahalilerning étizliqqa nöwet bilen nazaret astida apirilip-ekiliniwatqanliqini bayan qildi. U yene ahalilerning öydin talagha chiqish ehwalining téxnikiwiy üsküniler bilen közitiliwatqanliqi we bu üskünining “Ji'enji” dep atilidighanliqini eskertti. Wirus weziyitini tordin her küni közitip kéliwatqan lagér shahiti zumret dawutning bayan qilishiche, ahalilerning öyliri we bina ishiklirige örnitilghan közitish apiratining nami “Ji'enji”, yeni “Amanliq saqlash apparati” bolup, bu üsküne ahalilerning ishikidin chiqishinila emes, qoro témidin atlap chiqishinimu közitish we saqchi organlirigha melum qilish iqtidarigha ige iken.

Mezkur xadimning déyishiche, eger bu tüzümge ri'aye qilmighanlar körülse, kent ahaliler kométiti teripidin bir terep qilinidiken. Lagér shahiti zumret dawut ilgiriki ziyaretlirimizde asasiy qatlamdimki ahaliler kométitlirining köplep emeliy hoquq bérilgen we ghaljrlashqan bir yerlik organ ikenlikini eskertken idi. U bügünmu özi igiligen melumatlargha asasen, bu tüzümni buzghanlargha 30 kündin 60 kün arisida tutup turush jazasi bériliwatqanliqini ilgiri sürdi.

Mazar yézisidiki mezkur amanliq xadimi, bu tüzümni buzghanlargha az dégende 24 sa'et tutup turush jazasi bérilidighanliqini ashkarilidi.  

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.