D u q lozanda xitay olimpik musabiqisige qarshi zor kölemlik namayish élip barmaqchi

Ixtiyariy muxbirimiz ekrem
2021-06-18
Share
D u q lozanda xitay olimpik musabiqisige qarshi zor kölemlik namayish élip barmaqchi Dunyaning herqaysi jayliridin jenwege kelgen Uyghurlar ötküzgen chong hejimlik namayishta d u q re'isi dolqun eysa ependi sözlimekte. 2018-Yili 7-noyabir, shiwétsariye.
RFA/Ekrem

Yawropadiki Uyghurlar seperwer qilin'ghan lozandiki namayish d u q teshkilligen yene bir qétimliq zor kölemlik namayish hésablinidiken.

D u q 2018-yili 4-ayning 27-küni bélgiye paytexti béryussélda "5 Ming kishilik namayish" ni, 2018-li 11-ayning 7-küni shiwétsariyening jenwe shehridiki b d t binasi aldida yene qanche ming kishilik namayishni teshkillep, xitayning jaza lagérliri siyasitini pash qilghan we zor xelq'araliq tesir qozghighan idi. Bu qétim d u q 2022-yilliq béyjing qishliq olimpik musabiqisige qarshi shiwétsariyening lozan shehridiki xelq'ara olimpik komitétining merkizi binasi aldida ene shundaq nechche ming kishilik namayish orunlashturushning seperwerlik pa'aliyitini bashlighan.

D u q merkizidin igiligen uchurlirimizgha qarighanda, bu qétimqi namayish d u q ning teshebbusi, "Sherqiy türkistan teshkilatliri hemkarliq munbiri" ning qarari bilen Uyghur, tibet, mongghul, xongkongliqlar we bashqa xelq'araliq kishilik hoquq teshkilatlirining hemkarliqida "Xelq'ara olimpik küni" bolghan 6-ayning 23-küni sa'et 13:00 din 15:30 ghiche lozanda élip bérilidiken. Korona wirusi seweblik kishilerning bashqa döletlerdin kélish imkani bolmighach, shu küni yene dunyaning bashqa elliridiki 40 tin artuq sheherde béyjing olimpikige qarshi xelq'araliq kölemde ortaq namayishlar ötküzülidiken.

Bu qétimqi namayish "Irqiy qirghinchiliq olimpikini bayqut qilayli" dégen shu'ar astida élip bérilidiken. D u q re'isi dolqun eysa ependi bu heqte toxtalghanda, aldi bilen hazirgha qeder béyjing olimpikige qarshi élip bérilghan heriketlerni semimizge sélip ötti. U sözide qétimqi namayishning meyli kölem jehettin bolsun, meyli mezmun jehettin bolsun, nahayiti muhim ehmiyetke ige tarixiy bir heriket bolidighanliqini tilgha aldi.

D u q ning mu'awin re'isi perhat muhemmidi ependi bu xususta toxtalghanda, 2022-yilliq béyjing qishliq olimpik musabiqisige qarshi shiwétsariyening lozan shehride ötküzülidighan nechche ming kishilik bu namayishning teyyarliq xizmetlirining jiddiy dawam qiliwatqanliqini bayan qildi. D u q yashlar komitétining re'isi, d u q bérlin ishxanisining mudiri gheyur qurban ependimu bu heqte ziyaritimizni qobul qilip, yawropadiki Uyghurlarning xitayning sheripini sunduridighan bu namayishqa aktip ishtirak qilishini ümid qilidighanliqini bildürdi.

Yawropadiki bir qisim Uyghurlar ijtima'iy taratqulardin paydillinip, kölimi zor bolghan mezkur namayishqa Uyghur jama'itining aktip qatnishishini bes-beste teshebbus qilishmaqta.

"Xelq'ara olimpik küni" bolghan 6-ayning 23-küni shiwétsariyening lozan shehridiki xelq'ara olimpik komitétining merkizi binasi aldida keng kölemlik namayish élip bérilidighanliqigha da'ir melumatni diqqitinglargha sunduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet