Uyghur rayonidiki teshwiqat sayahetchilikide Uyghur kimliki barghanche yoqitilmaqta

Washin'gtondin muxbirimiz méhriban teyyarlidi
2024.05.16
xoten-yotqan-sayahet Sayahetchiler xoten nahiyesidiki yotqan qedimiy sayahet rayonida süretke chüshüwatqan körünüsh.2023-Yili dékabir, xoten
www.ts.cn

Xitay xewerliridin melum bolushiche, nöwette Uyghur diyarida yolgha qoyuluwatqan atalmish “Medeniyet sayahetchiliki” de qeshqer, xoten qatarliq jenubiy Uyghur diyaridiki Uyghurlarning qedimiy medeniyet merkezliri we shimaldiki Uyghurlarning medeniyet merkizi bolghan güzel ghulja shehiri muhim sayahet nuqtilirigha aylandurulghan.

Xitaydiki ijtima'iy taratqularda tarqitilghan sin filimlirida, xitay sayahet shirketliri teripidin teripidin sétiwélinip, muzéy sheklide yasap chiqilghan mehelle tüsidiki sayahet nuqtilirida, Uyghurlarning turalghu öy, yémek-ichmek, bazar medeniyiti Uyghur medeniyitige tewe bolmighan milletlerge tewe qilip chüshendürülgen. Shuningdek, yéqinqi yillardin buyan xitay teshwiqat wasitiliride “Uyghur” ning ornigha “Shinjangliqlar” yaki “Her millet xelqi” dégen ibarilerning izchil qollinilishimu diqqet qozghimaqta.

Xitayning “Tengritagh” torida 15-may élan qilin'ghan “Shinjang ghulja shehiride sayahetchilik qizimaqta” mawzuluq resimlik xewerde, ghulja shehiridiki sayahet nuqtiliridin qazanchi mehellisidiki Uyghurlarning kök renglik péshaywanliq, üzüm barangliq turalghu öylirining aldigha, qoy béqiwatqan qazaq qizining portréti kirishtürülgen. Mezkur resimlik xewerge yene yawa kepterler erkin qonup yüridighan ghulja shehiridiki meydan menzirisi we ghulja shehirining Uyghur mehelliridiki qaynam-tashqinliq bazar menziriliri, ghulgha kochilirida Uyghurlarning xadik harwilirida olturup tamasha qiliwatqan sayahetchilerning resimliri kirishtürülgen. Emma bu resimlerde ghulja Uyghurlirining kiyinish alahidilikliridiki manchéstér doppa kiygen Uyghur erliri, chékilep yaghliq tangidighan Uyghur ayalliri we medeniy yasinip yüridighan jushqun ghulja yashlirining ornigha, bash kiyimsiz Uyghur er-ayalliri we kochilarda sayahet qiliwatqan xitaylarning her xil körünüshliri eks ettürülgen.

Undin bashqa xitay sayahetchiliri teripidin tarqitilghan sayahet sin filimliridimu, ghulja shehirining tunggan, qazaq, Uyghur, xitay qatarliq her millet xelqi yashaydighan köp milletlik sheher ikenliki, u yerde manju hökümranliqining simwoli bolghan “Ili jyangjün mehkimisi” ning barliqi alahide teshwiq qilin'ghan. Hetta ghuljidiki “Xitay baziri” dep atilip qalghan bazarmu xitay medeniyitige tewe sayahet nuqtisi qilip körsitilgen.

Xitay hökümitining bu teshwiqatliri medeniyet tetqiqatchiliri we weziyet analizchilirining jiddiy inkasini qozghidi.

Gérmanyediki Uyghur medeniyet tetqiqatchisi aysime mirsultan xanim xitay hökümitining atalmish medeniyet sayahetchilikide, Uyghurlargha tewe maddiy hem meniwi medeniyet nuqtiliri we örp-adetlerning “Az-sanliq milletlerge tewe” dep teshwiq qilinishidiki meqsetning “Uyghur” namini yoqitish, Uyghur millitining medeniyitini inkar qilish ikenlikini bildürdi.

Aysime mirsultan xanim yene xitay hökümitining hazirgha qeder saqlinip kéliwatqan Uyghur medeniyet yadikarliqlirini xitay medeniyetining bir qismi qilip körsitiliwatqanliqini bildürdi.

Türkiyediki Uyghur medeniyet tetqiqatchisi piroféssor alimjan inayet ependining bildürüshiche, xitay hökümiti Uyghur diyarida yolgha qoyuwatqan atalmish “Medeniyet sayahetchiliki” emeliyette, xitay hökümitining yéqinqi yillarda “Jungxu'a milliti ortaq gewdisi éngini mustehkemlesh”, “Jungxu'a medeniyiti bilen ozuqlandurush” namida élip bériwatqan xitaylashturush siyasitining bir qismi iken.

Uning tekitlishiche, xitay hökümiti nöwette barliq wasitilerdin paydilinip, Uyghurlarni öz ana yurtida az sanliqlargha aylandurushqa, shundaqla özliri bazargha sélip kéliwatqan “Shinjang xitayning ayrilmas qismi, bu yerde her millet xelqi yashaydu” dégen sepsetisini ispatlashqa urunmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.