Анализчилар: «хитайниң ‹җуңхуа бирлики' тәшвиқати уйғурларниң миллий тарих еңини йоқитишни мәқсәт қилған»

Мухбиримиз меһрибан
2020-11-16
Share
qizil-naxsha-uyghur-1.jpg Қизил тәшвиқат хизмити мунасивити билән уюштурулған зор көләмлик мусабиқә паалийитидин көрүнүш. 2015-Йили 20-өктәбир, пәйзиват.
Xinhua

Уйғур аптоном районлуқ һөкүмәт 12-ноябир күни үрүмчидә йиғин ечип, пүткүл уйғур районида «җуңхуа бирлики еңи» ни күчәйтишни, болупму «җуңхуа милләтлири тарих еңи» ни муһим нуқта қилишни тәкитлигән.

Уйғур аптоном районлуқ парткомниң секретари чен чүәнго, уйғур аптоном районлуқ һөкүмәтниң рәиси шөһрәт закирлар йиғинда сөз қилип, хитай компартийәсиниң баш секретари ши җинпиң тәкитлигән «җуңхуа миллити бирлики» еңи тәшвиқатини пүткүл уйғур аптоном райони даирисидә қанат яйдуруш, болупму ‹җуңхуа милләтлириниң тарих бирлики еңи' ни муһим һалқа қилип тутушни тәкитлигән.

Хитай вәзийитини йеқиндин көзитип келиватқан вәзийәт анализчилиридин америкада чиқидиған «бейҗиң баһари» журнилиниң обзорчиси ху пиң әпәнди вә америкадики уйғур археолог, тарихчи қурбан вәли әпәндиләр радийомиз зияритини қобул қилип, хитай һөкүмити тәшвиқ қиливатқан «җуңхуа тарихи еңи» вә униң мәқсити һәққидә өз қарашлирини оттуриға қойди.

Ху пиң әпәнди баянида ши җиңпиң тәхткә чиққандин буян, илгиридин давамлишип келиватқан «хитай бирлики» тәшвиқатини техиму күчәйткәнликини тәкитлиди.

Ху пиң әпәнди хитай һөкүмитиниң уйғурларға хитай тили вә мәдәнийәт еңини радикал васитиләр арқилиқ мәҗбурий теңиливатқанлиқини, уйғурлар өзиниң диний етиқади, өрп-адити вә тил-мәдәнийитидин ваз кечишкә мәҗбурлиниватқанлиқини баян қилди.

Зияритимизни қобул қилған қурбан вәли әпәнди хитай даирилириниң аталмиш «җуңхуа милләтлири тарих бирлики еңи» тәшвиқатиниң әмәлийәттә уйғурларниң миллий тарих еңини йоқитишни мәқсәт қилғанлиқини билдүрди.

Қурбан вәли йәнә хитай «шинҗаң», йәни «йеңи чегра» дәп ативалған наминиң өзидинла бу земинниң мустәмликә қилинған бир тупрақ икәнлики ениқ чиқип туридиғанлиқи, уйғурларниң ана вәтини болған «шәрқий түркистан» ниң тарихта хитайға охшимайдиған айрим мәдәнийәткә вә мустәқиллиқ тарихиға игә бир земин икәнликини тарихий пакитлар арқилиқ чүшәндүрүп өтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт