Analizchilar: "Xitayning 'jungxu'a birliki' teshwiqati Uyghurlarning milliy tarix éngini yoqitishni meqset qilghan"

Muxbirimiz méhriban
2020-11-16
Share
qizil-naxsha-uyghur-1.jpg Qizil teshwiqat xizmiti munasiwiti bilen uyushturulghan zor kölemlik musabiqe pa'aliyitidin körünüsh. 2015-Yili 20-öktebir, peyziwat.
Xinhua

Uyghur aptonom rayonluq hökümet 12-noyabir küni ürümchide yighin échip, pütkül Uyghur rayonida "Jungxu'a birliki éngi" ni kücheytishni, bolupmu "Jungxu'a milletliri tarix éngi" ni muhim nuqta qilishni tekitligen.

Uyghur aptonom rayonluq partkomning sékrétari chén chüen'go, Uyghur aptonom rayonluq hökümetning re'isi shöhret zakirlar yighinda söz qilip, xitay kompartiyesining bash sékrétari shi jinping tekitligen "Jungxu'a milliti birliki" éngi teshwiqatini pütkül Uyghur aptonom rayoni da'iriside qanat yaydurush, bolupmu 'jungxu'a milletlirining tarix birliki éngi' ni muhim halqa qilip tutushni tekitligen.

Xitay weziyitini yéqindin közitip kéliwatqan weziyet analizchiliridin amérikada chiqidighan "Béyjing bahari" zhurnilining obzorchisi xu ping ependi we amérikadiki Uyghur arxé'olog, tarixchi qurban weli ependiler radiyomiz ziyaritini qobul qilip, xitay hökümiti teshwiq qiliwatqan "Jungxu'a tarixi éngi" we uning meqsiti heqqide öz qarashlirini otturigha qoydi.

Xu ping ependi bayanida shi jingping textke chiqqandin buyan, ilgiridin dawamliship kéliwatqan "Xitay birliki" teshwiqatini téximu kücheytkenlikini tekitlidi.

Xu ping ependi xitay hökümitining Uyghurlargha xitay tili we medeniyet éngini radikal wasitiler arqiliq mejburiy téngiliwatqanliqini, Uyghurlar özining diniy étiqadi, örp-aditi we til-medeniyitidin waz kéchishke mejburliniwatqanliqini bayan qildi.

Ziyaritimizni qobul qilghan qurban weli ependi xitay da'irilirining atalmish "Jungxu'a milletliri tarix birliki éngi" teshwiqatining emeliyette Uyghurlarning milliy tarix éngini yoqitishni meqset qilghanliqini bildürdi.

Qurban weli yene xitay "Shinjang", yeni "Yéngi chégra" dep atiwalghan namining özidinla bu zéminning mustemlike qilin'ghan bir tupraq ikenliki éniq chiqip turidighanliqi, Uyghurlarning ana wetini bolghan "Sherqiy türkistan" ning tarixta xitaygha oxshimaydighan ayrim medeniyetke we musteqilliq tarixigha ige bir zémin ikenlikini tarixiy pakitlar arqiliq chüshendürüp ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet