Корона вируси юқуминиң бейҗиңда қайта тарқилиши диққәт қозғиди

Мухбиримиз меһрибан
2020-06-16
Елхәт
Пикир
Share
Принт
Коруна вирусиниң тарқилиши сәвәблик кочидики дуканлар вә сиртқа чиққан кишиләрниң көрүнүши. 2020-Йили 2-март, бейҗиң.
Коруна вирусиниң тарқилиши сәвәблик кочидики дуканлар вә сиртқа чиққан кишиләрниң көрүнүши. 2020-Йили 2-март, бейҗиң.
AP

Хитайниң вухән шәһиридин хитай вә пүтүн дуняға тарқалған корона вируси юқуминиң 6-ай мәзгилидә хитай пайтәхти бейҗиңда қайтидин тарқилишқа башлиғанлиқи бирнәччә күндин буян хәлқара таратқуларда қизиқ нуқтиларниң бири болмақта.

Америкадики нопузлуқ таратқулардин SBS радийо-телевизийә қанилиниң 16-июн хәвәр қилишичә, хитай һөкүмәт даирилири бу қетимқи юқумниң бейҗиң шәһиридики көктат топ тарқитиш базиридин тарқалғанлиқини, юқум вирусиниң чәтәлдин импорт қилинған салмон белиқи яки корона вирусидин юқумланған белиқ содигәрлири тәрипидин тарқалғанлиқини илгири сүргән. Хәвәрдә йәнә хитай һөкүмәт таратқулириниң әвәрлиридин нәқил кәлтүрүлүп, хитайдики салмон белиқиниң 80 пирсәнтиниң норвегийәдин импорт қилинидиғанлиқи әскәртилгән.

Радийомиз хитай бөлүминиң 16-июн күни бейҗиңдики пуқралардин игилигән әһвалдин мәлум болушичә, юқумдин кейин бейҗиң шәһәрлик һөкүмәт буйруқ чүшүрүп, мәзкур көктат топ тарқитиш базирини тақиған. Базардики барлиқ тиҗарәтчиләр вә мал сетивалғучилар вирустин юқумлиниш әһвалини тәкшүрүшкә буйрулған.

Хитай һөкүмәт таратқулиринин г илгири суришичә, бу қетим бейҗиңда қайта тарқалған корона вируси юқуми сәвәблик бейҗиң шәһиридә 28 районда карантин тәдбирлири йолға қоюлған. Бейҗиң шәһиригә қарашлиқ 16 райондин 8 районда юқумланғучилар байқалған. Бейҗиң һөкүмәт даирилири  11-июндин 15-июнғичә 100 дин артуқ адәмниң юқумланғанлиқини хәвәр қилған, әмма иҗтимаий таратқуларда юқумланғанларниң буниңдин нәччә һәссә көп икәнлики илгири сүрүлгән.

Корона вируси юқуми дуняви вабаға айлинип, америка қатарлиқ юқум еғир болған дөләтләр хитайни әйибләватқан, хитай һөкүмити болса һәр хил баһаниләр билән вирус юқуминиң дуняға ямрап кетишидики мәсулийитидин қечиватқан бир мәзгилдә бейҗиңда қайтидин юқум әһвалиниң көрүлүши вәзийәт анализчилириниң диққитини қозғиди.

Хитай вәзийәт анализчилиридин «бейҗиң баһари» журнилининиң баш муһәррири вәзийәт анализчиси ху пиң әпәндиниң билдүрүшичә, хитай һөкүмәт таратқулирида юқум мәнбәсиниң импорт қилинған салмон белиқиға бағлап хәвәр қилишида хитай һөкүмәт даирилириниң бу қетимқи юқумниң мәсулийитидин қечишни мәқсәт қиливатқанлиқини тәхмин қилғили болидикән.

Ху пиң мундақ деди: «бу қетимқи юқум әһвалидиму хитай һөкүмити юқум мәнбәсини башқиларға дөңгәш тактикисини қоллиниватиду. Хитайниң бу қилмишиға һазир пәқәт америка, явропа дөләтлирила әмәс, бәлки пүткүл дуня җиддий һушярлиқ кәйпиятини ипадиләватиду. Чүнки хитай һөкүмити бундақ қилиш арқилиқ бир тәрәптин мәсулийәттин қечиш мәқситигә йетишкә урунса, йәнә бир тәрәптин дөләт ичидә хитай хәлқиниң һөкүмәткә болған наразилиқи вә бу сәвәбтин келип чиқиш еһримали болған муқимсизлиқниң алдини алмақчи болуватиду.»

Америкадики коломбийә университетиниң теббий пәнләр тәтқиқатчиси доктор мәмәт имин әпәнди корона вируси юқуми тарқалғандин буян юқум вәзийитини изчил көзитип келиватқан вә уйғурларға юқумдин мудапиәлиниш һәққидә иҗтимаий таратқуларда мәслиһәт программилири берип келиватқан мутәхәссисләрниң бири.  

Доктор мәмәт имин әпәнди 16-июн күни зияритимизни қобул қилип, юқириқи бир қатар мәсилиләр һәққидә оз қарашлирини оттуриға қоюп өтти.

У корона вируси юқуминиң тәрәққияти һәққидә тохтилип, дәсләп хитайдин тарқилип, бирнәччә ай ичидә ичидә йәр шари хатактерлиқ апәткә айланған, американиң өзидә 2 милйондин артуқ адәм юқумлинип, 118 миң адәмниң өлүшини кәлтүрүп чиқарған бу вабаниң техичә давамлишиватқанлиқини билдүрди. У корона вируси юқуминиң 6-айниң бешида хитайниң бейҗиң шәһиридә қайтидин тарқилишиниң бу юқумниң йеқин арида пүтүнләй контрол қилинишиниң тәсликини көрситидиғанлиқини тәкитлиди.

Мәмәт имин әпәнди йәнә  хитай һөкүмәт даирилириниң корона вируси юқумиға қарита тутуп кәлгән позитсийиси һәққидиму тохталди. У корона вирусиниң йәр шари характерлик апәткә айлиниши сәвәблик нурғун дөләтләрниң хитай һөкүмитини бу мәсилә бойичә әйиблигәнликини, бәзи дөләтләр һөкүмәтлириниң хитай һөкүмитидин төләм тәләп қиливатқанлиқини тилға алди. У мушундақ бир мәзгилдә корона вируси юқуминиң бейҗиңда қайтидин тарқилиши хитай һөкүмитини қаттиқ җиддийләштүриватқанлиқини тәкитлиди.

Пикирләр (0)
Share
Толуқ бәт