Икки нәпәр уйғур таҗсиман вирус юқумдариниң "гуаңҗуда ишләватқанлар" икәнлики айдиңлашти

Мухбиримиз шөһрәт һошур
2020-05-05
Share
guangzhou-korona-virus.jpg Корона вирус мәзгилидә гуаңҗу кочисида кетиватқан кишиләр. 2020-Йили 13-апрел.
AP

Иҗтимаий таратқуларда тарқалған гуаңҗуда икки нәпәр уйғурниң таҗсиман өпкә яллуғи вируси билән юқумланғанлиқи һәққидики хәвәр радийомиз тәрипидин дәлилләнгәндин кейин өзини "хитай өлкилиридә яшаватқан бир уйғур" дәп тонуштурған бир аңлиғучимиз радийомизға инкас йоллап, мәзкур икки юқумдарниң уйғур районидин гуаңҗуға йөткәп келингән мәҗбурий әмгәк ишчилиридин икәнликини илгири сүргән иди. Мухбиримизниң ениқлашлири давамида икки юқумдарниң гуаңҗуда "ишләватқанлар" икәнлики мәлум болди.

Хәвәрләрдин мәлум болушичә, 2014-йили "кунмиң вәқәси" йүз бәргәндин кейин хитай өлкилиридики уйғурлар асасән дегүдәк өз юртлириға қайтурулған иди. Австралийәдики сиясий истратегийә тәтқиқат орниниң хәвәр қилишичә, хитай даирилири йеқинқи йилларда 80 миңдин артуқ уйғурни хитай өлкилиридики завут карханиларға мәҗбури йөткигән.

Гуаңдуңдики икки уйғур юқумдар һәққидә тарқитилған уқтуруштиму гуаңҗуда бәлгилик санда уйғур ишчиларниң барлиқи ишарәт қилинған. Шуңа радийомизға йолланған инкастики учурниң, йәни мәзкур икки уйғур юқумдарниң мәҗбурий әмгәк ишчилиридин икәнликиниң тоғра-хаталиқини айдиңлаштуруш үчүн биз алди билән гуаңдуң өлкилик сәһийә назаритигә телефон қилдуқ. Алақидар хадим соаллиримизға җавабән бу юқумдарларниң кимликлирини ашкарилашқа болмайдиғанлиқи, бу һәқтә ашкарилинишқа болидиған учурларни пәқәт өлкилик һөкүмәтниң таҗсиман вирус һәққидики тор бетидинла көрәләйдиғанлиқимизни ейтти.

Телефонимизни қобул қилған гуаңҗу шәһәрлик сәһийә идарисиму бу һәқтики учурларни пәқәт алақидар тор бәттин көрүшимизни тәвсийә қилди вә һәрқандақ бир хадимниң бу һәқтики соаллиримизға җаваб берәлмәйдиғанлиқини әскәртти.

Гуаңҗуда яшаватқан уйғурлардин бириниң баян қилишичә, уларға алақидар хадимлар икки уйғурниң таҗсиман вирустин юқумланғанлиқини уқтурған, әмма кимликини билдүрмигән. Гуаңҗуда йәнә мәлум бир мулазимәт орнида ишләйдиған бир хадимниң ашкарилишичә, сақчилар уларға бу һәқтә уқтуруш қилғанда бу икки юқумдарниң гуаңҗуда ишләйдиған уйғурлар икәнликини тилға алған, әмма уларниң қандақ иш қилидиғанлиқини демигән.

"җәнуби хитай әтигәнлик гезити" ниң мушу айниң 2‏-күни хәвәр қилишичә, хитай даирилири бу йилниң бешида зор бир түркүм уйғурларни лагерлардин хитайниң 19 өлкисидики завут-фабрикаларға йөткәшни пиланлиған, әмма таҗсиман вирус сәвәблик бу пиланниң иҗраси кечиктүрүлгән. Хәвәрдә дейилишичә, гуаңдуңниң шенҗен шәһиригила 50 миң ишчи қобул қилиш вәзипә қилинған. Гуаңҗудин телефонимизни қобул қилған йәнә бир уйғурму өз иш орнида икки уйғурниң юқумланғанғлиқи һәққидә йиғин ечилғанлиқи, әмма уларниң кимлик мәлуматлирини ашкарилимиғанлиқини ейтти. Мәлум болушичә, буларғиму мәзкур икки юқумдарниң "гуаңҗода ишләйдиғанлар" икәнлики билдүрүлгән.

"җәнуби хитай әтигәнлик гезити" ниң мәзкур хәвиридә "әнхуй гезити" дин нәқил елинишичә, әнхуйға 3‏-ай ичидә 1560 ишчи йөткәп болунған. Әмма хәвәрдә гуаңдоңға йөткилиш планланған уйғурларниң йөткилишкә башлиған яки башлимиғанлиқи әскәртилмигән.

Юқуриқи ениқлашлиримиздин мәзкур икки юқумдарниң гуаңҗода ишләватқанлар икәнлики айдиңлашқан болсиму, әмма уларниң даириләр мәҗбурий йөткәп әкәлгән ишчилар яки өз алдиған кәлгән ресторан қатарлиқ орунлардики мулазимәтчи икәнлики һазирчә мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт