Ikki neper Uyghur tajsiman wirus yuqumdarining "Gu'angjuda ishlewatqanlar" ikenliki aydinglashti

Muxbirimiz shöhret hoshur
2020-05-05
Share
guangzhou-korona-virus.jpg Korona wirus mezgilide gu'angju kochisida kétiwatqan kishiler. 2020-Yili 13-aprél.
AP

Ijtima'iy taratqularda tarqalghan gu'angjuda ikki neper Uyghurning tajsiman öpke yallughi wirusi bilen yuqumlan'ghanliqi heqqidiki xewer radiyomiz teripidin delillen'gendin kéyin özini "Xitay ölkiliride yashawatqan bir Uyghur" dep tonushturghan bir anglighuchimiz radiyomizgha inkas yollap, mezkur ikki yuqumdarning Uyghur rayonidin gu'angjugha yötkep kélin'gen mejburiy emgek ishchiliridin ikenlikini ilgiri sürgen idi. Muxbirimizning éniqlashliri dawamida ikki yuqumdarning gu'angjuda "Ishlewatqanlar" ikenliki melum boldi.

Xewerlerdin melum bolushiche, 2014-yili "Kunming weqesi" yüz bergendin kéyin xitay ölkiliridiki Uyghurlar asasen dégüdek öz yurtlirigha qayturulghan idi. Awstraliyediki siyasiy istratégiye tetqiqat ornining xewer qilishiche, xitay da'iriliri yéqinqi yillarda 80 mingdin artuq Uyghurni xitay ölkiliridiki zawut karxanilargha mejburi yötkigen.

Gu'angdungdiki ikki Uyghur yuqumdar heqqide tarqitilghan uqturushtimu gu'angjuda belgilik sanda Uyghur ishchilarning barliqi isharet qilin'ghan. Shunga radiyomizgha yollan'ghan inkastiki uchurning, yeni mezkur ikki Uyghur yuqumdarning mejburiy emgek ishchiliridin ikenlikining toghra-xataliqini aydinglashturush üchün biz aldi bilen gu'angdung ölkilik sehiye nazaritige téléfon qilduq. Alaqidar xadim so'allirimizgha jawaben bu yuqumdarlarning kimliklirini ashkarilashqa bolmaydighanliqi, bu heqte ashkarilinishqa bolidighan uchurlarni peqet ölkilik hökümetning tajsiman wirus heqqidiki tor bétidinla köreleydighanliqimizni éytti.

Téléfonimizni qobul qilghan gu'angju sheherlik sehiye idarisimu bu heqtiki uchurlarni peqet alaqidar tor bettin körüshimizni tewsiye qildi we herqandaq bir xadimning bu heqtiki so'allirimizgha jawab bérelmeydighanliqini eskertti.

Gu'angjuda yashawatqan Uyghurlardin birining bayan qilishiche, ulargha alaqidar xadimlar ikki Uyghurning tajsiman wirustin yuqumlan'ghanliqini uqturghan, emma kimlikini bildürmigen. Gu'angjuda yene melum bir mulazimet ornida ishleydighan bir xadimning ashkarilishiche, saqchilar ulargha bu heqte uqturush qilghanda bu ikki yuqumdarning gu'angjuda ishleydighan Uyghurlar ikenlikini tilgha alghan, emma ularning qandaq ish qilidighanliqini démigen.

"Jenubi xitay etigenlik géziti" ning mushu ayning 2‏-küni xewer qilishiche, xitay da'iriliri bu yilning béshida zor bir türküm Uyghurlarni lagérlardin xitayning 19 ölkisidiki zawut-fabrikalargha yötkeshni pilanlighan, emma tajsiman wirus seweblik bu pilanning ijrasi kéchiktürülgen. Xewerde déyilishiche, gu'angdungning shénjén shehirigila 50 ming ishchi qobul qilish wezipe qilin'ghan. Gu'angjudin téléfonimizni qobul qilghan yene bir Uyghurmu öz ish ornida ikki Uyghurning yuqumlan'ghan'ghliqi heqqide yighin échilghanliqi, emma ularning kimlik melumatlirini ashkarilimighanliqini éytti. Melum bolushiche, bularghimu mezkur ikki yuqumdarning "Gu'angjoda ishleydighanlar" ikenliki bildürülgen.

"Jenubi xitay etigenlik géziti" ning mezkur xewiride "Enxuy géziti" din neqil élinishiche, enxuygha 3‏-ay ichide 1560 ishchi yötkep bolun'ghan. Emma xewerde gu'angdonggha yötkilish planlan'ghan Uyghurlarning yötkilishke bashlighan yaki bashlimighanliqi eskertilmigen.

Yuquriqi éniqlashlirimizdin mezkur ikki yuqumdarning gu'angjoda ishlewatqanlar ikenliki aydinglashqan bolsimu, emma ularning da'iriler mejburiy yötkep ekelgen ishchilar yaki öz aldighan kelgen réstoran qatarliq orunlardiki mulazimetchi ikenliki hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet