"Iyi" partiyesi uyushturghan "Xiyalimdiki sherqiy türkistan" témisidiki resim sizish musabiqisi resmiy bashlandi

Ixtiyariy muxbirimiz erkin tarim
2021-05-21
Share
Türkiyediki Türkiyediki "Iyi" partiyesining re'isi meral aqshener xanim partiyesining parlaméntta qilghan sözide Uyghur mesilisi toghrisida alahide toxtaldi we türkiye hökümitini qattiq tenqid qildi. 2021-Yili 9-mart, enqere.
RFA/Erkin Tarim

Xitayning Uyghurlargha qarita "Irqiy qirghinchiliq" yürgüzgenliki amérika hökümiti, kanada, gollandiye, en'gliye we litwa parlaménti teripidin birdek békitilgen bir peytte türkiye ma'arip ministirliqi 5-ayning 3-küni ottura mektep oqughuchiliri arisida "Xiyalimdiki xitay" témisida resim sizish musabiqisi bashlan'ghanliqini jakarlighan we bu hem türkiyede qattiq naraziliqqa uchrighanidi. Türkiyediki "Iyi" partiyesi buninggha qarshi 5-ayning 19-küni yeni türkiye yashlar bayrimi küni "Xiyalimdiki sherqiy türkistan" témisida resim sizish musabiqisi bashlan'ghanliqini jakarlidi. Mezkur musabiqige türkiye boyiche bashlan'ghuch, ottura we toluq ottura mektep oqughuchiliri resim sizip 6-ayning 14-künigiche "Iyi" partiyesining özliri turuwatqan sheher, wilayet, nahiye we kentlerdiki ishxanilirigha tapshurup berse bolidiken.

Biz mezkur resim sizish musabiqisi toghrisida téximu tepsiliy melumat igilesh üchün "Iyi" partiyesining türk dunyasi xizmetlirige mes'ul xadimi ayten soysal xanim bilen söhbet élip barduq. U, bu resim sizish körgezmisini ötküzüshtiki meqsiti heqqide toxtilip mundaq dédi: "Bizning bashqarma pütün dunyadiki türkiy xelqlerge mes'ul bir bashqarma. Biz xitayning Uyghurlargha qarita élip bériwatqan bésim siyasitini anglitidighan köp pa'aliyet uyushturduq. Sizgimu melum bolghinidek yéqinda türkiye milliy ma'arip ministirliqi ottura mektep oqughuchiliri üchün 'xiyalimdiki xitay' mawzuluq resim sizish musabiqisi uyushturghanliqi üchün könglimiz bekla yérim bolghanidi. Biz buninggha naraziliq bildürüsh üchün 'xiyalimdiki sherqiy türkistan' témisida resim sizish musabiqisi ötküzüshni qarar qilduq. Bu pa'aliyet 6-ayning 14-küni axirlishidu. 19-Chésla musabiqide netijige érishkenler élan qilinidu".

U, "Iyi" partiyesi ötküzüwatqan "Xiyalimdiki sherqiy türkistan" mawzuluq resim sizish musabiqiside derijige érishkenlerge mukapat bérilidighanliqini bayan qilip mundaq dédi: "Musabiqide derijige érishkenlerge maddiy mukapat bérilidu. 6-Ayning 19-küni bu resimler qoyulghan körgezme achmaqchimiz. Bu musabiqe toghrisida téximu tepsiliy melumat igileshni xalisingiz 'iyi' partiyesining tor bétige kirsingiz bolidu".

Türkiyede pa'aliyet élip bériwatqan dunya Uyghur qurultiyi wexpisi re'isi abduréshit abdulxemit ependi "Iyi" partiyesi uyushturghan bu resim sizish musabiqisining türkiye ma'arip ministirliqi ötküzüwatqan "Xiyalimdiki xitay" mawzuluq resim sizish musabiqisige bérilgen eng tesirlik jawab ikenlikini, zor ehmiyetke ige ikenlikini, türkiyede ata-aniliri, uruq-tughqanliri xitay lagér we türmiliride turuwatqan köp Uyghur ösmür barliqini bularning mezkur pa'aliyetke aktip qatnishishi kéreklikini bayan qildi.

Gérmaniyede yashawatqan tonulghan Uyghur ressam merwayit hapiz xanim perzentlerning sebiy yürikining heqiqiy héssiyatini ipadileydighan resimlerni sizidighanliqini, buning Uyghurlarning éghir weziyitini anglitish üchün zor ehmiyetke ige ikenlikini bayan qildi.

Türkiye ma'arip ministirliqi we xitay elchixanisining qollishi bilen enqerediki xelq'ara ilim we kültür wexpi 2016-yilidin buyan ottura mektep oqughuchiliri arisida "Xiyalimdiki xitay" mawzuluq resim sizish musabiqisi ötküzüp kéliwatqan bolup, bu yilqisi qattiq naraziliqqa uchrimaqta. Türkiyening sabiq bash ministiri, "Kélechek" partiyesi re'isi exmet dawut'oghlu bash bolup, köp sanda siyasetchi, ziyaliy, ammiwi teshkilat mes'ulliri we xelq ammisi ottura mektep oqughuchiliri sizghan "Xiyalimdiki sherqiy türkistan" mawzuluq kök bayraq sizilghan resimlerni tarqatmaqta. "Kélechek" partiyesi re'isi exmet dawut'oghlu faruq nazmi ismidiki bir oqughuchining "Xiyalimdiki xitay" mawzuluq resim sizish musabiqisige ewetish üchün sizghan kök bayraqqa salam bériwatqan bir qiz oqughuchining resimini özining twittér adrésidin tarqatqanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet