Америка президенти доналд трамп «хоңкоң аптономийә сиясий қануни» ға имза қойди

Мухбиримиз меһрибан
2020-07-16
Елхәт
Пикир
Share
Принт
Америка президент доналд трамп қанун лайиһәсигә имза қоюватқан көрүнүш. 2020-Йили 16-июн, вашингтон
Америка президент доналд трамп қанун лайиһәсигә имза қоюватқан көрүнүш. 2020-Йили 16-июн, вашингтон
AP

14-Июл күни америка президенти доналд трамп «хоңкоң аптономийә сиясий қануни» вә униңға қошумчә қилинған бир мәмурий буйруқиға имза қойди. Шу күни доналд трамп бу қанун һәққидә баянат бәрди.

Доналд трамп сөзидә хоңкоңға қаритилған илгирики барлиқ иқтисадий имтиязларниң бикар қилинғанлиқини билдүрүп, мундақ дегән: «бүгүн мән хоңкоңға мунасивәтлик қанун лайиһәсигә вә униңға қошумчә қилинған бир мәмурий буйруққа имза қойдум. Буниң билән американиң хоңкоңға қаратқан барлиқ имтиязлири бикар қилинди. Хоңкуңға бундин кейин хитай чоң қуруқлуқиға охшаш муамилә қилиниду, алаһидә имтиязлири болмайду, сәзгүр техникилар хоңкоңға експорт қилинмайду.»

Президент доналд трамп сөзини давамлаштуруп, нөвәттики хоңкоң вәзийити һәққидә тохтилип, мундақ дегән: «һәммәйлән немә ишлар болуватқинини көрүп туруватиду, бу яхши вәзийәт әмәс. Хоңкуңлуқларниң әркинлики тартивелинди, кишилик һәқ-һоқуқлири тартивелинди. Хоңкуң вәзийитиниң тәрәққиятиға әгишип, мән хоңкоңни әркин сода риқабитигә бәрдашлиқ берәлмәйду, дәп қараймән. Мениңчә, көплигән кишиләр хоңкоңдин кетиду.»

Президент данолд трамп американиң «хоңкоң аптономийә сиясити қануни» вә қошумчә бир мәмурий буйруқиға имза қойғандин кейин, бу хәвәр хәлқара таратқуларда хәвәр қилинип, күчлүк инкас қозғиди.

Хитай ташқи ишлар министирлиқиниң баянатчиси хуа чүнйиң 15-июл чаршәнбә күни наразилиқ баянати берип, әгәр америка бу қанунни әмәлийләштүрсә, хитайниң буниңдин өч алидиғанлиқини билдүргән.

Хуа чүнйиң мундақ дегән: «америка тәрәпниң хоңкоңда ‹дөләт хәвпсизлик қануни' ниң иҗра қилинишиға тосқунлуқ қилиш муддиаси һәргиз әмәлгә ашмайду. Өз мәнпәәтини қоғдаш үчүн хитай һөкүмити зөрүр болған инкасларни қайтуриду. Американиң мунасивәтлик һөкүмәт әмәлдарлири вә тармақлириға тәдбир қоллиниду. Биз американи хаталиқлирини түзитип, аталмиш ‹хоңкоң аптономийә сиясити қануни' ни иҗра қилмаслиққа дәвәт қилимиз. Биз йәнә американи һәрқандақ бир васитә қоллинип хоңкоңни өз ичигә алған хитайниң ички ишлириға арилашмаслиққа дәвәт қилимиз. Әгәр америка өз алдиға йол тутидикән, хитай тәрәпму буниңға кәскин инкас қайтуриду.»

Хитай вәзийәт анализчилиридин тор сөзчиси ма җү әпәнди хитай вәзийәт анализчилириниң америка президенти доналд трамп имзалиған «хоңкоң аптономийә сиясити қануни» һәққидики қарашлирини шәрһләп өтти.

Маҗү әпәнди сөзидә американиң бу қанунни йолға қоюши, американиң илгири хоңкоңға қаратқан барлиқ алаһидә имтиязлириниң бикарқилинғанлидин бешарәт беридиғанлиқини билдүрди. У бу қанун хоңкоңда йолға қоюлғандин кейин, хоңкоңниң иқтисадий җәһәттә хитай шәһәрлиригә охшаш муамилигә учрайдиғанлиқи, бу әһвалниң хитайниң дөләт иқтисадиға, болупму хитай әмәлдарлириниң хоңкоңдики мәнпәитигә қаттиқ зәрбә болидиғанлиқини тәкитлиди.

Дуня уйғур қурултийи хитай ишлири комитетиниң мудири илшат һәсән әпәндиму зияритимизни қобул қилип, америка президенти доналд трамп имза қойғандин кейин қанунға айланған «хоңкоң аптономийә сиясити қануни» ниң хоңкоңлуқларниң әркинлики вә демократийәсини дәпсәндә қилған хитай һөкүмитигә қарши қолланған бир тәдбири икәнликини билдүрди.

Илшат һәсән әпәнди йәнә «хоңкоң аптономийә сиясити қануни» ниң мәзмуни вә униң хитай һөкүмитиниң иқтисадий мәнпәәтигә көрситидиған тәсири һәққидиму өз қарашлирини баян қилип өтти.

Пикирләр (0)
Share
Толуқ бәт