Xu'awéy shirkitining gollandiye yanfon toridiki söhbetlerni oghriliqche anglighanliqi melum

• Muxbirimiz memetjan jüme
  2021-04-18

Xitayning xu'awéy shirkitining gollandiye KPN yanfon torini erkin teqib qilghan we uningdiki barliq söhbetlerni oghriliqche anglighan bolushi mumkinliki melum bolghan.

“Gollandiye waqit géziti” ning xewer qilishiche, bu heqtiki xewerni eng deslep gollandiyedin chiqidighan “Wolkskran géziti” xewer qilghan bolup, ularning éytishiche, mezkur gézitining muherrirliri 2010-yili xu'awéyning KPN téléfon torini suyi'istémal qilghanliqi heqqidiki bir mexpiy doklatni közdin kechürgen.

“Wolkskran géziti” doklattin neqil élip xewer qilishiche, eyni chaghda xu'awéy shirkitiKPN yanfon tori abotnlirining, jümlidin sabiq bash wezir jan pitér balkénéndé we xitay öktichilirining téléfonlirini oghriliqche anglash imkaniyitige ige bolghan iken.

Uningdin bashqa xu'awéy yene qaysi nomurlarning gollandiye saqchiliri we jasusluq organliri teripidin teqib qilin'ghanliqinimu toluq bilip turalighan bolushi mumkin iken.

Melum bolushiche, KPN yanfon tori 2009-yiligha qeder xu'awéyning yanfon tor téxnikisini ishletkendin bashqa shirketning ga'aga shehiridiki bash shtabida 6 neper xitay puqrasini yallap ishletken.

Bu heqtiki xewerler otturigha chiqqandin kéyin, KPN firansiyening kapgémini shirkitini bu heqte tekshürüsh élip bérishqa yallighan. Uningdin bashqa gollandiyening a'iwd shirkitimu KPN yanfon shirkitini xu'awéyning jasusluq heriketliri üstide agahlandurghan iken.

Kapgémini shirkiti doklatida, KPN shirkitining bash shtabida hemde xitayda ishleydighan xu'awéy téxnik xadimliri KPN téléfon toridiki alaqilerni xalighan waqitta teqib qilish, her qandaq téléfon nomurigha cheklimisiz érishish imkaniyitige ige bolghan, dep körsetken.

Netijide ademni chüchütküdek derijidiki mesiler bayqaghandin kéyin bu heqtiki doklatni qet'iy mexpiy tutush qarar qilin'ghan.

Xu'awéy shirkiti bu heqtiki xewerlerni inkar qilghan we öz xadimlirining her zaman shirket exlaqigha muxalip ish-heriketlerde bolup baqmighanliqini bildürgen.

Melum bolushiche, KPN shirkiti bu hadisidin kéyin öz téléfon liniyelirini asrash ishlirini bashqa yawropa shirketlirige höddige bérishke bashlighan.

Amérika hökümiti yillardin buyan bixeterlik mesilisini közde tutup xu'awéyning 5g intérnét üskünilirini ishlitishni chekligen idi.