Хуавей ширкитиниң голландийә янфон торидики сөһбәтләрни оғрилиқчә аңлиғанлиқи мәлум

Мухбиримиз мәмәтҗан җүмә
2021-04-18
Share
Хуавей ширкитиниң голландийә янфон торидики сөһбәтләрни оғрилиқчә аңлиғанлиқи мәлум Хитайниң хуавей ширкити голландийәниң KPN янфон торини тәқиб қилған.
Photo: RFA

Хитайниң хуавей ширкитиниң голландийә KPN янфон торини әркин тәқиб қилған вә униңдики барлиқ сөһбәтләрни оғрилиқчә аңлиған болуши мумкинлики мәлум болған.

"голландийә вақит гезити" ниң хәвәр қилишичә, бу һәқтики хәвәрни әң дәсләп голландийәдин чиқидиған "волкскран гезити" хәвәр қилған болуп, уларниң ейтишичә, мәзкур гезитиниң муһәррирлири 2010-йили хуавейниң KPN телефон торини суйиистемал қилғанлиқи һәққидики бир мәхпий доклатни көздин кәчүргән.

"волкскран гезити" доклаттин нәқил елип хәвәр қилишичә, әйни чағда хуавей ширкитиKPN янфон тори аботнлириниң, җүмлидин сабиқ баш вәзир җан питер балкененде вә хитай өктичилириниң телефонлирини оғрилиқчә аңлаш имканийитигә игә болған икән.

Униңдин башқа хуавей йәнә қайси номурларниң голландийә сақчилири вә җасуслуқ органлири тәрипидин тәқиб қилинғанлиқиниму толуқ билип туралиған болуши мумкин икән.

Мәлум болушичә, KPN янфон тори 2009-йилиға қәдәр хуавейниң янфон тор техникисини ишләткәндин башқа ширкәтниң гаага шәһиридики баш штабида 6 нәпәр хитай пуқрасини яллап ишләткән.

Бу һәқтики хәвәрләр оттуриға чиққандин кейин, KPN фирансийәниң капгемини ширкитини бу һәқтә тәкшүрүш елип беришқа яллиған. Униңдин башқа голландийәниң аивд ширкитиму KPN янфон ширкитини хуавейниң җасуслуқ һәрикәтлири үстидә агаһландурған икән.

Капгемини ширкити доклатида, KPN ширкитиниң баш штабида һәмдә хитайда ишләйдиған хуавей техник хадимлири KPN телефон торидики алақиләрни халиған вақитта тәқиб қилиш, һәр қандақ телефон номуриға чәклимисиз еришиш имканийитигә игә болған, дәп көрсәткән.

Нәтиҗидә адәмни чүчүткүдәк дәриҗидики мәсиләр байқағандин кейин бу һәқтики доклатни қәтий мәхпий тутуш қарар қилинған.

Хуавей ширкити бу һәқтики хәвәрләрни инкар қилған вә өз хадимлириниң һәр заман ширкәт әхлақиға мухалип иш-һәрикәтләрдә болуп бақмиғанлиқини билдүргән.

Мәлум болушичә, KPN ширкити бу һадисидин кейин өз телефон линийәлирини асраш ишлирини башқа явропа ширкәтлиригә һөддигә беришкә башлиған.

Америка һөкүмити йиллардин буян бихәтәрлик мәсилисини көздә тутуп хуавейниң 5г интернет үскүнилирини ишлитишни чәклигән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт