Японийәдә уйғурлар тоғрисида тунҗи қетим универсал рәсим көргәзмиси ечилди

Ихтиярий мухбиримиз әркин тарим
2020-12-14
Share
японийәдә уйғурлар тоғрисида тунҗи қетим универсал рәсим көргәзмиси ечилди Японийәниң канагава өлкисиниң зиши шәһәрлик мәдәнийәт мәркизи бинасида уйғурлар тоғрисида ечилған тунҗи қетим универсал рәсим көргәзмисидин көрүнүш. 2020-Йили 11-декабир.
RFA/Erkin Tarim

Японийәниң канагава өлкисиниң зиши шәһәрлик мәдәнийәт мәркизи бинасида тунҗи қетим уйғурлар тоғрисида универсал рәсим көргәзмиси өткүзүлгән.

Японийә уйғур җәмийити билән зиши шәһири йәрлик парламент әзалири бирликтә уюштурған мәзкур рәсим көргәзмиси 12-айниң 11-күнидин 13-күнигичә үч күн давамлашқан болуп, көргәзмигә уйғур тарихи, мәдәнийити, йәр асти вә йәр үсти байлиқлири, һазирқи еғир вәзийити әкс әттүрүлгән көп санда рәсим вә сүрәтләр қоюлған.

японийәниң канагава өлкисиниң зиши шәһәрлик мәдәнийәт мәркизи бинасида уйғурлар тоғрисида ечилған тунҗи қетим универсал рәсим көргәзмисидин көрүнүш. 2020-Йили 11-декабир.

Биз нәқ мәйданға телефон қилип, японийә уйғур җәмийити муавин рәиси әхмәт летип әпәнди вә японийә уйғур җәмийитиниң башқуруш һәйити әзаси халмәт розахун әпәнди билән сөһбәт өткүздуқ.

Әхмәт летип әпәнди буниң японийә уйғур җәмийити өткүзгән тунҗи қетимлиқ рәсим көргәзмиси икәнликини, уйғур мәсилисини японийә җамаәтчиликигә аңлитишни көп хиллаштуруш үчүн бундақ бир паалийәт уюштурғанлиқини ейтти.

Әхмәт летип әпәнди бу қетимқи көргәзмидә уйғурларниң тарихи, мәдәнийити, җуғрапийәси, байлиқ мәнбәлири вә талан-тараҗ қилиниш әһвали, йеқинқи заман тарихида уйғурларниң бешиға кәлгән паҗиәләр вә хитайниң бүгүн уйғурларға қарита елип бериватқан инсан қелипидин чиққан сиясәтлириниң җанлиқ һалда тонуштурулғанлиқини баян қилди.

Мәлум болушичә, японийәниң зиши шәһири токйоға йеқин бир шәһәр болуп, корона вирусиға қарши тәдбирләр давамлишиватқан бүгүнки күндә 3 күн давамлашқан бу көргәзмини көп санда киши екскурсийә қилип тәпсилий көргән. Улар сүрәтләр вә рәсимләрни көргәндин кейинки өзлириниң биваситә һес-туйғулирини баян қилишқан. японийә уйғур җәмийитиниң башқуруш һәйәт әзаси халмәт розахун әпәнди кишиләрниң көргәзмини көрүп бәкла тәсирләнгәнликини, һәр хил соалларни сориғанлиқини, уларниң уйғурларни қоллайдиғанлиқини ипадиләшкәнликини баян қилди.

Мәлум болушичә японийәдә чоң-кичик һәммә киши қизиқидиған, һәмдә дуняға әң зор тәсир көрсәткән мәдәнийәтләрдин бири картон мәдәнийити икән. Әхмәт летип әпәнди японийә уйғур җәмийитиниң японийәниң картон мәдәнийитидин пайдилинип, уйғур дәвасини тәсирлик қилип аңлитишқа тиришиватқанлиқини, бу көргәзмидиму бу васитидин актип пайдиланғанлиқини тәкитлиди.

Әхмәт летип әпәндиниң ейтишичә, җаза лагери шаһити меһригүл турсунниң сәргүзәштлири асасида йезилған картон китаби йеқинда японийәдә нәшр қилинған. У, биринчи қетим бесилғини қисқиғинә вақит ичидә түгәп, йеқинда иккинчи қетим нәшр қилинидиғанлиқини, японийәдики барлиқ башланғуч, оттура мәктәп вә толуқ оттура мәктәпләрниң кутупханилириға тарқитип беришни пиланлаватқанлиқини баян қилди.

Японийә уйғур җәмийити мәсуллириниң ейтишичә бу көргәзмә японийәниң башқа район вә шәһәрлиридиму өткүзүлидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт