Японийә баш вәзири риқабәтчиси кишида: хитайға тақабил туруш һөкүмитимиздики муһим хизмәт

Японийә баш вәзири риқабәтчиси фумио кишида әпәндим.

Нөвәттики японийә баш вәзири йошихиде суганиң вариси болмақчи болған фумио кишида әпәндим японийә-хитай мунасивәтлириниң униң һөкүмитидики әң муһим хизмәт болуп қалидиғанлиқини билдүргән.

“никкей асия” ториниң нәқил қилишичә, бу һәқтә тохталған суга әпәндим, бейҗиңниң дипломатик вә иқтисадий җәһәттики таҗавузчилиқ қилмишлиридин “чоңқур әндиккән” ликини билдүргән.

Хәвәрдә көрситишичә, кишида “никкей асия” гезитигә йеқинда қилған сөзидә мундақ дегән: “әркинлик, демократийә, қанун билән идарә қилиш вә кишилик һоқуқ қатарлиқ негизлик қиммәт қарашлирини қоғдаш үчүн, биз америка, явропа, һиндистан вә австралийә қатарлиқ қиммәт қариши охшаш дөләтләр билән һәмкарлишип, мустәбит түзүмгә қарши туримиз”

Нөвәттики японийә баш вәзири йошихиде суга 3-сентәбир елан қилған баянида өзиниң қайта сайламға қатнашмайдиғанлиқини җакарлиған. Униң вәзипә муддити бу йил 29-сентәбир аяғлишиду.

Сабиқ японийә баш вәзири шинзо абе өткән йили сентәбирдә саламәтлик мәсилиси түпәйли вәзиписидин истепа бәргәндин кейин, әркин демократлар партийәсидин болған йошихиде суга баш вәзирликни өткүзүвалған иди.

Суга қайта сайламға чүшмәйдиғанлиқини билдүргәндин кейин, һакимийәт бешидики әркин демократлар партийәсидин фумио кишида қатарлиқ төт нәпәр кандидат өзлирини намзатлиққа көрсәткән.

Суга шинзо абе дәвридә төт йерим йилдин артуқ ташқи ишлар вәзири болған болуп, нөвәттә у ташқи мунасивәт қатарлиқ саһәләрдики мол тәҗрибиси сәвәблик күчлүк намзатларниң бири, дәп қаралмақта икән.

У, иқтисадни асас қилип японийәниң җуғрапийәлик сиясий мәнпәәтини қоғдайдиғанлиқини билдүргән.

У йәнә, мудапиә мәсилисидиму тохталған вә дүшмәнниң башқурулидиған бомба базисиға зәрбә бериш һәмдә һуҗумниң алдини елиш иқтидариға игә болушниң муһимлиқини тәкитлигән.

Хәвәрдә нәқил қилишичә у мундақ дегән: “башқурулидиған бомбидин мудапиәлиниш системиси тунҗи һуҗумни тосиған тәқдирдиму, дүшмән базисиға һуҗум қилиш иқтидариға игә болуш кишиләрниң һаятини қоғдиялайду. Башқурулидиған бомба техникиси тез тәрәққий қиливатиду, мән амминиң һаяти вә турмушини қоғдаш һәққидики ашу реаллиқни асас қилип әтраплиқ мулаһизә йүргүзмәкчи.”

Японийә баш вәзир сайлими мушу айда өткүзүлиду.