Yaponiye bash weziri riqabetchisi kishida: xitaygha taqabil turush hökümitimizdiki muhim xizmet

Yaponiye bash weziri riqabetchisi fumi'o kishida ependim.

Nöwettiki yaponiye bash weziri yoshixidé suganing warisi bolmaqchi bolghan fumi'o kishida ependim yaponiye-xitay munasiwetlirining uning hökümitidiki eng muhim xizmet bolup qalidighanliqini bildürgen.

“Nikkéy asiya” torining neqil qilishiche, bu heqte toxtalghan suga ependim, béyjingning diplomatik we iqtisadiy jehettiki tajawuzchiliq qilmishliridin “Chongqur endikken” likini bildürgen.

Xewerde körsitishiche, kishida “Nikkéy asiya” gézitige yéqinda qilghan sözide mundaq dégen: “Erkinlik, démokratiye, qanun bilen idare qilish we kishilik hoquq qatarliq négizlik qimmet qarashlirini qoghdash üchün, biz amérika, yawropa, hindistan we awstraliye qatarliq qimmet qarishi oxshash döletler bilen hemkarliship, mustebit tüzümge qarshi turimiz”

Nöwettiki yaponiye bash weziri yoshixidé suga 3-séntebir élan qilghan bayanida özining qayta saylamgha qatnashmaydighanliqini jakarlighan. Uning wezipe mudditi bu yil 29-séntebir ayaghlishidu.

Sabiq yaponiye bash weziri shinzo abé ötken yili séntebirde salametlik mesilisi tüpeyli wezipisidin istépa bergendin kéyin, erkin démokratlar partiyesidin bolghan yoshixidé suga bash wezirlikni ötküzüwalghan idi.

Suga qayta saylamgha chüshmeydighanliqini bildürgendin kéyin, hakimiyet béshidiki erkin démokratlar partiyesidin fumi'o kishida qatarliq töt neper kandidat özlirini namzatliqqa körsetken.

Suga shinzo abé dewride töt yérim yildin artuq tashqi ishlar weziri bolghan bolup, nöwette u tashqi munasiwet qatarliq sahelerdiki mol tejribisi seweblik küchlük namzatlarning biri, dep qaralmaqta iken.

U, iqtisadni asas qilip yaponiyening jughrapiyelik siyasiy menpe'etini qoghdaydighanliqini bildürgen.

U yene, mudapi'e mesilisidimu toxtalghan we düshmenning bashqurulidighan bomba bazisigha zerbe bérish hemde hujumning aldini élish iqtidarigha ige bolushning muhimliqini tekitligen.

Xewerde neqil qilishiche u mundaq dégen: “Bashqurulidighan bombidin mudapi'elinish sistémisi tunji hujumni tosighan teqdirdimu, düshmen bazisigha hujum qilish iqtidarigha ige bolush kishilerning hayatini qoghdiyalaydu. Bashqurulidighan bomba téxnikisi téz tereqqiy qiliwatidu, men ammining hayati we turmushini qoghdash heqqidiki ashu ré'alliqni asas qilip etrapliq mulahize yürgüzmekchi.”

Yaponiye bash wezir saylimi mushu ayda ötküzülidu.