Yaponiye Uyghurliri bir qatar xeyrlik ishlarni qildi

Enqeredin ixtiyariy muxbirimiz erkin tarim teyyarlidi
2024.02.29
yaponiye-yer-tewresh-uyghur-yardem-1.jpg Ishikowa ölkisige bérip yer tewresh apitige uchrighan yaponlargha yardem bergen Uyghur pida'iylarning bir qismi. 2024-Yili 23-féwral, yaponiye.
RFA/Erkin Tarim

23-Féwral küni 20 etrapida Uyghur yer tewrigen ishikowa ölkisige bérip yer tewresh apitige uchrighan yaponlargha yardem bérip, yaponiye xelqining zor alqishigha érishken.

Bu yil 1-ayning 1-küni yaponiyening ishikowa ölkiside 7.6 Bal qattiq yer tewresh yüz bergen. Xewerlerde éytilishiche shu kündin tartip bügün'giche qalduq yer tewreshler 1680 qétimdin artuq dawam qilip, nahayiti éghir apetni keltürüp chiqarghan. Yaponiye Uyghur jem'iyiti re'isi exmet létip ependining bildürüshiche, mezkur yer tewresh apitide 240 tin artuq adem ölüp, 1300din artuq adem yaridar bolghan. 20 Mingdin artuq öy we imaret yérim weyranchiliqqa uchrighan. 23-Féwral küni 20 etrapida Uyghur yer tewrigen ölkige bérip yer tewresh apitige uchrighan yaponlargha yardem bérip, yapon xelqining alqishigha érishken.

Ishikowa ölkisige bérip yer tewresh apitige uchrighan yaponlargha yardem berdi we polu étip berdi. 2024-Yili 23-féwral, yaponiye.
Ishikowa ölkisige bérip yer tewresh apitige uchrighan yaponlargha yardem berdi we polu étip berdi. 2024-Yili 23-féwral, yaponiye.
RFA/Erkin Tarim

Téléfon ziyaritimizni qobul qilghan yaponiye Uyghur jem'iyitining re'isi exmet létip ependi 23-féwral küni élip barghan yardem pa'aliyiti toghrisida melumat bérip mundaq dédi: “Bu yil 1-ayning 1-küni yaponiyening ishikowa ölkiside 7.6 Bal qattiq yer tewresh yüz bergenidi. Bu apetning deslepki mezgilliride shu apet bolghan rayonning sirtidin yardemge adem qobul qilmighan. Yéqinda bashqa ölkilerdinmu yardemge adem qobul qilishni bashlidi. Shuning bilen biz yaponiye Uyghur jem'iyiti yaponiyediki Uyghur qérindashlardin bir guruppa ademni teshkillep 2-ayning 23-küni bu apet rayonida bir yürüsh pa'aliyetlerni élip barduq.”

Exmet létip ependi yer tewrigen ishikowa ölkisige barghan 20 etrapida Uyghurning 2 guruppigha bölünüp yardem xizmiti élip barghanliqini bildürdi. U, mundaq dédi: “2-Ayning 23-küni kechte tokyo we uning yéqinlirida turuwatqan Uyghurlardin 20 etrapida Uyghur qérindishimiz bir aptobusqa olturup, kéchilep yol méngip etisi küni 500 kilométir uzaqliqtiki apet rayonigha yétip barduq. Biz ikki guruppigha bölünüp bir guruppa Uyghur texminen 300 kishilik polu we shorpa teyyarlap apetke uchrighan we apettin qutquzushqa yardem bériwatqan ademlerge tarqattuq. Qalghan Uyghurlar örülgen öy-imaretlerningki exletlirini, buzulghan tamlarni bir terep qilishqa yardemleshtuq”.

Ishikowa ölkisige bérip yer tewresh apitige uchrighan yaponlargha yardem qilinmaqta. 2024-Yili 23-féwral, yaponiye.
Ishikowa ölkisige bérip yer tewresh apitige uchrighan yaponlargha yardem qilinmaqta. 2024-Yili 23-féwral, yaponiye.
RFA/Erkin Tarim

Uyghur doppilirini kiyip yer tewresh apitige uchrighan yaponlardin hal sorap, tamaq tarqatqan Uyghurlardin razi bolup, minnetdarliqini bildürüshken yaponlar, Uyghurlarni unutmaydighanliqini ipadileshken. Exmet létip ependi bu heqte melumat berdi. U, mundaq dédi: “Meyli shu Uyghur tamaqlirini yégen yaponlar bolsun, yaki biz emgeklirige yardemleshken öyning igiliri yaponlar bolsun, nahayiti xursen bolghanliqini, hayajanlan'ghanliqini, Uyghurlarning bu yaxshiliqlirini, bu yardemlirini untup qalmaydighanliqini, Uyghurlarni untup qalmaydighanliqini nahayiti hayajan bilen tilgha alghan boldi.”

Dunya Uyghur qurultiyining yaponiyediki wekili sawut memet ependi, yer tewrigen apet rayonida özlirining bügün xitayning irqiy qirghinchiliq apitige uchrawatqan Uyghurlar bolush süpiti bilen apetke uchrighan yaponlargha yardem bérish arqiliq, ulargha Uyghur millitini tonutqanliqini ilgiri sürdi.

Yaponiye Uyghur jem'iyiti yer tewrigen jaylargha yardem bérishtin bashqa yene 24-féwral küni 3-qétimliq “Méhri'ay erkin ana til mukapati” tarqitish murasimi ötküzgen.

Yaponiye Uyghur jem'iyiti yer tewrigen jaylargha yardem bérishtin bashqa yene 3-qétimliq “Méhri'ay erkin ana til mukapati” tarqitish murasimi ötküzgen. 2024-Yili 23-féwral, yaponiye.
Yaponiye Uyghur jem'iyiti yer tewrigen jaylargha yardem bérishtin bashqa yene 3-qétimliq “Méhri'ay erkin ana til mukapati” tarqitish murasimi ötküzgen. 2024-Yili 23-féwral, yaponiye.
RFA/Erkin Tarim

Exmet létip ependi bu yilqi mukapat tarqitish murasimigha yawropa döletliri we yaponiyedin köp sanda ana til oqutquchisi we oqughuchilirining ishtirak qilghanliqini, yaxshi ötkenlikini bildürdi. U, mundaq dédi: “Yaponiye Uyghur jem'iyiti méhri'ay erkin paji'esining untulup kétishining aldini élish hem mihri'ayning öz waqtida bizning perzentlirimizni Uyghur tilida oqutush üchün singdürgen ejrini we méhri'aygha oxshash minglighan, on minglighan mushundaq ana tilda terbiyelesh bilen shughullan'ghuchilarni eslesh we ana til ögetküchilerge ilham bérish nuqtisidin méhri'ay erkin ana til mukapatini tesis qilip, her yili 2-ayning 23-küni yeni méhri'ayning tughulghan küni buni tarqitip kéliwatqaniduq. Bu qétimqisida gollandiyedin, firansiyedin we yaponiyedin bolup, bir oqutquchi we ikki oqughuchi bu mukapatqa tallandi.”

“Méhri'ay erkin ana til mukapati” gha érishken ana til oqutquchisi raziye xanim mukapatning özige zor ilham béghishlighanliqini bayan qildi.

Xewerlerge asaslan'ghanda, yaponiyede ösümlük bi'o-téxnika kespi boyiche magistirliq unwani alghan méhri'ay erkin xanim yaponiyede oqush jeryanida ishtin sirt Uyghur tili oqutushi bilen shughullinip Uyghur perzentlirining söygüsi we ata-anilarning qollishigha érishken. Lékin u, xitay da'iriliri teripidin tutup kétip ghayib qiliwétilgen dadisini izdesh hem xitay da'irilirining anisigha özining qaytip kélishi toghrisida qilghan bésimi sewebidin 2019-yili 8-ayda yaponiyedin qaytip ketkendin kéyin lagérgha solan'ghan we lagérda qaza qilghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.