Yaponiyede ASICS ning “Shinjang paxtisi” ni ishlitishige qarshi namayish ötküzülgen

Yaponiyelik pa'aliyetchi uryu hirano xanim élan qilghan twittér uchurigha qarighanda, 29-awghust bir türküm yaponiyelik pa'aliyetchiler yaponiyediki dangliq marka “Az‍asikis” (ASICS) we olimpik komitétining “Shinjang paxtisi” ni ishlitishige qarshi namayish qilghan.

Uryu hirano twittér uchurida mundaq dégen: “Biz ‛az‍asikis‚ ning shinjang paxtisini dawamliq ishlitishige we olimpik komitétining olimpik tenheriketchiliri we pida'iylirini resmiy kiyim-kéchek bilen teminlesh üchün ‛az‍asikis‚ ni olimpik altun hemrahi qilip tallighanliqigha étiraz bildürimiz”

Twittér uchurigha qoshup chaplan'ghan resimge qarighanda, namayishchilar qollirida sherqiy türkistan bayraqlirini kötürüshken. Ular yene sherqiy türkistanning ay yultuzluq kök bayriqining renggide layihelen'gen bir plakatnimu namayishqa élip kelgen bolup, plakatqa “Shinjang paxtisini ishlitish toxtitilsun!” dégen sho'arlar yézilghan.

Uryu hirano twittér uchurda yene da'irilerni buninggha qarshi heriketke ötüshke chaqirghan we mundaq dégen: “Pat yéqinda konkrét jawabqa érishelmisek, biz téximu köp pa'aliyet qilimiz.”

Uryu hirano xanimning féysbuk bétige qarighanda, u kishilik hoquq pa'aliyetchisi, moda kiyim modéli iken. U ilgirimu Uyghurlarni qollash namayishlirigha köp qatnashqan we bu heqtiki resimlerni féysbukta köp qétim hembehirligen.

Uyghurlargha qaritilghan mejburiy emgek qilmishi seweblik xelq'ara jem'iyet Uyghur diyaridin chiqidighan paxta mehsulatlirini men'i qilishqa bashlighanidi.

Halbuki, yaponiyening dangliq tenheriket kiyimliri shirkiti- “Az‍asikis” ning xitay tarmiqi bu yil mart bayanat élan qilip, Uyghur diyaridin chiqidighan paxta mehsulatlirini ishlitishni dawam qilidighanliqi bildürgen we küchlük naraziliqlargha duch kelgen idi.