Uyghur yashlirini terbiyelesh kursida Uyghur mesilisini her sahege köplep anglitish kérekliki tekitlendi
11-12 -Mart künliri merkizi amérikadiki Uyghur herikiti teshkilatining uyushturushi bilen istanbulda Uyghur yashlirini yétishtürüsh kursi échildi.
-
Ixtiyariy muxbirimiz arslan
2023-03-15 -
-
-
Your browser doesn’t support HTML5 audio
11-12 -Mart künliri merkizi amérikadiki Uyghur herikiti teshkilatining uyushturushi bilen istanbulda Uyghur yashlirini yétishtürüsh kursi échildi.
Kursning échilish murasimida söz qilghan Uyghur herikiti teshkilatining re'isi roshen abbas xanim bu kursni uyushturushtiki meqsiti toghrisida toxtilip, buning Uyghur yashlirini xelq'aradiki kishilik hoquq we démokratiyege mensup bolghan xelq'araliq qorallar bilen qurallandurushqa tirishish shundaqla xelq'ara kishilik hoquq qanunlirigha tayinip weten, millet dewasining önümlük bolushigha hemdemde bolushtin ibaret ikenlikini bildürdi.
Roshen abbas xanim mundaq dédi: “Xelq'ara ehdinamilerde belgilen'gen kishilik hoquq we démokratiye qurallirini yaxshi igilep millitimizning ahu-zarini dunyagha anglitish, düshmenning zalimliqini düshmenning qandaq shekilde biz Uyghurlarning kelgüsini bughiwatqanliqini, Uyghurlargha qarshi irqiy qirghinchiliq we insaniyetke qarshi jinayet élip bériwatqan bir zalim düshmen bolupla qalmastin belkim pütün dunyadiki erkinlik, démokratiye we pütün dunyaning kelgüsi üchün xeterlik düshmen ikenlikini bildürüsh bizning burchimiz”.
Ikki kün dawam qilghan Uyghur yashlarni yétishtürüsh kursida, doktur es'et sulayman “Ötmüshtiki we bügünki untulghusiz sawaqlar, chaghdash Uyghur tarixidiki sel qaralghan terepler we paji'eler”, proféssor faruq shen “Uyghur qirghinchiliqi toghrisida, birleshken döletler teshkilatida téximu önümlük küresh usulliri”, proféssor doktur ala'iddin yalchin kaya “Xelq'arada Uyghur qirghinchiliqi diplomatiyesi” dégen témilarda léksiye sözlidi. Kursta 10 etrapida mutexesis léksiye berdi.
Biz bu yashlarni yétishtürüsh kursigha qatnashqan bir qisim yashlar bilen söhbet élip barduq. Ziyaritimizni qobul qilghan istanbul uniwéristéti til-edebiyat fakultétining magistir oqughuchisi serdar zagh'oghli bu kursqa qatniship eng paydilan'ghan terep bolsa Uyghur yashlar bilen tonushush bolghanliqini ipadilidi.
U, yene bu kursqa qatniship muhim bilim we chüshenchige ige bolghanliqini, bolupmu sherqiy türkistan dewasini qandaq qilghanda téximu tereqqiy qildurghili bolidighanliqi, ijtima'iy taratqulardin qandaq paydilinish, nishan'gha qandaq yétish, sherqiy türkistan dewasini xelqqe qaysi shekilde anglitish, hökümet organlirigha qandaq anglitish, qandaq qilghan waqitta dewani muweppeqiyetlik halda yuqiri pellige kötürüshke bolidighanliqi toghrisidiki söhbet we lékisiyelerdin önümlük paydilan'ghanliqini bildürdi.
Serdar zagh'oghlu bu kursqa qatnashqandin kéyin özining sherqiy türkistan dewasini téximu keng anglitish qarargha kelgenlikini, bolupmu türk yashlargha keng türde anglitip, ularni imza toplash dégendek her xil pa'aliyetlerge qatnashturup hemkarliqni qolgha keltürüsh we ularni dewa sépigha qoshush kéreklikini ipadilidi.
Biz yene bu kursqa qatnashqan istanbul tijaret uniwéristéti qanun fakultéti oqughuchisi istemiy xansadiq bilen söhbet élip barduq. Istemi xansadiq bu kurustin köp paydilan'ghanliqini, bu kursqa qatnashqandin kéyin sherqiy türkistan dewasi üchün xizmet qilishta özidiki kem dep qaralghan tereplerni toluqlash boldi dep hésaplghanliqini ipadilidi.
Istemi bu kursqa qatnashqandin kéyin kursta ögen'gen bilim chüshenchiliri boyiche, xitay zulumini türkiyede anglitish üchün Uyghur yashliri bilen birlikte, türk yashlarni teshkillep her xil pa'aliyetlerni élip bérishni oylishiwatqanliqini ipadilidi.