"Yawropa Uyghur ansambili" özining tunji nöwetlik konsértini muweppeqiyetlik körsetti

Muxbirimiz méhriban
2019-09-11
Élxet
Pikir
Share
Print
Shiwétsiyede tizimgha élinip qurulghan "Yawropa Uyghur ansambili" ning bir qisim ezaliri. 2019-Yili awghust.
Shiwétsiyede tizimgha élinip qurulghan "Yawropa Uyghur ansambili" ning bir qisim ezaliri. 2019-Yili awghust.
Mezkur ansambil ezaliridin Yashar Hemdulla ependi teminligen

Nöwette anglawatqininglar yawropaning shiwétsiye, gollandiye, firansiye, bélgiye, norwégiye qatarliq döletlerdiki 16 neper sen'etkarning özlükidin uyushushi bilen teshkillen'gen "Yawropa Uyghur ansambili" ning bélgiyening antwérpén shehiridiki konsértida orundalghan tunji nomur özhal muqamidin ariye.

Mezkur ömekning bélgiyediki tunji nöwetlik konsértini orunlashturush ishlirigha mes'ul bolghan ezher enwer ependining bildürüshiche, ular "Yawropa Uyghur ansambili" ni qurush teyyarliq xizmetlirini 2018-yilining béshida bashlighandin buyan, bir yildin artuq teyyarliq qilish, konsért nomurlirini békitish, herqaysi döletlerde tarqaq yashawatqan birqanche qétimliq bash qoshup japaliq meshiq qilish we axirqi bir heptide bélgiyede körüshüp japaliq teyyarliq qilish netijiside, 7-séntebir küni tunji nöwetlik konsértini muweppeqiyetlik halda, bélgiyening antwérpén shehiridiki li'ér sen'et merkizide tamashibinlargha namayan qilghan.

Dutar shahi namida elge tonulghan sen'etkar abduréhim héytning shagirti dutarchi muxter abdukérim janbaz mezkur ömekning bashliqi we gholluq ezaliridin biri.

Dutarchi muxter abdukérim janbaz ependi tunji nöwetlik konsértidin ilgiri we kéyin sehnide söz élip, nöwettiki Uyghur weziyiti we "Yawropa Uyghur ansambili" ning qurulush meqsiti heqqide toxtalghan.

U bayanida, xitay hökümiti Uyghurlargha qaratqan irqiy qirghinchiliq we medeniyet qirghinchiliqini eng yuqiri pellige kötürgen mushundaq bir weziyette, mezkur ömektikilerning uyushup, bügün tamashibinlargha Uyghur sen'et nomurlirini sunushining heqiqiy meqsitining éghir krizisqa duch kelgen Uyghurlarning milliy sen'itini ana yurttin yiraq bolghan yawropa tupriqida namayan qilish we uni rawajlandurush ikenlikini bildürgen.

Konsértta muxter abdukérim janbaz ependi orundighan abduréhim héytning "Uchrashqanda" namliq naxshisi tamashibinlarning zor alqishigha érishken nomurlarning biri bolghan.

Melum bolushiche konsért kéchilikide yene meshhur Uyghur muzikant we naxshichi merhum küresh küsenning "Atlanduq" namliq naxshisi orundalghanda, meydanda alqish sadaliri yuqiri pellige kötürülgen.

"Yawropa Uyghur ansambili" ning bélgiyediki konsértini körüsh üchün xongkongdin ayropilan béliti élip, 11 sa'etlik uzun musapini bésip kelgen tonulghan pa'aliyetchi jéssika in'gixam xanim öz tesiratini bayan qilip, özining Uyghur naxsha-muzikilirining hérismeni bolush süpiti bilen ilgiri Uyghur naxsha-muzikilirini köp qétim anglighan bolsimu, emma uzun yollarni bésip, bélgiyediki sen'et kulubida neq meydanda Uyghur naxsha-muzikilirini anglishining uningda Uyghur sen'itige bolghan ishtiyaqni téximu ulghaytqanliqini bildürdi.

Jéssika xanim yene xitay hökümiti milyonlighan Uyghurni lagérgha qamap, Uyghurlargha qarita medeniyet qirghinchiliqi élip bériwatqan bügünkidek éghir weziyette, yawropadiki Uyghur sen'etkarlirining özlükidin uyushup, özining shexsiy waqtini qurban qilish, japaliq meshiqler hésabigha mushundaq bir muweppeqiyetlik sen'et kéchilikini uyushturush rohidin Uyghurlardiki öz medeniyitini söyüsh, herqandaq bésimghimu tiz pükmes iradisini körgenlikini bildürdi. U yene buning özige oxshash xongkongda démokratiyeni qoghdash we xongkongluqlarning erkinliki üchün küresh qiliwatqan her bir insan'gha gheyret we ümid béghishlighanliqini bildürdi.

Ezher enwer ependining bildürüshiche, ularning bélgiyediki tunji meydan oyunini körüshke kelgen tamashibinlar ichide yawropadiki herqaysi döletlerdin kelgen Uyghur tamashibinlardin bashqa, yawropa elliridiki Uyghurlarni bilidighan bir qisim mutexessisler, pa'aliyetchiler hetta okyan atlap kelgen tamashibinlarning ularning konsértigha alqish yangritishi, konsérttin kéyin ulargha bergen yuqiri bahaliri ömek ezalirining japaliq ejrining harduqini chiqarghan.

Melum bolushiche, sen'etkarlar nesime erkin xanim we möminjan raxman ependiler mezkur ömekning bu nöwetlik oyunida rézhissorluq wezipisini üstige alghan.

Qazaqistandin kélip fransiyede olturaqliship qalghan nesime erkin xanim bir yilliq japaliq izdinish we teyyarliqlar arqiliq bu qétimliq konsértta Uyghur sen'itining güzellikini ipadileshte ünümi yaxshi bolidu dep qaralghan 17 nomurning tallap békitilgenlikini bildürdi. U bayanida axirqi bir heptide 16 kishining japaliq meshiq qilishi arqiliq, tallan'ghan nomurlarni yuqiri maharette sehnige élip chiqqanliqi üchün, konsértning tunji meydanidila tamashibinlarning alqishi we yuqiri bahasigha érishkenlikini bildürdi.

Melum bolushiche, "Yawropa Uyghur ansambili" ning tunji qétimliq konsérti 8-séntebir küni yene gollandiyening utrésxt shehiridiki xét wéldé wéstén tiyatir zalida körsitilgen bolup, 8-séntebir küni gollandiyediki bir qisim Uyghurlar we gollandiyediki yerlik ahaliler konsértni körgen.

Ziyaritimiz axirida nesime xanim yene, "Yawropa Uyghur ansambili" ning bu qétimqi tunji nöwetlik konsértining muweppeqiyiti ömektiki 16 neper sen'etkarning ortaq tirishchanliqining netijisi ikenlikini bildürdi.

U yene ömekning bundin kéyinki pilan-meqsetliri heqqidimu toxtilip, özlirining herqaysi döletlerde seyyare oyun quyush pa'aliyetlirini dawamliq uyushturush arqiliq Uyghur muzika-sen'itini namayan qilish we melum iqtisadiy meblegh toplash arqiliq muhajirettiki Uyghur yétim balilar hem iqtisadiy qiyinchiliqta qalghan oqughuchilargha yardem bérish qatarliq arzu-armanlirini ipadilidi.

Toluq bet