Yawropa parlaménti ezaliri yawropa-xitay meblegh sélish kélishimini buzushqa hazirlan'ghan

Yawropa parlaménti ezaliri Uyghur kishilik hoquq mesilisi seweblik yéqinda hazirlan'ghan yawropa-xitay meblegh sélish kélishimini buzushqa tereddut qilghan.

Irélandiyedin chiqidighan “Musteqilliq” gézitining xewer qilishiche, köpligen parlamént ezaliri mezkur kélishimni xitayda xongkong we Uyghurlargha qaritilghan basturush dawam qiliwatqan shara'itta aldirap-ténep tüzülgen kélishim, dep qaraydiken.

Yawropa birliki bilen xitay arisidiki meblegh sélish kélishimi 2020-yili dékabirda tüzülgen bolup, bu kélishim xelq'ara kishilik hoquq organliri jümlidin amérika we en'gliye qatarliq ellerning küchlük tenqidige uchrighan.

“Yéngi yawropa” torida bu heqte bérilgen bir parche mulahizide, kélishimning xitaydiki kishilik hoquq mesilisige orun bermigenliki, buning yawropa üchün bir balayi'apettin dérek béridighanliqi körsitilgen idi.

Yawropa parlaménti xelq'ara soda komitétida wezipe ötewatqan irélandiye wekili barry andréws xitay bilen bolghan mesililerning künséri küchiyiwatqanliqini éytqan.

U irélandiye “Musteqilliq” gézitige mundaq dégen: “Parlamént ichidiki bu kélishimge qarshi öktichiler künséri küchiyiwatidu. Bu, xongkong we Uyghurlarning mejburiy emgiki bilen munasiwetlik.”