Явропа иттипақи хитайни сөз-пикир әркинликигә һөрмәт қилишқа чақирди

Мухбиримиз мәмәтҗан җүмә
2021.04.04
Share on WhatsApp
Share on WhatsApp
явропа иттипақи хитайни сөз-пикир әркинликигә һөрмәт қилишқа чақирди Б б с ниң даңлиқ мухбири җон судворт уйғур елидики җаза лагери зияритидә. 2019-Йили 18-июн.
Social Media

Б б с ниң уйғурлар һәққидә дуняви тәсир қозғиған һөҗҗәтлик филимләрни ишлигән мухбири җон судворт хитайдин айрилишқа мәҗбурланғандин кейин, явропа иттипақи баянат елан қилип хитайни сөз-пикир әркинликигә һөрмәт қилишқа чақириди.

Өткән һәптә б б с ниң даңлиқ мухбири җон судворт хитайда һәр хил тәһдит вә тосалғуларға учрап, хитайда хизмитини нормал давамлаштурушқа амалсиз қалғанлиқтин, аилиси билән бирликтә тәйвәнгә көчүшкә мәҗбур болған иди.

Явропа иттипақиниң ташқи сиясәт рәиси җосеп боттеллниң баянатчиси җүмә күни бу һәқтә елан қилған баянатида мундақ деди: “явропа иттипақи хитайни дөләт вә хәлқара қанунлардики мәҗбурийитини ада қилишқа, хитай хәлқ җумһурийитиниң асасий қануни вә кишилик һоқуқ хитабнамисидә бәлгиләнгән сөз вә ахбарат әркинликигә капаләтлик қилишқа чақириду.”

Б б с мухбири җон судворт илгири уйғур елидики лагерлар, уларниң орунлири һәмдә лагерға бәнд қилинған бир қисим аилиләр һәққидә зор һәҗимлик бир тәкшүрүш хәвири ишлигән вә хитай йол қойған лагерларға берип хитай әмәлдарлиридин лагер һәққидә қаттиқ соалларни сориған.

У йәнә уйғур ели пахта санаити саһәсидики мәҗбурий әмгәк һәққидә зор һәҗимлик бир тәкшүрүш хәвири ишләп хәлқараниң диққитини бу саһәдә езиливатқан уйғурларға йәнә бир қетим тартқан.

У егири йәнә уйғур елидә завут қуруп, хитай билән нормал содисини давам қилип келиватқан германийә машинисазлиқ ширкити-волксвагенниң юқири дәриҗилик иҗраийә әмәлдарини уйғурлар вә лагерлар һәққидә пикир қилишқа мәҗбурлап зор инкас қозғиған.

Униңдин башқа б б с йеқиндин буян хитай уйғурларға қаратқан ирқий қирғинчилиқ сияситигә алақидар дәлил испатлиқ программиларни көпләп елан қилған. Нәтиҗидә хитай һөкүмити б б с ға қарита һуҗумлирини күчәйткән иди.

Явропа иттипақиниң билдүрүшичә, өткән йили хитай 18 нәпәр чәтәл мухбирини хитайдин қоғлап чиқарған икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.