Yawropa ittipaqi xitayni söz-pikir erkinlikige hörmet qilishqa chaqirdi

B b s ning Uyghurlar heqqide dunyawi tesir qozghighan höjjetlik filimlerni ishligen muxbiri jon sudwort xitaydin ayrilishqa mejburlan'ghandin kéyin, yawropa ittipaqi bayanat élan qilip xitayni söz-pikir erkinlikige hörmet qilishqa chaqiridi.

Ötken hepte b b s ning dangliq muxbiri jon sudwort xitayda her xil tehdit we tosalghulargha uchrap, xitayda xizmitini normal dawamlashturushqa amalsiz qalghanliqtin, a'ilisi bilen birlikte teywen'ge köchüshke mejbur bolghan idi.

Yawropa ittipaqining tashqi siyaset re'isi josép bottéllning bayanatchisi jüme küni bu heqte élan qilghan bayanatida mundaq dédi: “Yawropa ittipaqi xitayni dölet we xelq'ara qanunlardiki mejburiyitini ada qilishqa, xitay xelq jumhuriyitining asasiy qanuni we kishilik hoquq xitabnamiside belgilen'gen söz we axbarat erkinlikige kapaletlik qilishqa chaqiridu.”

B b s muxbiri jon sudwort ilgiri Uyghur élidiki lagérlar, ularning orunliri hemde lagérgha bend qilin'ghan bir qisim a'ililer heqqide zor hejimlik bir tekshürüsh xewiri ishligen we xitay yol qoyghan lagérlargha bérip xitay emeldarliridin lagér heqqide qattiq so'allarni sorighan.

U yene Uyghur éli paxta sana'iti sahesidiki mejburiy emgek heqqide zor hejimlik bir tekshürüsh xewiri ishlep xelq'araning diqqitini bu sahede éziliwatqan Uyghurlargha yene bir qétim tartqan.

U égiri yene Uyghur élide zawut qurup, xitay bilen normal sodisini dawam qilip kéliwatqan gérmaniye mashinisazliq shirkiti-wolkswagénning yuqiri derijilik ijra'iye emeldarini Uyghurlar we lagérlar heqqide pikir qilishqa mejburlap zor inkas qozghighan.

Uningdin bashqa b b s yéqindin buyan xitay Uyghurlargha qaratqan irqiy qirghinchiliq siyasitige alaqidar delil ispatliq programmilarni köplep élan qilghan. Netijide xitay hökümiti b b s gha qarita hujumlirini kücheytken idi.

Yawropa ittipaqining bildürüshiche, ötken yili xitay 18 neper chet'el muxbirini xitaydin qoghlap chiqarghan iken.