45 Yilliq türkiye puqrasi yehya qurban ayali bilen ghayib, türkiye qutuldurushqa charisiz

Muxbirimiz shöhret hoshur
2021-04-27
Share
45 Yilliq türkiye puqrasi yehya qurban ayali bilen ghayib, türkiye qutuldurushqa charisiz 45 Yilning aldida türkiyege wetendash, yeni puqra bolghan yehya qurban we uning türkiye puqrasi ayali amine qurban. 2016-Yili ürümchi.
Photo: RFA

Türkiyege besh yash waqtida kelgen we 45 yilning aldida wetendash, yeni puqra bolghan yehya qurban 2017-yili 9-ayning 10-küni ürümchide dukan échiwatqan mezgilide türkiye puqrasi ayali amine qurban bilen birlikte tutup kétilgen we ana yurti qaghiliqqa ekétilgen. Shuningdin étibaren, ularning türkiyediki 4 balisi bilen normal alaqisi üzülgen. Ularning chong qizi xanqiz qurban radiyomizgha yetküzgen uchurlargha asasen, muxbirimiz türkiyening béyjingdiki elchixanisi we qaghiliqtiki alaqidar orunlardin melumat sorighan bolsimu, yehya qurban we amine qurbanning ehwali yenila aydinglashmidi.

Hörmetlik radi'o anglighuchilar, melum bolushiche türkiye puqrasi yehya qurban 5 yash waqtida apisi we hedisi bilen birlikte qeshqer qaghiliqtin türkiyege köchüp kelgen. U 1989-yili 23 yashqa kirgende yurti qaghiliqqa bérip hazirqi ayali amine qurban bilen toy qilghan. Istanbulda 4 perzentlik bolghan bu er-ayal 2006-yili ürümchide yektash soda shirkiti qurup tijaret qilghan, 2011-yilidin bashlap ürümchi chongbazarda dukan achqan. U, 2017-yili 10‏-séntebir küni ayali bilen birlikte sewebsiz tutqun qilinip qaghiliq nahiyesige yötkep kétilgen. Ularning chong qizi xanqiz qurbanning radiyomizgha ashkarilishiche, ular tutqun qilinip 2 yilghiche, héchqandaq iz-dériki bolmighan. Xanqiz ata-anisining tutqun qilin'ghan künlerde ündidarda qaldurghan telipige bina'en ehwalni türkiye da'irilirige melum qilghan bolsimu, türkiyediki alaqidar organlar yehya qurban'gha oxshash qismettiki kishilerning köp ikenliki we bu heqte xitay tereptin ehwal sürüshte qiliwatqanliqini éytqan. Emma ehwali heqqide uchurgha érishelmigen.

45 Yilning aldida türkiyege wetendash, yeni puqra bolghan yehya qurban we uning türkiye puqrasi ayali amine qurbanning perzentliri. 2016-Yili, istanbul.

Biz bu heqte türkiyening béyjingdiki elchixanisigha téléfon qilduq. Biz ulardin yehya qurban bilen amine qurban heqqide némilerni bilidighanliqini soriduq. Téléfonimizni qobul qilghan xadim mes'ul xadimning ishxanida yoqluqini bildürüp, bu heqte élxet arqiliq melumat sorishimizni tewsiye qildi.

Xanqiz qurbanning déyishiche, ata-anisi iz-déreksiz ghayib bolup ikki yildin kéyin, dadisidin ushtumtut téléfon kelgen, u téléfonda özlirining néme üchün ikki yildin béri alaqe qilmighanliqini bildürüshning ornigha, qizigha qalaymiqan ishlargha arilashmasliq heqqide tenbih bergen. Ular yéqinqi ikki yilda her 2-3 ayda bir qétim téléfon qiliwatqan bolsimu, emma widiyoda körüshüshni ret qilghan we her qétimliq sözlishishi 3 minut etrapida dawam qilghan. Söhbet kütülgen mezmunda dawam qilmay qalsa téléfon üzüwétilgen. Bu ehwallargha asasen xanqiz qurban dadisining tutqunda ikenlikini perez qilghan.

Téléfonimizni qobul qilghan qaghiliq nahiye tashqi ishlar ishxanisining xadimi türkiye wetendishi yehya qurban we amine qurbanlar heqqide özlirining melumati yoqluqini éytti. Qaghiliq bazarliq saqchi xadimimu türkiye puqrasi yehya qurban we ayalining ehwalidin xewersizlikini éytti.

Xanqiz qurban ata-anisining ehwalini bildürüp, türkiyediki her derijilik alaqidar organlargha barghinida chongqur hésdashliqqa, qizghin mu'amilige érishken, biraq emeliy bir netijige érishelmigen. U alaqidar xadimlarning söz-ibare we tonliridin ularning charisizlikini bayqighan.

Ata-anisi bilen her qétimliq söhbitining sün'iy bir söhbet ikenlikini tilgha alghan xanqiz qurban, bu söhbetlerdin kéyin ata-anisini görüge élin'ghan halette tesewwur qilidighanliqini eskertti.

Déyilishiche, gerche xanqiz we 3 qérindishigha nöwette istanbuldiki taghisi qarawatqan bolsimu, yeni maddiy jehettin bir qiyinchiliqqa duch kelmigen bolsimu, emma ata-anisining ghayibliqi we türkiyege qaytip kélelmesliki, ularning turmush, öginish we rohiy keypiyatigha éghir tesir qilghan.

Xanqiz qurban deslepte ata-anisining uqushmastin tutulghanliq perizi bilen qoyup bérilishini kütkenliki, emdilikte xitayning peylini tonup yetkenliki we bu a'ile paji'esini dunyagha anglitish üchün resmiy heriketke ötkenlikini bayan qildi.

Hörmetlik radi'o anglighuchilar, yuqirida 45 yilliq türkiye wetendishi yehya qurban we ayalining 4 yildin buyan qaghiliqta tutup turuluwatqanliqi we a'ilisige qaytalmaywatqanliqi heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet