Tutqundiki türkiye puqrasi yehya qurban: pasportum tartiwélindi, nöwettiki dölet tewelikimni bilmeymen

• Muxbirimiz shöhret hoshur
  2021-05-17

Melum bolushiche, 4 yildin buyan dölitige qaytalmaywatqan türkiye puqrasi yehya qurban, bu yil roza héytning birinchi küni tunji qétim türkiyediki perzentliri bilen widyoluq körüshken. Saqchilarning nazariti astidiki bu körüshüshte yehya qurbanning chong qizi xanqiz qurban dadisidin uning türkiye puqraliqi salahiyitining inawetke élin'ghan-élinmaywatqanliqini sorighan. Buninggha éniq bir nerse déyelmeydighanliqini bildürgen yehya qurban türkiye pasportining 2017 ‏-yili tartiwélin'ghanliqi, qolida héchqandaq bir kimlik belgisi yoqluqi؛ qaghiliqta tughulghanliqi we nöwette shu yerde turuwatqanliqi üchün özini “Junggo wetendishi emes” mu déyelmeydighanliqini bildürgen.

Yehya qurbanning chong qizi xanqiz qurban, bu qétimqi körüshüshide, nuqtiliq halda dadisining qanuni salahiyiti, yeni özige jaza késilgen-késilmigenliki, bolupmu türkiye puqraliqi salahiyitining étibargha élin'ghan-élinmighanliqi heqqide melumat sorighan. Yehya qurban we amine qurban söhbet dawamida bezide gep yasap perzentlirige teselli berse, bezide gepning témisini yötkep, soralghan so'allargha udul we neq jawab bérishtin mumkin qeder özini qachurghan. Yehya yene gep arilirida kompartiyeni we xitay dölitini maxtaydighan sözlernimu qisturghan we özining erkin yashawatqanliqini bildürmekchi bolghan. Bu geplerdin saqchining ata-anisini nazaret qiliwatqanliqini bayqighan xanqiz qurban, so'allirining sheklini özgertip, ata-anisining heqiqiy ehwalini bilishke tirishqan. U dadisidin türkiye wetendashliqi salahiyitining étirap qilin'ghan-qilinmaywatqanliqini 4 ‏-qétim sorighinida, uning anisimu we dadisimu, oxshashla, bu heqte melumati yoqluqini éytqan. Xanqizning déyishiche, özlirining eslide türkiye wetendishi ikenliki, emma pasportining tartiwélin'ghanliqini tilgha alghan yehya qurban, yanlirida olturghan ikki nazaretchi xadimgha qariwetkendin kéyin, özining nöwette qaghiliqta turuwatqanliqi we qaghiliqta tughulghanliqi üchün özlirini “Junggo puqrasi emes” mu déyelmeydighanliqini éytqan.

Melum bolushiche, yehya qurban 2017 ‏-yili ürümchide tutulup qaghiliqqa ekétilgendin kéyin, türkiyediki perzentliri bilen ikki yilghiche alaqe qilmighan. 2019 ‏-Yilning axiridin bashlap, 2-3 ayda bir qétim, her qétimda 2-3 minutta téléfonda sözleshken. U qétimqi sözlishishlerde xanqiz qurban ata-anisining emeliy ehwali heqqide héchqandaq uchurgha érishelmigen, türkiyening béyjingdiki elchixanisi qatarliq alaqidar organliridinmu xanqiz qurban héchqandaq uchur alalmighandin kéyin ikki heptining aldida bu ehwalni radiyomiz arqiliq xelq'aragha ashkarilighanidi.

Didarlishish we dertlishishning parchilan'ghan mezkur a'ilisining mesililirini ongshiyalmaydighanliqi we jarahitini saqaytalmaydighanliqini eskertken xanqiz qurban, bedili néme bolsa-bolsun ata-anisi bilen jem bolmighuche öz a'ile paji'esini dunyagha yéyishtin toxtimaydighanliqini yene bir qétim tekitlidi.