Бақиркөй дохтурханисиниң ахбарат хадими: "йүсүпҗанниң әһвали яхшилинишқа қарап йүзләнди"

Мухбиримиз шөһрәт һошур
2020-11-04
Share
yusupjan-emet-dozturxanida.jpg Радийомиз зияритини қобул қилған вә өзиниң хитайниң сабиқ алаһидә хадими икәнликини илгири сүргән, һазир истанбулда қораллиқ һуҗумға учриған йүсүпҗан әмәт дохтурханида. 2020-Йили 2-ноябир, түркийә.
RFA/Shöhret Hoshur

Истанбулда қораллиқ һуҗумға учриған муһаҗир йүсүпҗан әмәтниң саламәтлик әһвалидики йүзлиниш һәққидә мухбиримиз бүгүн бақиркөй дохтурханисидин мәлумат сориди. Дохтурханиниң ахбарат баянатчиси йүсүпҗан әмәтниң саламәтлик әһвалиниң яхшилинишқа қарап йүзләнгәнлики, шуңа оператсийә болүмдин мулазимәт бөлүмигә йөткәлгәнликини баян қилди. Бүгүн йәнә вәқәниң бирдин-бир шаһити болған султанҗан мухбиримизниң зияритини қобул қилип, йүсүпҗанниң оқ тегип йәргә йиқилғандин кейинки тунҗи сөзиниң "вәқәни нәқ мәйдандин фейсбукқа тарқитиш вә хитайниң сүйқәстини паш қилиш" болғанлиқини тилға алди.

Биз истанбулда қораллиқ һуҗумиға учриған вә нөвәттә бақиркөй дөләт дохтурханисида давалиниватқан йүсүпҗан әмәтни 3-ноябир чүштин бурун, йәни вәқә йүз берип бирқанчә саәттин кейин дохтурханиниң җиддий қутқузуш бөлүмидә зиярәт қилған идуқ. Мәлум болушичә, сақчилар түнүгүн чүштин кейиндин башлап, йүсүпҗан әмәтни зиярәт қилиш вә йоқлашни бәлгилик дәриҗидә чәклигән. Шуңа биз бүгүн униң саламәтлик әһвалидики йүзлиниш һәққидә мәлумат елиш үчүн бақиркөй дохтурханисиға телефон қилдуқ. Телефонимизни қобул қилған хадим бу һәқтә дохтурханиниң ахбарат баянатчиси билән сөзлишишимизни тәвсийә қилди. Дохтурханиниң ахбарат баянатчиси йүсүпҗан әмәтниң оқтин зәхимләнгән бир яридар икәнликини әскәртип, бу һәқтә мәлуамат елиш үчүн алақидар һөкүмәт органлириға илтимас сунушимиз керәклики вә шулар рухсәт қилғандила, бу һәқтә мәлумат берәләйдиғанлиқини ейтти. Биз униңға йүсүпҗанниң әһвалиниң алаһидә икәнликини әскәртип, униңдин һеч болмиди дегәндә униң һаяти бихәтәрлик өткилидин өтүп болған яки болмиғанлиқи һәққидә мәлумат беришини соридуқ. У бу һәқтә 10 минуттин кейин җаваб берәләйдиғанлиқини ейтти. Қайта телефон қилғинимизда мәзкур баянатчи йүсүпҗан әмәтниң җиддий қутқузуш бөлүмидин нормал давалаш бөлүмигә чиққанлиқи, буни униң саламәтлик әһвалидики яхшинишқа қарап йүзлиниш дәп аташқа болидиғанлиқини баян қилди. Лекин у йүсүпҗанниң саламәтликиниң буниңдин кейин толуқ әслигә келиш яки келәлмәслик мәсилисигә һазирчә бир немә дейишниң техи балдур икәнликини әскәртти.

3-Ноябирдики ениқлашлиримиз давамида бу қораллиқ һуҗум вәқәсиниң йүсүпҗан әмәт бақиркөйдики бир достини зиярәт қилип барғанда йүз бәргәнлики мәлум болған иди. Биз бүгүн йүсүпҗанниң әнә шу вәқәәгә шаһит дости "султанҗан" ни зиярәт қилдуқ. Султанҗан вәқәниң баш-ахирини баян қилип өтти.

Мәлум болушичә, йүсүпҗан оқ тегип йәргә йиқилғандин кейин йенида пәйда болған дости султанҗанға нәқ мәйданни видейоға елиш вә уни фейсбукта тарқитишни буйруған. Лекин әйни чағда телефони ишлимигән, униң үстигә қанлиқ сорунни көрүп җиддийләшкән султанҗан нәқ мәйдандин хәвәр берилмигән, пәқәтла йүсүпҗанниң телефони арқилиқ нәқ мәйданни видейолуқ хатиригә алған.

Юқирида истанбулда қораллиқ һуҗумға учриған йүсүпҗан әмәтниң саламәтлик әһвали вә вәқәниң бир қисим нәқ мәйдан тәпсилати һәққидә мәлумат бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт