Yüsüpjan emetke süyqest qilghan ikki jinayetchi üstidin istanbulda sot échildi

• Ixtiyariy muxbirimiz arslan
  2021-06-02

Ötken yili 11-ayda istanbulning awjilar rayonida yüsüpjan emet isimlik Uyghur yashqa oq étip yarilandurghan ikki jinayetchi saqchilar teripidin qolgha chüshken bolup, bügün, yeni 2-iyun küni etigende ular üstidin istanbuldiki bakirköy edliye sot mehkimiside sot échildi.

Sot axirlashqandin kéyin bu qétimliq sot jeryani we bu délo toghrisida yüsüpjanning adwokati ilyas doghan bilen sherqiy türkistan kishilik hoquqni közitish jem'iyitining bash katipi nuridin izbasar ependi sot mehkimisi aldida muxbirlargha bayanat berdi we yüsüpjan délosi toghrisida toxtaldi.

Adwokat ilyas doghan ependi bu süyqestke adettiki bir weqe dep qarashqa bolmaydighanliqini tekitldi.

U mundaq dédi: “Yüsüpjan emetning süyqestke uchrighanliq délosi üstide ikkinchi qétimliq sot bolup, bu qétimliq sot bakirköy 3-derijilik jinayiti ishlar sot mehkimiside échildi. Biz bu sotta jinayetchilerni éghir jazalash bilen birge yüsüpjan emetni öyige teklip qilip uning tozaqqa chüshishide rol oynighan kishi üstidinmu erz sunduq. Sodiye bu erznamimizni qobul qildi. Bu toghrida mupettishler kéreklik tekshürüshlerni élip baridu. Sodiye yene bezi melumatlarning toluqlinishini telep qilip, yüsüpjan emetning özidin bayanat élish üchün doxturxanigha xet yazdi we sotni kéchikturdi. Kéler qétimliq sot 8-iyul küni échilidighan boldi. Yüsüpjan emet sotqa qatnishalmisa, sot mehkimisidin bir hey'et yüsüp emet dawaliniwatqan doxturxanigha bérip uningdin qayta bayanat almaqchi boldi.”

Bu déloni yéqindin küzitip kéliwatqan sherqiy türkistan kishilik hoquqni küzitish jem'iyitining bash katipi nuriddin izbasar ependi yüsüp emetke süyqest qilghan ikki neper jinayetchining sotqa tartilghanliqini, birsining ismi tural eliyof isimlik ezerbeyjanliq ikenlikini, yene birsining ismi ömer ishiq bolup, türkiye puqrasi ikenlikini bildürdi. U tural eliyof isimlik jinayetchining yüsüp emetke qaritip oq atqanliqi we ömer ishiqning qol téléfoni arqiliq neq meydanni widiyogha alghanliqini, andin neq meydan körünüshini bashqa birsige ewetkenlikini, bu pakitlarning saqchilarning uning qol téléfonini tekshürüshi netijisde ashkara bolghanliqini bildürdi.

Adwokat ilyas doghan ependi mundaq dédi: “Intayin éghir bir jinayet sadir boldi. Bir adem pütünley palech bir halgha kep qaldi. Bu nurmal bir weqe emes, bu intayin murekkep bir weqe. Bu weqeni sadir qilghuchi esli jinayetchiler kim bolushidin qet'iynezer, uni otturigha chiqirish üchün küresh qiliwatimiz. Bizning héch kim bilen düshmenlikimiz yoq, emma bu weqening kichikkine bir til-haqaret tüpeylidin bir insan'gha qural tenglep uni öltürüshke orunush bilen cheklinip qalmaydighanliqini pütkül awam bilishi kérek. Sot mehkimisi hey'itining pozitiyesimu intayin adaletlik we terepsiz boldi. Bu weqening arqa körünüshini we esli jinayetchilerni otturigha chiqirip, ularning tégishlik jazagha tartilishi üchün qolimizdin kelgenni qilimiz.”

Axbarat élan qilish yighinida söz qilghan sherqiy türkistan kishilik hoquqni küzitish jem'yiti'ining bash katipi nurddin izbasar ependi bu délo toghrisida toxtilip mundaq dédi: “Biz sherqiy türkistanliq bolush süpitimiz bilen hazir tutup turuliwatqan jinayetchilerningla jazagha tartilishini emes, belki bu weqening arqisida kim bolsa bolsun, ularning türkiye adaliti aldida we dunya jama'itining nezeride hésab bérishini we adil bir shekilde jazagha tartilishini telep qilimiz.”

Nuriddin izbasar yene xitayning enqerediki bash elchisi we istanbuldiki bash konsoligha xitap qilip, mundaq dédi: “Bu yerde turup xitayning enqerediki elchixansi we istanbuldiki konsolxanisidin shuni soraymizki, bu ishni siler qildinglarmu-yoq? yüsüpjan'gha néme üchün oq étildi? bu heqte silerdin chüshenche bérilishini telep qilimiz. Bu délo adil bir shekilde hel bolmighiche, biz türkiye we chet ellerdiki pütkül sherqiy türkistanliqlar bu ishning aqiwitini bosh quyuwetmeymiz. Türkiye adwokatliri we heq-hoquq dawachilirining bu délogha jiddiy qarishini we türkiye sodiye we mupettishliriningmu bu déloni qanun'gha asaslan'ghan halda adilliq bilen hel qilishini telep qilimiz.”

Nuriddin izbasarning bildürüshiche, qolgha élin'ghan jinayetchiler sotta bu déloni addiylashturup, özlirining shexsiy adawiti tüpeyli sadir qilghanliqini otturigha qoyup, perde arqisidiki esli jinayetchilerni yoshurmaqchi bolghan. Sodiyeler ularning bu bayanlirigha qana'et qilmighanliqi üchün sotni kéchiktürüshni qarar qilghan iken.

Yüsüpjan emet 2020-yili 2-noyabir istanbul waqti kech sa'et 11 etrapida namelum kishilerning qoralliq hujumigha uchrap éghir yarilan'ghan idi. Yüsüpjan emet hujumgha uchrashtin ilgiri “El-jezire” qatarliq xelq'araliq axbarat wasitilirigha bayanat bérip, özining burun xitay jasusluq organliri üchün xizmet qilishqa mejburlan'ghanliqini ashkarilighan. U yene bu seweblik özining xitay dölet xewpsizliki organlirining tehditige uchrap kelgenlikini axbaratqa pash qilghan. Shu qétimliq qoralliq hujumda yüsüpjan emetning qoligha we dolisgha oq tegken. Buning netijiside u öre yürelmeydighan, put-quli ishlimeydighan halgha kélip qalghan. U hazirmu istanbuldiki melum bir doxturxanida dawalanmaqta.