Доктор адриян зенз германийәдики уйғур җамаити тәрипидин қизғин алқишланди

Ихтиярий мухбиримиз әкрәм
2022.06.21
Share on WhatsApp
Share on WhatsApp
adrian-zenz-germaniye-uyghur-1.jpg Д у қ ниң орунлаштуруши билән германийәдики уйғурлар җаза лагерлири тәтқиқатчиси адриян зенз (Adrian Zenz)ни қизғин күтүвалди. 2022-Йили 19-июн, германийә.
RFA/Ekrem

Хитайниң җаза лагерлирини дуняға тонутушта зор төһпә яратқан тәтқиқатчи адриян зенз германийәдики уйғур җамаити тәрипидин күтүвелинди.

19-Июн күни мәркизи мюнхен шәһиридә болған д у қ тәрипидин җаза лагерлири тәтқиқатчиси адриян зензни күтүвелиш вә мюнхендики уйғур җамаитигә қурултай тәрипидин рәһмәтлирини изһар қилиш паалийити уюштурулди. Мюнхен шәһәр мәркизигә җайлашқан “қәшқәр ресторани” ға орунлаштурулған бу паалийәткә мюнхендики көплигән уйғур әр-аяллар тәклип қилинғандин сирт, хитайниң җаза лагерлирини дуняға тонутушта зор төһпә яратқан тәтқиқатчи адриян зенз, бәзи дөләтләрниң дипломатлири вә кишилик һоқуқ паалийәтчилириму тәклип қилинғаниди. Һазир америкадики коммунизм қурбанлири фонди җәмийитидә хитайниң җаза лагерлирини тәтқиқ қилиш ишлири билән мәшғул болуватқан адриян зенз әпәнди бу сорунға ханимини һәм 3 пәрзәнтини биргә елип кәлгәниди. Уйғур җамаити меһманлирини гүлдүрас алқиш садалири ичидә күтүвалди, сорун наһайити көңүллүк бир кәйпият ичидә давам қилди.

Җаза лагерлири тәтқиқатчиси адриян зенз (Adrian Zenz)ни күтүвелиш вә мюнхен уйғур җамаитигә қурултай тәрипидин рәһмәтлирини изһар қилиш паалийитидә д у қ рәиси долқун әйса әпәнди сөзлимәктә. 2022-Йили 19-июн, германийә.
Җаза лагерлири тәтқиқатчиси адриян зенз (Adrian Zenz)ни күтүвелиш вә мюнхен уйғур җамаитигә қурултай тәрипидин рәһмәтлирини изһар қилиш паалийитидә д у қ рәиси долқун әйса әпәнди сөзлимәктә. 2022-Йили 19-июн, германийә.
RFA/Ekrem

Алди билән д у қ рәиси долқун әйса әпәнди сөз елип, адриян зензниң ахирқи 4-5 йилдин буян хитайниң җаза лагерлириға даир көплигән җинайәтлиригә мунасивәтлик тәтқиқат нәтиҗилирини елан қилип дуняда зор ғулғула қозғиғанлиқини вә бу сәвәбтин хитайниң көзигә миғ болуп қадалғанлиқини, униң ахирқи қетим елан қилған “шинҗаң сақчи һөҗҗәтлири” архипиниң һәтта явропа иттипақиниң уйғур ирқий қирғинчилиқи тоғрисида алдинқи һәптә қарар қобул қилишиға түрткә болғанлиқини тәкитләп өткәндин кейин, бүгүнки сорунниң адриян зензниң уйғурлар үчүн қилған бу хизмәтлиригә рәһмәт ейтиш йүзисидин орунлаштурулғанлиқини, шуниң билән биргә мюнхендики уйғур җамаитиниң 2-нөвәтлик миллий кеңәш йиғини үчүн қошқан төһпилиригә қурултай намидин тәшәккүрлирини изһар қилиш түпәйлидин уюштурулғанлиқини тәкитләп өтти һәмдә доктур адриян зензға ләвһә тәқдим қилди. Мюнхендики “меһрибан анилар тәшкилати” дәп атилидиған уйғур мәдәнийәт-маарип бирлики тәшкилати болса адриян зензниң ханимиға әтләс шарпа тәқдим қилип, уйғурларниң көңлини изһар қилған болди.

Д у қ рәиси долқун әйса әпәнди бу мунасивәт билән зияритимизни қобул қилғанда, нөвәттә уйғурларниң бешиға келиватқан еғир паҗиәләрни дуня җамаитигә билдүрүш йолида әҗир сәрп қиливатқан кишиләргә илһам бериш вә милләт намидин миннәтдарлиқ билдүрүшниң зөрүрлүкини тилға алди. Д у қ иҗраийә комитетиниң муавин рәиси турғунҗан алавудин әпәнди болса, адриян зензниң уйғурларниң қәлб төридин орун алған бир кишигә айланғанлиқини, униң “уйғур сот коллегийәси” ни қиммәтлик һөҗҗәтләр билән тәминлигән бир шәхс икәнликини әскәртти.

Д у қ ниң орунлаштуруши билән германийәдики уйғурлар җаза лагерлири тәтқиқатчиси адриян зенз (Adrian Zenz)ни қизғин күтүвалди. 2022-Йили 19-июн, германийә.

“қәшқәр ресторани” дики сорун әһли доктур адриян зензға уйғурлар үчүн қилған хизмәтлиригә рәһмәт ейтиш билән биргә, униңдин түрлүк соалларни сорашти. Бу соалларниң бири “сиз қандақ болуп уйғурларниң хизмитини қилиш йолини таллап қалдиңиз?” дегәндин ибарәт болди. Адриян зенз өзиниң германийәдики туғулуп чоң болғанлиқини, бунчә көп уйғурларниң германийәни вәтән тутуп яшаватқанлиқидин өзиниң иптихарлиқ һес қилидиғанлиқини, өзиниң әскәрликкә қатнашқандин тартип тәтқиқат ишлириға киришкичә болған һаят мусаписини, һазир хизмәт мунасивити билән 3 пәрзәнти вә аялиға һәмраһ болуп америкида яшаватқанлиқини әскәртип өткәндин кейин мундақ деди: “мән етиқадлиқ бир адәм болғанлиқим үчүн, яратқучимиз тәрипидин гоя ‛һәқсизлиққа учраватқан хәлқләр тәрәптә тур, улар үчүн бир иш қил‚ дегән вәһийгә еришкәндәк туйғуда яшайттим. Дәсләпки мәзгиллиримдә тибәтликләрниң паҗиәлиригә көңүл бөлгәнидим. Кейинчә уйғурлар үстидики зулумниң техиму еғирлиқини һес қилип, диққитимни уйғурлар мәсилисигә мәркәзләштүрдүм. Һазир асаслиқи җаза лагерлири тәтқиқати билән шуғуллиниватимән”.

“қандақ қилғанда, техиму көп тәтқиқатчиларни җаза лагерлири мәсилисигә җәлп қилғили болиду?” дегән соалға адриян зенз мундақ җаваб бәрди: “явропада тәтқиқатчилар һәқиқәтәнму көп, болупму хитайни вә хитай мәсилирини тәтқиқ қилидиғанлар. Бирақ уйғурлар мәсилисидин ибарәт бундақ назук темиларға дуч кәлгәндә улар җим турувалиду. Чүнки, бу хәтири бар иш. Бундақ хәтәрлик хизмәтләргә күчлүк етиқад роһи болған, хәтәрдин қорқмайдиған адәмләр тәвәккүл қилалайду”.

Сорунда соал-җаваблар давам қилип турди, дастиханға чөчүрә, полу дегәндәк уйғурчә таамлар тартилди. Меһманлар йемәкликләргә еғиз тәгкәч адриян зенз билән қизғин сөһбәтләрни елип барди. Д у қ муавин рәиси пәрһат муһәммиди әпәнди бу һәқтә тохталғанда, адриян зензниң уйғурлар үчүн қилған хизмити сәвәблик хитайниң җазасиға дуч кәлгән бир киши болғанлиқини, униң тунҗи қетим д у қ баш штабиға келип қурултай рәһбәрлири билән учрашқанлиқини һәмдә мюнхендики уйғур җамаити билән дидар көрүшкән бу сорунниң яхши сөһбәтләр билән толған бир хатирә болуп қалғанлиқини әскәртти. Сорун хатимисидә, уйғур җамаити доктур адриян зенз билән хатирә сүрәтләргә чүшүшти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт