Зиннәтгүл турсунниң хитайға қайтурулғанлиқи униң ғулҗидики аилиси тәрипидин дәлилләнди

Мухбиримиз әркин
2019-08-14
Елхәт
Пикир
Share
Принт
Зиннәтгүл турсунниң түркийәдә турушлуқ иқамәт кинишкиси вә икки пәрзәнти.
Зиннәтгүл турсунниң түркийәдә турушлуқ иқамәт кинишкиси вә икки пәрзәнти.
Social Media

Түркийә көчмәнләр идарисиниң бу йил 6-айниң ахирлирида измирдики бир мусапирларни қайтуруш мәркизидә тутуп турулуватқан зиннәтгүл турсун исимлик уйғур аял вә униң икки балисиниң қалған 5 нәпәр уйғур билән таҗикистан арқилиқ хитайға қайтурулғанлиқи һәққидики хәвәр чәтәлдики уйғурлар ичидә қаттиқ ғулғула қозғиған. Түркийә һөкүмити зиннәтгүл исимлик бирсиниң таҗикистанға қайтурулғанлиқини рәт қилған болсиму, әмма униң сәуди әрәбистанда турушлуқ һәдиси зиннәтгүлниң икки балисиниң ғулҗиға елип келинип, униң ғулҗидики анисиниң беқишиға берилгәнликини илгири сүргән иди.

Буниңға қарита түркийә көчмәнләр идариси баянат елан қилип, таҗикистанға қайтурулған аялниң зиннәтгүл турсун әмәслики, униң өзини зиннәт турсун дәвалған рәхимә әхмәтова исимлик таҗик пуқраси вә униң икки балиси икәнликини илгири сүргән. Бу вәқә түркийәниң уйғур мусапирлар үчүн қанчилик бихәтәр җай икәнлики зор соал пәйда қилған иди. Чәтәл таратқулирида түркийәдики уйғур мусапирлириниң қолиға таҗикистан яки оттура асиядики башқа бир дөләтниң паспорти тутқузулуп, шу дөләт арқилиқ хитайға қайтурулуш әндишиси ичидә яшаватқанлиқи һәққидә хәвәрләр берилгән иди. 

Биз 13‏-авғуст күни зиннәтгүл вә униң билән биллә қайтурулған қалған 5 нәпәр уйғурниң кимлики вә ақивитини ениқлаш җәрянида зиннәтгүл вә униң балисиниң хитайға қайтурулғанлиқиға даир йеңи дәлилләргә ериштуқ. Зиннәтгүлниң ғулҗиға қарашлиқ сүйдөң базирида олтурушлуқ аниси рошәнгүл ясин мухбиримизға зиннәтгүлниң қайтуруп келингәнлики, униң 4 яшлиқ қизи сәһинур билән бир йерим яшлиқ кичик қизи сәбиһәниң униң беқишиға берилгәнликини билдүрди. Униң ашкарилишичә, даириләр зиннәтгүлниң ақивити һәққидә һечқандақ учур бәрмигән. 

Рошәнгүл ясин: «балилирини мән беқиватимән. яқ, қизим билән көрүшмидим. Улар келип немә дәйдикин, дәп шу йәрдин чақирмиғучә тәләп қилмидим. Йәрлик сақчи орунлири келип көрүшти. Лекин (қизимниң) нәдә туруватқанлиқини демиди. Икки балини қанчинчи чесла әкәлгини таза есимдә йоқ. Мениңму таза өзүмниң миҗәзим йоқ. Қачан әкелип бәрдикин, әмди партийәгә рәһмәт ейтимән, икки нәврәмни әкелип бәрди, қизимни әкәлди. 

Мухбир: балиларниң әһвали қандақ икән? 

Рошәнгүл ясин: «яхши һазир, дадүйниң апирип давалитип, нәвриләр шундақ яхши. Җараһәт чиқип кетиптикән, мушу дадүйниң давалитип, кетип баримәнғу, икки нәврәм билән. Шу қизим аман болса баллирини өзи бақса, шуни тиләп олтурдумғу. 

Қалған балилириңизчу, уларниң әһвали қандақ? 

Рошәнгүл ясин: бир оғлум мәктәптә шу. Бир оғлум барди шу. 31, 32 гә кирдимму ишқилип, шу қизниң чоңи иди. Өйләнмигән техи, оғлумниму шу йәрдә тәрбийиләп һазир яхши адәм болуп, көрүп туруватимиз. Байрамлиқ көрүштуқ. 15 Күндә бир көрүшүватимиз. Партийәгә рәһмәт дәймән. Һазир шундақ яхши балам. Тамақлириму яхшикән. Ағрип қаптикән давалитиветипту. Мушу (сүйдөңдики) май искилат тәрәптә туруватиду. Мениң икки қизим бир оғлум бар иди. 

Мухбир: зиннәтгүл қайтуруп келингәндә йәрлик органлар бир нәрсә демидиму сизгә, нәдә икәнлики һәққидә? 

Рошәнгүл: дадүйдикиләр келип хәвәр йәткүзүп қилди. Қизиңизни әкәлдуқ, балиларниң миҗәзи йоқ деди. Лекин нәдә икәнликини уқмаймән. Балиларни давалатқили әкәлдуқ, деди. Әмма зиннәтгүлниң гепини қилмиди. Нәдиликини билмәймән. Әң яхшиси балиларни маңа тинч аман тапшурди. Мениң өзүмниң таза миҗәзим йоқ, немә болдумки, йүриким таза яхши әмәсму, билмәймән. Балилардин ешиналмай дохтурғиму тәкшүртәлмидим. Балиларниң чоңи 4 кә кирипту, кичики техи бир йерим яштакәнғу. 

Нөвәттә зиннәтгүл турсунниң мәзкур аилидики бирдин бир тутқун әмәслики илгири сүрүлмәктә. Қәйт қилинишичә, униң сүйдөң базирида олтурушлуқ аз дегәндә 10 дәк аилә әзаси вә уруқ-туғқанлириниң лагерға елип кетилгән яки қамақ җазалириға һөкүм қилинған. Зиннәтгүл турсунниң сәуди әрәбистанда турушлуқ һәдиси җәннәтгүл турсун 13‏-авғуст күни зияритимизни қобул қилип, уларниң аилә әзалириниң ичидә әр киши қалмиғанлиқини билдүрди. 

Радиомиз мәзкур вәқәни ениқлаш җәрянида шу қетим таҗикистанға қайтурулғанларниң ялғуз зиннәтгүл әмәслики, униң билән биргә йәнә 5 уйғурниң қайтурулғанлиқиға даир учурларға еришкән. Бу 5 кишиниң бир нәпириниң әркәк, 4 нәпириниң аял икәнлики илгири сүрүлгән. Радиомиз уларниң ичидики қуванхан һәмзә исимлик қәшқәр йәркәнтлик аялниң салаһийитини ениқлап чиққан. Қуванхан һәмзиниң түркийәдики оғли анисиниң таҗикистанға елип кетилгәнликини дәлиллигән. Лекин уларниң таҗикистанға барғандин кейинки ақивитини дәлиллийәлмигән иди.

Пикирләр (0)
Share
Толуқ бәт