សម្ភាសស្ថាបត្យករទាក់ទងនឹងការដាក់អំពូលភ្លើងជាប់ជញ្ជាំងប្រាសាទអង្គរវត្ត
ដោយ ហ៊ុយ វណ្ណៈ
2009-05-27
ស្ថាបត្យករខ្មែរមួយរូបបានថ្លែងថា ការអនុញ្ញាតឲ្យដាក់ភ្លើងហ្វាអគ្គិសនីនៅឯថែវប្រាសាទអង្គរវត្តថ្មីៗនេះ គឺនឹងឈានដល់ការបំផ្លាញប្រាសាទអង្គរវត្ត ដែលជាកេរមរតកដ៏អស្ចារ្យនិងមិនអាចកាត់ថ្លៃបានរបស់កម្ពុជា។
អំពូលភ្លើងដែលដាក់ភ្ជាប់នៅនឹងជញ្ជាំងប្រាសាទអង្គរវត្ត។
លោក ហ៊ុយ វណ្ណៈ បានធ្វើកិច្ចសម្ភាសន៍មួយរវាងស្ថាបត្យករខ្មែរ គឺលោក ភួន ភូម៉ូនីរតន៍ ទាក់ទងនឹងបញ្ហាខាងលើ ដែលមានខ្លឹមសារទាំងស្រុងដូចខាងក្រោមនេះ ៖
ហ៊ុយ វណ្ណៈ ៖ បាទ! ដូចលោកបានជ្រាបហើយ មានព័ត៌មានផ្សាយទាក់ទិនទៅនឹងការតាំងលម្អភ្លើងនៅឯជញ្ជាំងប្រាសាទអង្គរវត្ត នៅឯទឹកដីខេត្តសៀមរាប។ តើលោកមើលឃើញថាការតាក់តែងនេះ បើតាមលក្ខណៈស្ថាបត្យកម្ម ឬក៏រូបវិទ្យាអីហ្នឹង តើវាត្រឹមត្រូវតាមក្បួនខ្នាតដែរ ឬ ទេ?
ភួន ភូម៉ូនីរតន៍ ៖ ចំពោះយោបល់ខ្ញុំជាស្ថាបត្យករម្នាក់ ប្រាសាទអង្គរវត្តគឺសាងសង់យូរលង់មកហើយ ហើយរហូតមកដល់បច្ចុប្បន្ននេះ សតវត្សរ៍ទី២១ ហើយ អ៊ីចឹងពេលវេលាដែលយើងគិតទៅជាឆ្នាំ សឹងតែ ១ពាន់ឆ្នាំទៅហើយ។ ហើយប្រាសាទអង្គរវត្តនេះ ត្រូវបានគេចាត់ទុកជាអច្ឆរិយវត្ថុទី៧ នៃលោក ហើយដោយមិនបានគិតថា អង្គរហ្នឹងមិនបានភ្លើងបំភ្លឺលម្អឲ្យទៅជាលក្ខណៈទាន់សម័យនិយមនៃការបំភ្លឺភ្លើងទេ អ៊ីចឹងទោះជាមិនដាក់ក៏មិនចំណោទអីចាំបាច់ដែលត្រូវបច្ចុប្បន្ននេះត្រូវដាក់ដែរ ព្រោះអ្វីដែលយើងមាននោះ គឺមានគ្រប់គ្រាន់ទៅហើយ។
ហើយការដាក់បំភ្លឺភ្លើងនៅជញ្ជាំងប្រាសាទ ចំពោះខ្ញុំ ខ្ញុំថាមិនគួរចាំបាច់នឹងដាក់ ហើយខ្ញុំគិតថា បើសិនជាការដាក់ហ្នឹងគ្រាន់តែជាការលម្អភ្នែក។ ខ្ញុំគិតថាដូចជាមិនជាការចាំបាច់ ព្រោះដាក់ហ្នឹងវាអាចប៉ះពាល់ទៅដល់ជញ្ជាំងនៃថ្មប្រាសាទ ហើយលក្ខណៈជាបច្ចេកទេស មើលទៅដូចជាមិនមានតម្លៃយកទៅដាក់លើជញ្ជាំងថ្មដែលមានតម្លៃ។ ហើយអំពួលហ្វាហ្នឹង គិតទៅអំពូលមួយហ្នឹង គុណនឹងមួយពាន់ដងនៃតម្លៃអំពូលហ្នឹងមិនស្មើនឹងថ្មម្ដុំដែលបែកធ្លាក់មកនៃប្រាសាទអង្គរវត្តទេ។
ការដែលដាក់បំពាក់ដោយខ្សែរត់ ហើយការយកឈើទៅដាប់ចោះ មើលទៅមិនជាលក្ខណៈគយគន់ឲ្យគួរនឹងដាក់។ ហើយខ្ញុំគិតថា ការដាក់ហ្នឹងអាចធ្វើឲ្យប៉ះពាល់ទៅដល់អារម្មណ៍នៃអ្នកទេសចរទៅវិញ។ ពេលដែលពេលថ្ងៃគាត់មកឃើញខ្សែរត់អត់របៀប។ ហើយអំពូលហ្នឹងចាប់ដាក់តាមផ្លូវ សួនច្បារ ទីកន្លែងកម្សាន្តបាន។ លក្ខណៈនៃការផលិតអំពូលវាមិនផលិតទៅតាមកន្លែងដែលប្រើប្រាស់។
ហ៊ុយ វណ្ណៈ ៖ មានន័យថា អំពូលភ្លើងទាំងអស់ហ្នឹងមិនបានផលិតក្នុងគោលដៅនៃការដាក់ប្រាសាទទេ មានន័យអ៊ីចឹងឬ? ភួន ភូម៉ូនីរតន៍ ៖ បាទៗ។
ហ៊ុយ វណ្ណៈ ៖ ឥឡូវខ្ញុំចង់បញ្ជាក់អំពីលក្ខណៈរូបវិទ្យា ការដាក់ភ្លើងហ្វាបញ្ចាំងទៅថ្មអ៊ីចឹង ថាតើវាប្រតិកម្មរវាងភ្លើងនិងថ្មហ្នឹង វាអាចមានបញ្ហាអីដែរ ឬទេ?
ភួន ភូម៉ូនីរតន៍ ៖ តាមដែលខ្ញុំធ្លាប់បានសិក្សាទាក់ទងនឹងការថែទាំនិងជួសជុលប្រាសាទ ការដែលដាក់អំពូលវាមានកម្ដៅ ហើយកម្ដៅហ្នឹងវាចាំងទៅលើជញ្ជាំងនៃថ្ម ហើយជញ្ជាំងថ្មយើងហ្នឹងវាទទួលនូវសំណើម ហើយប្រតិកម្មរបស់វាប៉ះទៅ វាអាចនឹងធ្វើឲ្យថ្មហ្នឹងអាចប្រេះពេលដែលក្ដៅ ព្រោះអីភ្លើងហ្វាវាខ្លាំង ១ពាន់វ៉ាត់ ១ពាន់វ៉ាត់ជាង។ អ៊ីចឹងកម្ដៅនិងជញ្ជាំងដែលមានជាតិសំណើមហ្នឹង វាអាចធ្វើឲ្យទៅជាប្រេះ អាចបណ្ដាលឲ្យទៅជាពុកជាផុយ អ៊ីចឹងអាយុកាលរបស់ប្រាសាទថ្មរឹងហ្នឹង ដែលវាត្រូវ ឧទាហរណ៍ថា ១ពាន់ឆ្នាំទៅមុខទៀតត្រូវខូច អ៊ីចឹងវាអាចកាត់បន្ថយនៅសល់ ៥០០ឆ្នាំទៀតទៅ។
ហ៊ុយ វណ្ណៈ ៖ ចំណុចមួយទៀតគឺថា ការដែលប្រាសាទអង្គរវត្តសាងសង់មក ហើយមានចន្លោះប្រហោង ឬក៏រន្ធ តើតាមលក្ខណៈស្ថាបត្យកម្ម រន្ធហ្នឹងពីមុនមកគេឲ្យមានទស្សនៈវិស័យថាអាចយកឈើទៅស៊កអ៊ីចឹងបាន ឬក៏គេធ្វើរន្ធក្នុងន័យអ្វីក្នុងន័យស្ថាបត្យកម្ម? ភួន ភូម៉ូនីរតន៍ ៖ ការដែលគេធ្វើមក ដូចជាមិនមានន័យថាសម្រាប់គេយកឈើទៅដោតទេ។
ហ៊ុយ វណ្ណៈ ៖ ប៉ុន្តែចំណុចមួយទៀតគឺថា ឈើដែលដាក់ចូលនៅក្នុងចន្លោះរន្ធប្រហោងប្រាសាទហ្នឹង វាអាចមានយូរទៅពុកផុយ ឬក៏អាចធ្វើឲ្យប៉ះពាល់ថ្មប្រាសាទហ្នឹងដែរ ឬ ទេ?
ភួន ភូម៉ូនីរតន៍ ៖ កាលណាយើងយកឈើទៅដោតនៅក្នុងរន្ធនៃថ្ម ពេលហ្នឹង កាលណាមានភ្លៀង គឺមានសំណើម ឈើហ្នឹងវាអាចស្រូបយកជាតិសើមហ្នឹងទុកទៅដក់នៅក្នុងក្រហែងថ្មហ្នឹង ហើយឈើហ្នឹង មិនមែនថាអាចថ្មហ្នឹងពុកទេ ឈើហ្នឹងក៏វាពុកដែរ ព្រោះអីកាលណាសំណើមជាប់ សើមនៅក្នុងរន្ធថ្មហ្នឹងយូរទៅ។ ឧទាហរណ៍ សូម្បីតែទឹកមួយតំណក់ធ្លាក់លើថ្មយូរ ក៏ថ្មហ្នឹងត្រូវពុកក្រហូងដែរ ផុយ ចុះទម្រាំតែវានៅសើមជាប្រចាំជាប់នៅហ្នឹង ហើយត្រូវមានអំពូលភ្លើងដែលត្រូវបាញ់ទៀត ដែលកម្ដៅហ្នឹងធ្វើឲ្យថ្មហ្នឹងវាស្ងួតលឿនពេក ស្ងួតលឿនវាទៅជាប្រេះ វាទៅអាចជាផុយ ហើយយូរៗទៅ កាលណាផុយ យកដៃទៅប៉ះទៅក៏នេះដែរ... ហើយរូបសំណាកអស់ហ្នឹងក៏លែងជាប់ដែរ អ៊ីចឹងធ្វើឲ្យអារម្មណ៍អ្នកទេសចរហ្នឹងប៉ះទង្គិច។ ការដែលគេទៅ ចង់ឃើញប្រាសាទមួយដែលពីបុរាណយូរលង់មកហើយ តែទៅដល់ឃើញមានខ្សែភ្លើង មានអំពូល មានហ្វា អ៊ីចឹងវាធ្វើឲ្យអារម្មណ៍ពួកគេលែងឲ្យតម្លៃ អ៊ីចឹងឱនភាពកិត្តិយសនិងកិត្តិស័ព្ទរបស់អង្គរវាអាចនឹងធ្លាក់ចុះវិញ។
ហ៊ុយ វណ្ណៈ ៖ តើអ្វីដែលខាងមន្រ្តីរដ្ឋាភិបាល ឬអ្នកដែលបានរៀបចំដាក់អំពូលអះអាងថា ការដាក់នេះមានការសិក្សាត្រឹមត្រូវ ហើយមិនមានផលប៉ះពាល់ទៅដល់ប្រាសាទដល់អី តើការលើកឡើងហ្នឹងត្រឹមត្រូវដែរ ឬ ទេ?
ភួន ភូម៉ូនីរតន៍ ៖ អាជ្ញាធរអប្សរានិងសមត្ថកិច្ចជំនាញពាក់ព័ន្ធហ្នឹង ខ្ញុំមិនមានយោបល់អីទេ ព្រោះអីអានេះជាការចាត់តាំងរបស់រដ្ឋាភិបាល ហើយការសម្រេចក្រុមជំនាញ និងក្រុមអាជ្ញាធរ ក៏ប៉ុន្តែខ្ញុំមិនដឹងថាគាត់បានសិក្សាបែបណាដែរ ហើយគាត់យល់ឃើញបែបណាដែរបានជាគាត់នាំគ្នាឯកភាព ហើយសម្រេចឲ្យការដាក់អំពូលទៅលើប្រាសាទហ្នឹង។ នេះខ្ញុំមិនមានយោបល់អីច្រើនទេទាក់ទងនឹងការសម្រេចរបស់សមត្ថកិច្ចពាក់ព័ន្ធ។ ចំពោះខ្ញុំ ខ្ញុំគិតថាវាមិនសមទេ។
ហ៊ុយ វណ្ណៈ ៖ ប៉ុន្តែបើតាមលោកជាស្ថាបត្យករមួយរូប គឺថាតើភ្លើងហ្នឹងគួរបន្តដាក់អ៊ីចឹង ឬក៏គួរដោះចោល?
ភួន ភូម៉ូនីរតន៍ ៖ ជាយោបល់ខ្ញុំតាមសំណួរបង ខ្ញុំថាគួរតែបញ្ឈប់ ប៉ុន្តែការសម្រេចរបស់អាជ្ញាធរអប្សរា ឬក្រុមជំនាញផ្នែករដ្ឋាភិបាល អាហ្នឹងជារឿងរបស់គាត់ តែជាទស្សនៈរបស់ខ្ញុំផ្ទាល់ដោយឡែក ហើយយោងទៅនឹងមតិសាធារណជន យោងទៅមតិបរទេស ហើយក្រុមការងាររបស់ខ្ញុំ គេបានស្នើថា គ្រាន់តែដាក់អំពូលហើយឲ្យមនុស្សមកដើរមើល ដូចជាមិនមានន័យអីគ្រប់គ្រាន់ទេសម្រាប់ជាផលប្រយោជន៍ប្រជាជន៕
អត្ថបទដែលទាក់ទង
រដ្ឋាភិបាលចាត់ទុកវិស័យទេសចរណ៍ជាកត្តាសំខាន់សម្រាប់បង្កើនថវិកាជាតិ
សម្ភាសជាមួយសមរង្ស៊ីស្ដីពីការកាត់ទោសរបស់តុលាការ
នាយករដ្ឋមន្រ្តី៖ ទេសចរកើនឡើងនៅកម្ពុជាដោយសារស្ថិរភាពនយោបាយល្អ
ទេសចរទៅប្រាសាទតាមាន់ធំកើនឡើងនៅដើមឆ្នាំ២០១០
ទេសចរកើនឡើងនៅខេត្តព្រះសីហនុក្នុងឱកាសចូលឆ្នាំសកល
ចំនួនទេសចរបរទេសកើនឡើងក្នុងឆ្នាំ២០០៩
សម្ភាសសុនឆ័យអំពីបញ្ហាព្រំដែនកម្ពុជា
សម្ភាសមូរសុខហួរជុំវិញកិច្ចប្រជុំកំពូលស្តីពីបញ្ហាស្ត្រី
កម្ពុជារៀបចំការប្រកួតកីឡាបែបទេសចរណ៍នៅសៀមរាប
មន្ត្រីក្រសួងទេសចរណ៍៖ ចំនួនភ្ញៀវបរទេសមានការកើនឡើងក្នុងឆ្នាំ២០០៩
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
មើលមតិទាំងអស់.