គិតត្រឹមថ្ងៃទី១៤ ខែកក្កដា ពលរដ្ឋរស់នៅអគារប៊ូឌីង ៩៩ភាគរយ នៃគ្រួសារសរុបជិត ៥០០គ្រួសារ បានចាកចេញពីអគារនេះហើយ ក្រោយយល់ព្រមលក់បន្ទប់របស់ខ្លួនក្នុងតម្លៃ ១.៤០០ដុល្លារក្នុង១ម៉ែត្រការ៉េ តាមការកំណត់របស់រដ្ឋមន្ត្រីក្រសួងដែនដី នគរូបនីយកម្ម និងសំណង់ គឺលោក ជា សុផារ៉ា។ អគារស្ទើរតែទាំងស្រុង ត្រូវបានបិទទ្វារចោល ហើយបន្ទប់នីមួយៗដែលពលរដ្ឋធ្លាប់រស់នៅ បន្សល់ត្រឹមរបស់របរប្រើប្រាស់ប្រចាំថ្ងៃតិចតួច និងគំនរសំរាមប៉ុណ្ណោះ។
យ៉ាងណាក៏ដោយចុះ មានម្ចាស់បន្ទប់ចំនួន ៧គ្រួសារ ដែលអាជ្ញាធរទទួលស្គាល់ថា មិនទាន់សម្រេចចិត្តចាកចេញនៅឡើយ។ ចំណែកពលរដ្ឋ ៤គ្រួសារទៀតដែលកំពុងរស់នៅលើដីចំណីផ្លូវ ក៏មិនទាន់សម្រេចចិត្តចាកចេញដែរ។ ជំហរនេះ ស្របពេលដែលក្រសួងដែនដីប្រកាសថា នឹងវាយកម្ទេចអគារចំណាស់ប្រមាណ ៥៤ឆ្នាំនេះចោល នៅថ្ងៃទី១៧ ខែកក្កដា ខាងមុខ។
របាយការណ៍របស់ក្រសួងដែនដី បង្ហាញថា ពលរដ្ឋរស់នៅអគារប៊ូឌីងមានចំនួន ៤៩៣គ្រួសារ។ អគារនេះមាន ៦ប្លុក ពីអា (A) ដល់អែហ្វ (F)។ ក្រុមហ៊ុនរបស់ជប៉ុន ឈ្មោះ អារ៉ាកាវ៉ា (Arakawa) ទទួលបានសិទ្ធិសាងសង់អគារកម្ពស់ ២១ជាន់នៅទីតាំងអគារប៊ូឌីង ដែលត្រូវចំណាយពេលប្រមាណ ៤ឆ្នាំ ក្នុងទំហំទឹកប្រាក់ជាង ៨០លានដុល្លារសហរដ្ឋអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។