ថ្ងៃនៃក្តីស្រឡាញ់ ទី១៤ ខែកុម្ភៈ (Valentine's day) អ្នកខ្លះថា ថ្ងៃបុណ្យសង្សារនោះ កំពុងពេញនិយមនៅកម្ពុជា នាយុគសម័យចុងក្រោយនេះ ហើយវប្បធម៌របស់បរទេសមួយនេះកំពុងធ្វើឲ្យយុវវ័យកម្ពុជា មួយចំនួនយល់ខុសពីអត្ថន័យដើមរបស់គេ ដោយពួកគេយល់ថា ជាថ្ងៃបុណ្យសង្សារទៅវិញ។
បញ្ហានេះ បានធ្វើឲ្យថ្នាក់ដឹកនាំក្រសួងនានា ក្នុងរដ្ឋាភិបាល និងអាណាព្យាបាល សំដែងក្តីបារម្ភពីការបាត់បង់កិត្តិយសគ្រួសារ ពូជពង្សវង្សត្រកូល ប្រសិនបើកូនប្រុសស្រីប្រព្រឹត្តអំពើទុំមុនស្រគាលនៅថ្ងៃ១៤ កុម្ភៈ នោះ។ ទន្ទឹមនឹងក្តីបារម្ភនេះ ក្រសួងមហាផ្ទៃ ក្រសួងអប់រំ និងលោកគ្រូ អ្នកគ្រូ បានខិតខំណែនាំឲ្យយុវជនឲ្យយកថ្ងៃ១៤ កុម្ភៈ ជាថ្ងៃដឹងគុណបុព្វបុរស ឬចាស់ព្រឹទ្ធាចារ្យវិញ។
ក្រសួងអប់រំយុវជននិងកីឡា អំពាវនាវកុំឲ្យយុវជនយកថ្ងៃ១៤ កុម្ភៈ ថ្ងៃនៃក្តីស្រឡាញ់នេះ ជាថ្ងៃដែលប្រព្រឹត្តប្រាសចាកពីវប្បធម៌ និងប្រពៃណីជាតិ។
ការអំពាវនាវនេះ បានធ្វើឡើងមុនពីរថ្ងៃ ខណៈថ្ងៃនៃក្តីស្រឡាញ់ ឬហៅថា វែឡិនថាញ ដេយ៍ (Valentine's day) កំពុងខិតជិតមកដល់។
អ្នកនាំពាក្យក្រសួងអប់រំយុវជននិងកីឡា លោក រស់ សាលីន ថ្លែងថា ថ្ងៃនៃក្តីស្រឡាញ់ ឬថ្ងៃបុណ្យសង្សារ ភាសាបរទេសហៅថា Valentine's day ជាវប្បធម៌បរទេស ប៉ុន្តែយុវជនខ្មែររហ័សទទួលយកមកអនុវត្តខុសពីអត្ថន័យពិត ធ្វើឲ្យកូនស្រីមានវ័យជាអនីតិជន មួយចំនួនហ៊ានបូជារូបកាយនៅថ្ងៃនោះ។ ដោយសារបញ្ហានេះកើតឡើងច្រើនឆ្នាំ ក្រសួងអប់រំយុវជននិងកីឡា ចេញសេចក្ដីណែនាំដល់គ្រឹះស្ថានសិក្សារដ្ឋ និងឯកជន ឲ្យមានវិធានការទប់ស្កាត់សកម្មភាពមិនប្រក្រតីក្នុងថ្ងៃ១៤ កុម្ភៈ នោះ ដូចជាពង្រឹងបទបញ្ជាផ្ទៃក្នុងរបស់គ្រឹះស្ថានសិក្សាឲ្យម៉ឺងម៉ាត់ ពិសេសគ្រប់គ្រងសីលធម៌ និងវិន័យ ដោយឲ្យតាមដានអវត្តមានសិស្សជាប្រចាំ។ ជំរុញសកម្មភាពមិត្តអប់រំមិត្តនិងផ្តល់ដំណឹងទៅឪពុកម្ដាយ ឬអាណាព្យាបាលសិស្ស ពេលកូនអវត្តមាន ដើម្បីជួយអប់រំកែលម្អសិស្សឲ្យបានទាន់ពេល៖ «លោកគ្រូ អ្នកគ្រូដែលបង្រៀនផ្ទាល់ហ្នឹង តែងតែផ្ដល់ការណែនាំ ផ្ដល់ការពន្យល់ ហើយចំណុចដែលសំខាន់មួយទៀតហ្នឹង ក៏ត្រូវតែមានការចូលរួមពីមាតាបិតាពីអាណាព្យាបាលដែរនៅក្នុងការតាមដានកូនចៅរបស់ខ្លួនហ្នឹងបន្ថែមទៅលើអ្វីដែលលោកគ្រូអ្នកគ្រូបានណែនាំ បានពន្យល់ គឺថាទាំងអស់នេះទាមទារនូវការអប់រំនៅក្នុងសាលាផង រួមទាំងការណែនាំនៅខាងក្រៅសាលាផង»។
ទាក់ទងបញ្ហានេះដែរ អ្នកនាំពាក្យក្រសួងមហាផ្ទៃ លោក ខៀវ សុភ័គ ថ្លែងថា ១៤ កុម្ភៈ ជាថ្ងៃដែលឪពុកម្ដាយភាគច្រើនបារម្ភជាខ្លាំងពីកិត្តិយស ពូជពង្សវង្សត្រកូល ពិសេសបារម្ភបំផុតចំពោះកូនស្រី អាចជឿលើការឆបោករបស់បុរស ឬមិត្តភ័ក្ដិនាំទៅរកផ្លូវប្រព្រឹត្តខុសឆ្គងសីលធម៌ ដូចជា ចូលផ្ទះសំណាក់ រួចបូជារូបកាយជូនគូស្នេហ៍ជាដើម៖ «ថ្ងៃ១៤ កុម្ភៈ គឺជាថ្ងៃភ័យរបស់ឪពុកម្ដាយ ដូច្នេះអំពាវនាវឲ្យក្មួយៗ យកពាក្យនេះទៅពិចារណា កុំភ្លើតភ្លើនតាមទិវាសង្សារហ្នឹង មិនត្រូវទេក្មួយៗ ហើយយើងត្រូវចាំថ្ងៃ១៤ កុម្ភៈ ម៉ែឪយើងភ័យណាស់ ពិសេសអ្នកមានកូនស្រី»។
Valentine's day ត្រូវយុវជននៅប្រទេសកម្ពុជា ចាប់ផ្ដើមទទួលយកវប្បធម៌នេះចាប់ពីអំឡុងឆ្នាំបោះឆ្នោតជាតិអាណត្តទី២ មក។ ក្នុងពេលនេះដែរ ក្រសួងវប្បធម៌និងវិចិត្រសិល្បៈ អំពាវនាវឲ្យគ្រប់ស្ថាប័នទប់ស្កាត់ និងពន្យល់ណែនាំដាស់តឿនកូនចៅមិត្តភ័ក្ដិ កុំឲ្យប្រើប្រាស់ថ្ងៃ១៤ កុម្ភៈ ជាលេសប្រព្រឹត្តអំពើអវិជ្ជមាន ខុសគន្លងប្រពៃណីជាតិ។
ដើម្បីចូលរួមអប់រំយុវវ័យ លោកគ្រូ ឡុង រឹម បង្រៀននៅវិទ្យាល័យ ប៊ុន រ៉ានី ហ៊ុន សែន វត្តភ្នំ នឹងចូលរួមរឹតបន្តឹង ការចុះបញ្ជីវត្តមានសិស្សានុសិស្ស និងទាក់ទងទៅឪពុកម្ដាយសិស្សណាដែលអវត្តមាននៅថ្ងៃ១៤ កុម្ភៈ នោះភ្លាមៗ។
ចំណែកប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន វិញថ្លែងថា បញ្ហានេះក៏ជា កំហុសរបស់រដ្ឋាភិបាល និងក្រសួងអប់រំដែរ ដែលបណ្ដោយឲ្យវប្បធម៌បរទេសបញ្ជ្រាបចូលបានមកក្នុងស្រទាប់យុវវ័យ។
សេចក្ដីណែនាំស្ដីពីវិធានការទប់ស្កាត់សកម្មភាពមិនប្រក្រតីក្នុងថ្ងៃនៃក្តីស្រឡាញ់នៅតាមគ្រឹះស្ថានសិក្សាសាធារណៈ និងឯកជនរបស់ក្រសួងអប់រំ បានណែនាំគ្រឹះស្ថានទាំងនោះឲ្យអប់រំសិស្សានុសិស្សគ្រប់មធ្យោបាយតាមរយៈការប្រជុំពេលគោរពទង់ជាតិ ពន្យល់សិស្សឲ្យយល់ច្បាស់ពីអត្ថន័យវប្បធម៌នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។