ពលរដ្ឋចាប់ផ្ដើមចាកចេញពីភ្នំពេញ ទៅលេងស្រុកកំណើតស្ទើរស្ងាត់ទីក្រុងនៅថ្ងៃទី១៣ ខែមេសា។ ដំណាលគ្នានេះដែរ តាមច្រកចេញនានា បង្កការកកស្ទះនៅពេលព្រឹក ប៉ុន្តែចាប់ពីពេលរសៀលមិនសូវកកស្ទះទេ។
ការធ្វើដំណើរចាកចេញពីភ្នំពេញ ក្រុមពលរដ្ឋមានស្ពាយបង្វេចខោអាវ នំនែក ផ្លែឈើ ផ្កាភ្ញី និងគ្រឿងរណ្ដាប់ទទួលទេវតាឆ្នាំថ្មី និងទៅជួបជុំសាច់ញាតិរបស់ពួកគេនៅស្រុកកំណើត។
ដៃកាន់ដើមចេក និងផ្កាឈូក លោក ផល្លា សង្វារ ជាពលរដ្ឋធ្វើការនៅភ្នំពេញ ពេលនេះលោកត្រូវវិលត្រឡប់ទៅស្រុកកំណើតរបស់លោកនៅខេត្តព្រៃវែង ចូលរួមអបអរឆ្នាំថ្មី។ លោកយល់ថា ពិធីនេះជាបុណ្យប្រពៃណីនេះ ដូចច្នេះគ្មានអ្វីសប្បាយជាងការជួបជុំបងប្អូន និងឪពុកម្ដាយទេ៖ «វើដំណើរប្រកបដោយសុវត្ថិភាពបងព្រោះអីមានប៉ូលិសជួយសម្រួលចរាចរណ៍ មាន អារម្មណ៍សប្បាយរីករាយពេលបានជួបបងប្អូន»។
មុនមួយថ្ងៃនៃថ្ងៃចូលឆ្នាំថ្មីនេះ ច្រកចេញពីភ្នំពេញ សំខាន់ៗមួយចំនួនរួមមាន ផ្លូវជាតិលេខ១ ផ្លូវជាតិលេខ៥ ស្ពានជ្រោយចង្វារ ផ្លូវជាតិលេខ៣ និងលេខ៤ នៅម្តុំចោមចៅ មានការកកស្ទះចរាចរណ៍ខ្លាំងនៅពេលព្រឹក ព្រោះពលរដ្ឋនៅគ្នាសម្រុកចេញពីក្រុង។ ចំណែកទីក្រុងភ្នំពេញ ដែលធ្លាប់មានមនុស្សម្នាណែនណាន់នោះ ក៏ចាប់ផ្ដើមស្រឡះឡានម៉ូតូ។ ដំណាលគ្នានោះដែរ រថយន្តឈ្នួលក៏កំពុងឡើងថ្លៃ បើទោះជារដ្ឋាភិបាលស្នើកុំឲ្យក្រុមហ៊ុនឡានឈ្នួល និងម្ចាស់រថយន្តឈ្នួលឡើងថ្លៃ។
ចំណែកពលរដ្ឋមួយរូបទៀត កញ្ញា ថ្លុង ស្រីពៅ និយាយថា ដើម្បីឲ្យចូលឆ្នាំថ្មីនេះ មានការជួបជុំសប្បាយរីករាយ លុះត្រាការធ្វើដំណើរតាមផ្លូវមានសុវត្ថិភាព ដូច្នេះកញ្ញាស្នើឲ្យអ្នកបើកបរគ្រប់រូបគោរពច្បាប់ចរាចរណ៍៖ «សម្រាប់ខ្ញុំ ខ្ញុំចង់ឲ្យអ្នកបើកបរគោរពអ្នកថ្មើរជើង អ្នកជិះម៉ូតូអីចឹងទៅណា គោរពគ្នាទៅណាព្រោះចូលឆ្នាំថ្មីអ៊ីចឹងយើងចង់ជួបជុំបងប្អូន»។
អ្នកបើកឡានឈ្នួលពីភ្នំពេញ ទៅខេត្តស្វាយរៀង លោក ពេជ្រ សុវណ្ណ ដើម្បីបង្ការគ្រោះថ្នាក់ចរាចរណ៍ លោកត្រូវបើកបរគោរពច្បាប់ មិនដឹកលើសចំណុះ ព្រោះលោកយល់ថា សុវត្ថិភាពអ្នកដំណើរជាអាយុជីវិតរបស់លោក៖ «ខ្ញុំបើកយឺតៗនេះឯង យើងគោរពច្បាប់»។
ពិធីបុណ្យចូលឆ្នាំថ្មី ប្រពៃណីខ្មែរ ដែលមានរយៈពេលបីថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា។ នៅពេលមានពិធីបុណ្យទានម្ដងៗតែងតែមានគ្រោះថ្នាក់ចរាចរណ៍ ដែលករណីនេះ ធ្វើឲ្យអ្នកបើកបរធ្វេសប្រហែស មិនគោរពច្បាប់ចរាចរណ៍ ឬបើកបរមានជាតិស្រវឹង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។