រដ្ឋលេខាធិការក្រសួងទេសចរណ៍ និងជាអនុប្រធានអចិន្ត្រៃយ៍គណៈកម្មការរៀបចំបុណ្យសមុទ្រ លោក សូ ម៉ារ៉ា បានឲ្យដឹងថា ការរៀបចំបុណ្យសមុទ្រនេះ ដើម្បីផ្សព្វផ្សាយវិស័យទេសចរណ៍ និងបរិស្ថានឆ្នេរសមុទ្ររបស់កម្ពុជា បង្អួតពិភពលោក។
មន្ត្រីក្រសួងទេសចរណ៍ដដែលក៏បានឲ្យដឹងថា បុណ្យសមុទ្រឆ្នាំនេះ នឹងមានបណ្ដាប្រទេសអាស៊ានចូលរួមផ្សព្វផ្សាយវប្បធម៌ ឬតាំងពិព័រណ៍មុខម្ហូបអាហារប្រទេសរៀងៗខ្លួនជូនភ្ញៀវជាតិ និងអន្តរជាតិទស្សនា។ ជាពិសេស លោកថា បុណ្យនេះក៏មានចាក់ផ្សាយកម្មវិធីបុណ្យបន្តផ្ទាល់តាមស្ថានីយវិទ្យុ ឬទូរទស្សន៍ក្នុងស្រុកមួយចំនួនផង។
លោក សូ ម៉ារ៉ា ឲ្យដឹងថា ពិធីបុណ្យនេះ អ្នកពាក់ព័ន្ធបានត្រៀមលក្ខណៈរួចជាស្រេច៖ «បច្ចុប្បន្ននេះយើងឃើញថា មានការចាប់អារម្មណ៍ខ្ពស់ មានការផ្សព្វផ្សាយបានទូលំទូលាយ ទាំងក្នុងនិងក្រៅស្រុក គឺយើងបានផ្សព្វផ្សាយតាមរយៈបណ្ដាញព័ត៌មានជាច្រើន។ ហើយក៏មានភ្ញៀវគេកុម្ម៉ង់កក់បន្ទប់ជាច្រើន ឃើញថា មានការខ្វះខាតបន្ទប់ស្នាក់នៅ។ ប៉ុន្តែក្រសួងក៏បានត្រៀមតង់ ឬមធ្យោបាយស្នាក់នៅមួយចំនួនដើម្បីដោះស្រាយ ពីព្រោះយើងនៅមានការខ្វះខាតចំពោះតម្រូវការស្នាក់នៅ។ ក៏ប៉ុន្តែទោះជាយ៉ាងណាក៏ដោយ ក៏បុណ្យសមុទ្រនេះបានរួមចំណែកជាច្រើន ផ្តល់នូវការយល់ដឹងដល់ពលរដ្ឋទាំងក្នុងប្រទេស ក៏ដូចជានៅក្រៅប្រទេសអំពីការលើកតម្កើងការការពារបរិស្ថាន និងឆ្នេរសមុទ្រដ៏ល្អរបស់យើង»។
ទោះជាបែបនេះក្តី បុណ្យសមុទ្រឆ្នាំនេះបានរងការរិះគន់ពីមន្ត្រីគណបក្សប្រឆាំង។ លោក សុន ឆ័យ បេក្ខជនជាប់ឆ្នោតតំណាងរាស្ត្រមណ្ឌលភ្នំពេញ មកពីគណបក្សសង្គ្រោះជាតិ ថ្លែងរិះគន់រាជរដ្ឋាភិបាលដែលបានលុបចោលព្រះរាជពិធីបុណ្យអុំទូក ប៉ុន្តែបែរជាទៅរៀបចំពិធីបុណ្យសមុទ្រទៅវិញ។
លោកបន្តថា ព្រះរាជពិធីបុណ្យអុំទូក ជាពិធីបុណ្យតំណាងជាតិទាំងមូល ឬជាបុណ្យប្រពៃណីជាតិ សម្រាប់ពលរដ្ឋខ្មែរកម្សាន្តសប្បាយ មិនគួរលុបចោលដោយលើកហេតុផលស្រុកទេសជួបគ្រោះទឹកជំនន់នោះទេ។
លោក សុន ឆ័យ ថ្លែងចាត់ទុកការលុបចោលព្រះរាជពិធីបុណ្យអុំទូករបស់រដ្ឋាភិបាលនៅឆ្នាំនេះ ថាជារឿងនយោបាយ ហើយស្នើឲ្យថ្នាក់ដឹកនាំរដ្ឋាភិបាលបញ្ឈប់សកម្មភាពនេះនៅថ្ងៃអនាគត៖ «ដូច្នេះបានជាយើងយល់ថា គួរតែបញ្ចប់ទៅអ្វីដែលជាល្បែងនយោបាយ ដែលនាំឲ្យប៉ះពាល់ទៅដល់ប្រពៃណីរបស់ជាតិហ្នឹង។ ហើយការប្រារព្ធព្រះរាជពិធីបុណ្យអុំទូក បើតាមខ្ញុំចាំលើកលែងតែរបបខ្មែរក្រហមចេញពិធីបុណ្យអុំទូកគេប្រព្រឹត្តទៅបានទៀងទាត់។ សូម្បីតែសម័យ លន់ នល់ ក៏គេមានព្រះរាជពិធីបុណ្យអុំទូកដែរ ពេលហ្នឹងមានសង្គ្រាមផង។ ប៉ុន្តែឥឡូវយើងថា ប្រទេសយើងមានការសុខសាន្តប៉ុណ្ណឹងគួរតែមានពិធីបុណ្យនេះ»។
ទោះយ៉ាងណា លោក សូ ម៉ារ៉ា អ្នករៀបចំពិធីបុណ្យថ្លែងថា បុណ្យសមុទ្រឆ្នាំនេះក៏មានតាំងពិព័រណ៍មហោស្រពម្ហូបអាហារ ឬភេសជ្ជៈ និងការបង្ហាញពីគម្រោងអភិវឌ្ឍន៍ទេសចរណ៍តំបន់ឆ្នេរ និងប្រជុំកោះផ្សេងៗរបស់ក្រុមវិនិយោគនានា ដែលទទួលបានសិទ្ធិអភិវឌ្ឍន៍តំបន់ឆ្នេរពីរាជរដ្ឋាភិបាលជូនភ្ញៀវទស្សនាផង។
តាមរយៈបុណ្យសមុទ្រទាំងមន្ត្រីរដ្ឋាភិបាល និងតំណាងក្រុមហ៊ុនបម្រើសេវាទេសចរណ៍មានជំនឿថា កំណើនភ្ញៀវទេសចរនឹងចូលមកទស្សនាប្រទេសកម្ពុជា បានច្រើនថែមទៀតនៅថ្ងៃអនាគត។
ប្រធានសមាគមទីភ្នាក់ងារទេសចរណ៍កម្ពុជា លោក អាង គឹមអៀង បានឲ្យដឹងថា បុណ្យសមុទ្រឆ្នាំនេះ សមាគមលោកមានរៀបចំស្តង់តាំងបង្ហាញផលិតផលទេសចរណ៍សម្រាប់បម្រើដល់ភ្ញៀវទេសចរជាតិ និងអន្តរជាតិរហូតចប់កម្មវិធី ហើយក៏រំពឹងថា កំណើនភ្ញៀវទេសចរអាចនឹងកើតថែមទៀតនៅថ្ងៃខាងមុខ។
មន្ត្រីមន្ទីរទេសចរណ៍ខេត្តកែប ក៏បានឲ្យដឹងដែរថា បច្ចុប្បន្នបរិស្ថានតំបន់ឆ្នេរខេត្តកែប ត្រូវបានអភិវឌ្ឍន៍ឲ្យមានអនាម័យ និងមានបរិស្ថានល្អ តាមរយៈការដឹកខ្សាច់ពណ៌សចាក់តាមមាត់សមុទ្រស្ថាបនាពង្រីកផ្លូវចេញចូល និងអភិវឌ្ឍន៍សួនច្បារឲ្យមានសោភណភាពជាដើម។
បុណ្យសមុទ្រឆ្នាំនេះ មន្ត្រីក្រសួងទេសចរណ៍ និងអ្នកពាក់ព័ន្ធរំពឹងថា អាចនាំឲ្យពិភពលោកស្គាល់កម្ពុជា កាន់តែច្រើន ហើយកំណើនភ្ញៀវទេសចរអន្តរជាតិ ក៏នឹងកើនតាមនោះដែរនៅថ្ងៃអនាគត។
ប្រទេសកម្ពុជា បានរៀបចំបុណ្យសមុទ្រលើកទី១ នៅឆ្នាំ២០១១ នៅខេត្តព្រះសីហនុ និងលើកទី២ នៅខេត្តកែប ចាប់ផ្ដើមនៅថ្ងៃទី៦ ដល់ថ្ងៃទី៨ ខែធ្នូ ឆ្នាំ២០១៣។ ការរៀបចំបុណ្យសមុទ្រនេះ បន្ទាប់ពីឆ្នេរសមុទ្រកម្ពុជា បានជាប់ចំណាត់ថ្នាក់ថាជាឆ្នេរស្អាតរបស់ពិភពលោកកាលពីឆ្នាំ២០១០៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕