ប្រជាកសិករដាំកៅស៊ូនៅស្រុកមេមត់ ខេត្តត្បូងឃ្មុំ ចាប់ផ្ដើមមានសង្ឃឹមជាថ្មី ក្រោយពេលតម្លៃជ័រកៅស៊ូនៅលើទីផ្សារបានហក់ខ្ពស់ឡើងវិញ។ យ៉ាងនេះក្តី កសិករនៅតែបារម្ភថា តម្លៃនឹងអាចចុះថោកវិញនៅពេលណាមួយ ដែលធ្វើឲ្យពួកគាត់ត្រូវជួបប្រទះបញ្ហាប្រឈមផ្សេងៗក្នុងជីវភាពរស់នៅ ពីព្រោះផលិតផលជ័រកៅស៊ូរបស់កសិករខ្មែរនៅខេត្តត្បូងឃ្មុំ គឺពឹងផ្អែកទាំងស្រុងទៅលើទីផ្សារបរទេស ពិសេសវៀតណាម។
កសិករដាំកៅស៊ូនៅស្រុកមេមត់ រីករាយក្រោយពេលតម្លៃជ័រកៅស៊ូបានហក់ឡើងថ្លៃខ្ពស់បន្តិច នៅអំឡុងពេលចុងក្រោយនេះ ប៉ុន្តែមានពលរដ្ឋមួយចំនួនយល់ថា ឲ្យតែជិតដល់រដូវបោះឆ្នោតចូលមកដល់ តម្លៃជ័រកៅស៊ូរបស់ពួកគាត់គឺឡើងថ្លៃ ហើយនៅពេលបោះឆ្នោតរួចរាល់ តម្លៃចុះថោកទៅវិញ ពោលគឺឡើងថ្លៃរយៈពេលខ្លី និងចុះថោករយៈពេលវែង។
កសិករមួយរូបនៅស្រុកមេមត់ លោក ឈុន វុត្ថា ឲ្យដឹងថា តម្លៃជ័រកៅស៊ូចាប់ផ្តើមឡើងថ្លៃបន្តិចនៅរយៈពេលប្រមាណ ១ខែមកហើយ។ លោកបន្តថា តម្លៃជ័រកៅស៊ូបង្កក ឬជ័រចាន កាលពីមុនអាចលក់បានក្នុងមួយគីឡូក្រាម ១.៣០០រៀលទៅ ១.៧០០រៀល។ លោកបញ្ជាក់ថា ប្រហែលជាមួយខែចុងក្រោយនេះ កសិករអាចលក់បានតម្លៃពី ២.៧០០រៀលទៅ ៣ពាន់រៀលក្នុងមួយគីឡូក្រាម។
យ៉ាងនេះក្តី លោកកត់សម្គាល់ថា តម្លៃជ័រកៅស៊ូតែងតែហក់ឡើងបែបនេះ ឲ្យតែដល់ពេលជិតរដូវបោះឆ្នោតចូលមកដល់ ដែលធ្វើឲ្យកសិករខ្លះនៅតែបារម្ភថា តម្លៃជ័រកៅស៊ូអាចនឹងមិនឋិតថេរឡើយ៖ « ខ្ញុំគិតថារាជរដ្ឋាភិបាលគួរតែរៀបចំទីផ្សារមួយឲ្យល្អសម្រាប់ប្រជាពលរដ្ឋ។ នៅពេលណាទីផ្សារភ្លឹបភ្លែតៗដូចភ្លើងខ្វះប្រេងអ៊ីចឹង វាពិបាកណាស់ »។
ប្រភពដដែលបន្តថា នៅពេលកសិករធ្វើកសិកម្មមានទីផ្សារ និងមានតម្លៃសមរម្យ គឺធ្វើឲ្យពួកគាត់រីករាយ ប៉ុន្តែនៅពេលតម្លៃថោកវិញ ធ្វើឲ្យកសិករត្រូវប្រឈមបញ្ហាផ្សេងៗក្នុងជីវភាពរស់នៅ ដូចជាជំពាក់បំណុលធនាគារ និងចំណាកស្រុក ជាដើម។ ជាក់ស្តែងមានពលរដ្ឋនៅស្រុកមេមត់ ជាច្រើន បាននាំគ្នាកាប់ដើមកៅស៊ូចោល ដើម្បីដាំដំណាំម្រេច ឬដំណាំផ្សេងទៀត។ កសិករខ្លះនាំគ្នាចំណាកស្រុក និងមានម្ចាស់ចម្ការកៅស៊ូខ្លះដាក់ស្លាកលក់ដីចម្ការ ដើម្បីយកប្រាក់សងបំណុលគេ ជាដើម។
កសិករមួយរូបទៀត លោក កែវ គុណ ឲ្យដឹងថា ដំណាំកៅស៊ូរបស់លោកបច្ចុប្បន្នមានប្រមាណ ៧ហិកតារ។ លោកត្រេកអរនៅពេលតម្លៃជ័រកៅស៊ូបានឡើងថ្លៃវិញ បើទោះបីតម្លៃនេះមិនទាន់ដល់តម្លៃមួយដែលកសិករចង់បានក៏ដោយ។ លោកថា កសិករចង់បានតម្លៃលក់ជ័របង្កកមួយគីឡូក្រាម ៤ពាន់រៀល ឬលើសពីនេះ ពីព្រោះអាចធ្វើឲ្យជីវភាពពួកគាត់កាន់តែប្រសើរឡើង៖ « បារម្ភដែរ បារម្ភខ្លាចតម្លៃវាថយចុះមកវិញ។ ចង់តម្លៃចេះតែឡើង យ៉ាងហោចណាស់ក៏បានតម្លៃម៉ាសាំងអ៊ីចឹងទៅ តម្លៃមួយគីឡូក្រាម ១ដុល្លារអ៊ីចឹង »។
ឈ្មួញទិញជ័រកៅស៊ូនៅស្រុកមេមត់ លោក ឈឹម គឹមហាក់ ហៅ ម៉ាប់ មានប្រសាសន៍ថា តម្លៃជ័រកៅស៊ូឡើងថ្លៃពេលនេះ គឺមិនពាក់ព័ន្ធនឹងទីផ្សារវៀតណាម ជាអ្នកកំណត់ទេ ប៉ុន្តែលោកយល់ថា អាចដោយសារការផលិតធ្លាក់ចុះ ទើបតម្រូវការទីផ្សារកើនឡើង។ លោកបន្តថា នៅពេលតម្លៃកើនឡើង ធ្វើឲ្យកសិករជាច្រើនមានក្តីសង្ឃឹមឡើងវិញ ហើយខាងលោកក៏ងាយស្រួលដើរប្រមូលទិញពីកសិករដែរ។ ឈ្មួញកណ្ដាលរូបនេះនិយាយថា រៀងរាល់ថ្ងៃ នៅពេលជ័រកៅស៊ូឡើងថ្លៃ គាត់អាចទិញពីពលរដ្ឋបានចន្លោះពី ៤ ទៅ ៥តោនក្នុងមួយថ្ងៃ៖ « គ្រូអើយ ! អត់មានពាក់ព័ន្ធនឹងវៀតណាម ទេ ! ជ័រកៅស៊ូហ្នឹងបើវៀតណាម លក់ទៅឲ្យចិន ហ្នឹង បើចិន ទិញឡើងវាទិញឡើង »។
ផ្ទៃដីដាំកៅស៊ូនៅទូទាំងខេត្តត្បូងឃ្មុំ មានចំនួនជាង ៧ម៉ឺនហិកតារ។
ប្រធានមន្ទីរកសិកម្មខេត្តត្បូងឃ្មុំ លោក ហេង ពិសិដ្ឋ មានប្រសាសន៍ថា តម្លៃជ័រកៅស៊ូឡើងថ្លៃ គឺមិនពាក់ព័ន្ធនឹងរឿងជិតដល់ពេលបោះឆ្នោតនោះទេ ប៉ុន្តែវាពាក់ព័ន្ធនឹងតម្រូវការទីផ្សារអន្តរជាតិច្រើនជាង។ លោកមិនទាន់ហ៊ានទស្សន៍ទាយថា ថ្ងៃក្រោយទៀតតម្លៃនៅតែកើនឡើង ឬធ្លាក់ចុះនោះទេ ប៉ុន្តែលោកមើលឃើញថា ផលិតផលជ័រកៅស៊ូនៅតែជាសេចក្តីត្រូវការសម្រាប់អន្តរជាតិ និងជាដំណាំកសិឧស្សាហកម្មល្អជាងគេដដែល៖ « ចំពោះទស្សនៈខ្ញុំ ខ្ញុំមើលឃើញថានៅតែល្អ ហើយថ្នាក់ដឹកនាំរបស់យើងដូចឯកឧត្តមរដ្ឋមន្ត្រីក្រសួងកសិកម្ម លោកខ្នះខ្នែងទំនាក់ទំនងអន្តរជាតិលើបញ្ហាទីផ្សារជាដើមហ្នឹង »។
ប្រធានមន្ទីរកសិកម្មដដែលបន្ថែមថា កន្លងទៅ មន្ត្រីជំនាញធ្លាប់បានណែនាំដល់កសិករឲ្យអត់ធ្មត់ ហើយរក្សាដើមកៅស៊ូឲ្យនៅល្អដដែល ជៀសវាងកាប់ចោល ហើយផ្លាស់ទៅដាំដំណាំផ្សេងៗ ដែលនាំឲ្យស្ដាយក្រោយនៅពេលតម្លៃជ័រកៅស៊ូចាប់ផ្ដើមកើនឡើងដូចពេលនេះ។
នាយកប្រតិបត្តិនៃមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ថាសេដាក (CEDAC) លោក សម វិទូ បញ្ជាក់ថា តម្លៃកៅស៊ូឡើងថ្លៃ គឺមានហេតុផលពីរយ៉ាង។ ទីមួយ ដោយសារតម្រូវការទីផ្សារបរទេសកើនឡើង ពិសេសតម្រូវការទីផ្សារប្រទេសចិន។ មួយវិញទៀត ដោយសារប្រេងឡើងថ្លៃបន្តិចនាពេលបច្ចុប្បន្ន ធ្វើឲ្យការប្រើប្រាស់ជ័រកៅស៊ូធម្មជាតិចាប់ផ្តើមកើនឡើងដែរ។ លោកបន្តថា តម្លៃនេះនឹងអាចប្រែប្រួល ប្រសិនបើតម្រូវការទីផ្សារប្រទេសចិន និងតម្លៃប្រេងប្រែប្រួល ម្យ៉ាងប្រសិនបើកសិករខ្មែរផលិតជ័រកៅស៊ូសម្រាប់លក់ចេញក្នុងរូបភាពមិនត្រឹមត្រូវ ឬបោកប្រាស់គេ៖ « ដើម្បីឲ្យបានចំណេញពេលខ្លះ គាត់មានការដាក់លាយខ្សាច់លាយអីជាដើម។ ហើយអាហ្នឹងហើយដែលធ្វើផលិតផលយើងលក់បានតម្លៃថោក »។
លោក សម វិទូ មើលឃើញថា ដើម្បីរក្សាលំនឹងស្ថិរភាពតម្លៃ ឬធ្វើឲ្យតម្លៃចេះតែកើនឡើង រាជរដ្ឋាភិបាល និងវិស័យឯកជន ត្រូវសហការគ្នាដើម្បីបង្កើតរោងចក្រកែច្នៃវត្ថុធាតុដើមទៅជាផលិតសម្រេច ដើម្បីនាំចេញឲ្យបានច្រើន។ ជាងនេះទៀត កសិករខ្លួនឯងត្រូវពង្រឹងគុណភាពផលិតជ័រកៅស៊ូរបស់ខ្លួន ហើយបង្កើនទំនុកចិត្តដល់ឈ្មួញ ឬអ្នកទិញ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។