ថ្ងៃទី៥ ខែតុលា ឆ្នាំ២០១៧នេះ គឺជាទិវាគ្រូបង្រៀនពិភពលោក។ នៅក្នុងឱកាសនេះ សមាគមគ្រូបង្រៀនកម្ពុជាឯករាជ្យ បានដាក់ញត្តិតាមស្ថាប័នរដ្ឋសំខាន់ៗចំនួនបួន ដើម្បីស្នើសុំដំឡើងប្រាក់ខែជូនគ្រូបង្រៀន ជាអប្បបរមា ២លានរៀល។ បើតាមសមាគមគ្រូបង្រៀនការដំឡើងប្រាក់ខែជូនដល់គ្រូបង្រៀន ជាផ្នែកមួយក្នុងការផ្ដល់តម្លៃឲ្យគ្រូបង្រៀន និងដើម្បីពង្រឹងគុណភាពអប់រំ។
អាជ្ញាធររាជធានីភ្នំពេញ រារាំងដំណើរការប្រារព្ធជាទិវាគ្រូបង្រៀនពិភពលោក ដែលរៀបចំដោយសមាគមគ្រូបង្រៀនកម្ពុជាឯករាជ្យ។ ការរារាំងនេះនៅពេល ក្រុមគ្រូបង្រៀនប្រមាណជាង ២០នាក់បានជួបជុំគ្នានៅរង្វង់មូល ក្រោមដើមពោធិ៍ខាងកើត រមណីយដ្ឋានវត្តភ្នំ ដោយបង្ហាញសារទាមទារអោយដំឡើងខែជូនគ្រូបង្រៀន និងធ្វើការដង្ហែញត្តិទៅដាក់ជូនស្ថាប័នរដ្ឋសំខាន់ៗ។ ក្រុមអាជ្ញាធរមិនបានអោយតំណាងគ្រូបង្រៀនដើរហែក្បួនឡើយ ដោយចាត់ឲ្យតំណាងគ្រូបង្រៀនចំនួន ៥នាក់ប៉ុណ្ណោះ ធ្វើដំណើរដោយកង់បីយកញត្តិទៅដាក់ជូនស្ថាប័នរដ្ឋ ដោយមានមន្ត្រីអាជ្ញាធរ និងក្រុមសន្តិសុខ សាលារាជធានីភ្នំពេញធ្វើដំណើរអមមុខក្រោយផង។ ក្រោយពីការដាក់ញត្តិទៅស្ថាប័នរដ្ឋសំខាន់ៗ រួចមក ប្រធានសមាគមគ្រូបង្រៀនឯករាជ្យប្រចាំខេត្តពោធិ៍សាត់ អ្នកស្រី គឹម តារានី បានអោយដឹងថា បច្ចុប្បន្នសិទ្ធិសេរីភាពរបស់គ្រូបង្រៀនត្រូវបានរឹតត្បិតពីសំណាក់អាជ្ញាធរ លើសពីនេះនៅពេលយកញត្តិដល់ក្រសួងហើយ ពុំអាចយកញត្តិចូលតាមច្រកមុខបានទេ គឺអោយចូលតាមទ្វារក្រោយទៅវិញ។
នៅក្នុងញត្តិដែលក្រុមគ្រូបង្រៀនយកទៅដាក់តាមស្ថាប័នរដ្ឋសំខាន់ៗមាន រដ្ឋសភា ទីស្ដីការគណៈរដ្ឋមន្ត្រី ខុទ្ទកាល័យលោក ហ៊ុន សែន និងក្រសួងអប់រំ យុវជន និងកីឡា បានស្នើសុំចំនួន ១០ ចំណុច តែមានចំនួន ៣ចំណុច ដែលក្រុមគ្រូបង្រៀនស្នើសុំអោយអនុវត្តអោយបានលឿន ក្នុងនោះ សុំដំឡើងប្រាក់បៀវត្សដល់គ្រូបង្រៀនចំនួន ២លានរៀនក្នុងមួយខែៗ ត្រូវមានវិធានការទប់ស្កាត់ និងស៊ើបអង្កេតអំពើពុករលួយ និងក្នុងស្ថាប័នអប់រំគ្រប់កម្រិត និងដំឡើងប្រាក់អត្ថប្រយោជន៍ផ្សេងៗទៀត ជូនគ្រូបង្រៀន។ លោកនាយរដ្ឋមន្ត្រី ហ៊ុន សែន ក៏បានរៀបចំពិធីអបអរសាទរទិវាគ្រូបង្រៀនពិភពលោក នៅវិទ្យាស្ថានជាតិអប់រំ នៅថ្ងៃទី៥ ខែតុលា ឆ្នាំ២០១៧។
ក្នុងពេលជាមួយគ្នានោះ លោក ហ៊ុន សែន បានស្នើសុំឲ្យដំឡើងអាយុចូលនិវត្តន៍របស់គ្រូបង្រៀនឱ្យដល់អាយុ ៦៥ឆ្នាំ។ ការប្រារព្ធពិធីទិវាគ្រូបង្រៀនពិភពលោក គឺដើម្បីរំលឹកដល់អនុសាសន៍របស់អង្គការពលកម្មអន្តរជាតិ (ILO) និងអង្គការ UNESCO ឆ្លុះបញ្ចាំងឲ្យឃើញថា រាជរដ្ឋាភិបាលកម្ពុជាពុំអាចអនុវត្ត និងគោរពតាមអនុសាសន៍ឲ្យបានពេញលេញ ក្នុងការដោះស្រាយបញ្ហាគ្រូបង្រៀន និងការកែទម្រង់វិស័យអប់រំ ដែលអូសបន្លាយពេលអស់ជាង២០ឆ្នាំ ចាប់ពីឆ្នាំ១៩៩៣មក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។