ពលរដ្ឋ ១៣គ្រួសារនៅខែត្រស្ទឹងត្រែង អំពាវនាវឲ្យក្រុមហ៊ុនទំនប់វារីអគ្គិសនីសេសានក្រោមពីរ ផ្ដល់សំណងផលប៉ះពាល់ដីធ្លីជូនពួកគាត់ ក្រោយពីក្រុមហ៊ុនបានជីកប្រឡាយទឹក ស្ថាបនាផ្លូវ ដើម្បីជញ្ជូនសម្ភារធ្វើបង្គោលអគ្គិសនីបង្កប៉ះពាល់ដីធ្លីអ្នកភូមិច្រើនហិកតារ។
ពលរដ្ឋរស់នៅភូមិសាមឃួយ ស្រុកសេសាន និងពលរដ្ឋមួយចំនួនរស់នៅក្រុងស្ទឹងត្រែង ទាមទារឲ្យក្រុមហ៊ុនទំនប់វារីអគ្គិសនីសេសានក្រោមពីរ ផ្ដល់សំណងជូនអ្នកភូមិដែលរងផលប៉ះពាល់ដោយសារការដាក់បង្គោលអគ្គិសនី និងស្ថាបនាផ្លូវលើដីស្រែចម្ការពួកគាត់។
ពលរដ្ឋរស់នៅក្រុងស្ទឹងត្រែង ដែលមានដីចម្ការនៅឃុំសាមឃួយ លោក ហង្ស សម្បត្តិ ឲ្យដឹងនៅថ្ងៃទី៤ កញ្ញា ថា ក្រុមហ៊ុនបានស្ថាបនាបង្គោលអគ្គិសនី និងផ្លូវលំមួយខ្សែមានប្រវែងច្រើនគីឡូម៉ែត្រ ចំដីស្រែចម្ការពលរដ្ឋជាង ១០គ្រួសារជាច្រើនខែមកហើយ ដោយពុំមានការឯកភាពពីពលរដ្ឋជាម្ចាស់កម្មសិទ្ធិទេ។ ហេតុនេះពួកគាត់ទាមទារឲ្យក្រុមហ៊ុនផ្ដល់សំណងផលប៉ះពាល់នោះឲ្យបានត្រឹមត្រូវ៖ «ផ្លូវដែលគាត់ឈូសនេះវាបានកាត់ផ្ដាច់ដីជាពីរ និងជាបីកំណាត់អ៊ីចឹងទៅ ហើយបង្គោលដំឡើងនេះមិនមែនរយៈពេល ៤ ១០ ទៅ ២០ឆ្នាំទេ គឺវាប្រើរយៈពេលមិនដឹងប៉ុន្មានឆ្នាំទេ ហើយវាមានផលប៉ះពាល់ច្រើន»។
ពលរដ្ឋម្នាក់ទៀតរស់នៅឃុំសាមឃួយ ជាជនជាតិភាគតិចឡាវ លោក ជា ប៊ុនតឿន កត់សម្គាល់ថា ក្រុមហ៊ុនធ្លាប់បានប្រជុំជាមួយពលរដ្ឋដែលរងប៉ះពាល់ និងបង្គាប់ឲ្យអ្នកភូមិផ្ដិតមេដៃឯកភាពឲ្យក្រុមហ៊ុនធ្វើបង្គោលភ្លើង ដោយសន្យាថា នឹងផ្ដល់សំណងសមរម្យ ក៏ប៉ុន្តែហួតមកទល់ពេលនេះពួកគាត់ពុំទាន់ទទួលបានសំណងនៅឡើយ៖ «ទាមទារសំណង ប្រជាពលរដ្ឋយើងទាំងអស់នេះ ត្រូវការសំណង ព្រោះកាលណាដីកាយខូចដី ប៉ះពាល់ក្បាលស្រែច្រើន»។
ផ្លូវដែលក្រុមហ៊ុនកសាងមានទំហំ ៣ម៉ែត្រ ទៅ ៤ម៉ែត្រ ប្រវែងប្រហែលជិត ១០គីឡូម៉ែត្រ ក្នុងបំណងដឹកជញ្ជូនសម្ភារៈធ្វើបង្គោលអគ្គិសនី ហើយបច្ចុប្បន្នក្រុមហ៊ុនបានធ្វើបង្គោលជិតរួចរាល់ហើយ ដើម្បីបញ្ជូនថាមពលអគ្គិសនីពីទំនប់វារីអគ្គិសនីសេសានក្រោមពីរទៅខែត្រកំពង់ចាម និងខែត្រត្បូងឃ្មុំជាដើម។
អាស៊ីសេរី មិនអាចទាក់ទងតំណាងក្រុមហ៊ុនទំនប់វារីអគ្គិសនីសេសានក្រោមពីរ លោក អ៊ុំ រ៉េត ដើម្បីសុំការបំភ្លឺពីការចោទប្រកាន់នេះបាននៅឡើយទេ នៅថ្ងៃទី៤ ខែកញ្ញា។
មេឃុំសាមឃួយ ស្រុកសេសាន អ្នកស្រី ខាង ខាំអន ថ្លែងថា អាជ្ញាធរឃុំពុំទាន់ទទួលពាក្យបណ្ដឹងរឿងនេះនៅឡើយទេ។ តែយ៉ាងណាអ្នកស្រីថា កន្លងទៅក្រុមហ៊ុនបានដាក់បង្គោលភ្លើងនៅឃុំសាមឃួយ បង្កប៉ះពាល់ដីស្រែចម្ការពលរដ្ឋ ៦គ្រួសារ ហើយរឿងនេះ ក្រុមហ៊ុនបានផ្ដល់សំណងរួចរាល់ហើយ។ អ្នកស្រីអះអាងថា ប្រសិនបើក្រុមហ៊ុនធ្វើបង្គោលភ្លើងនៅលើដីសាធារណៈរបស់រដ្ឋ ឬដីព្រៃ គឺក្រុមហ៊ុនមិនផ្ដល់សំណងទេ ក៏ប៉ុន្តែបើប៉ះលើដីពលរដ្ឋមានប្លង់កម្មសិទ្ធិ គេនឹងផ្ដល់សំណងជូន៖ «ប្រសិនជាដីប្លង់គាត់ មានការទទួលស្គាល់ពីភូមិ និងឃុំមានសំណងជូនគាត់»។
មន្ត្រីសម្របសម្រួលសមាគមអាដហុក (ADHOC) ខែត្រស្ទឹងត្រែង លោក ហូ សំអុល យល់ថា គោលនយោបាយការងារអភិវឌ្ឍន៍ថាមពលអគ្គិសនីរបស់ក្រុមហ៊ុន ការអភិវឌ្ឍណាដែលប៉ះពាល់ទ្រព្យសម្បត្តិពលរដ្ឋ ក្រុមហ៊ុនត្រូវតែផ្ដល់សំណងតាមតម្លៃទីផ្សារ និងធ្វើការចរចាជាមុន។ ចំណែកអាជ្ញាធររដ្ឋាភិបាលមានតួនាទីសម្របសម្រួលដោះស្រាយបញ្ហានេះ៖ «និយាយទៅសិទ្ធិលើប្រជាពលរដ្ឋ តើព្រមយកតម្លៃប៉ុណ្ណា។ ទី២ ក្រុមហ៊ុនត្រូវតែសងប្រជាពលរដ្ឋឲ្យតែប៉ះលើដីពលរដ្ឋ»។
កាលពីខែមិថុនា ឆ្នាំ២០១៧ ពលរដ្ឋ ៩គ្រួសាររស់នៅឃុំភ្លុក ស្រុកសេសាន ទាមទារឲ្យក្រុមហ៊ុនទំនប់វារីអគ្គិសនីសេសានក្រោមពីរ ផ្ដល់សំណងផលប៉ះពាល់ដីស្រែរបស់ពួកគេ បន្ទាប់ពីក្រុមហ៊ុនបានជីករណ្ដៅរំដោះទឹក កាយអាចម៍ដី និងស្ថាបនាផ្លូវ ដើម្បីដឹកជញ្ជូនសម្ភារៈធ្វើបង្គោលអគ្គិសនីប៉ះពាល់ដីស្រែរបស់អ្នកភូមិជាច្រើនហិកតារ។ ក្រោយពីការទាមទារបានប្រហែលជា ៣សប្ដាហ៍ ក្រុមហ៊ុនបានផ្ដល់សំណងជូនពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។