Opens in new windowប្រភពពីអាជ្ញាធរខេត្តឧត្តរមានជ័យ ឲ្យដឹងថា ខ្យល់កន្ត្រាក់នៅពេលដែលមានភ្លៀងខ្លាំង បានបក់បោកបំផ្លាញលំនៅឋានរបស់ប្រជាពលរដ្ឋនៅសង្កាត់សំរោង និងសង្កាត់កូនក្រៀល អស់ចំនួន ៧២ខ្នង កាលពីរាត្រីថ្ងៃទី២១ ខែកញ្ញា កន្លងទៅ។
នេះ គឺជាខ្យល់កន្ត្រាក់លើកទី៣ ហើយនៅក្នុងខេត្តឧត្តរមានជ័យ ចាប់តាំងពីរដូវវស្សាបានចាប់ផ្ដើមកាលពីដើមខែមេសា ឆ្នាំ២០១៥ នេះ។
មន្ត្រីសាខាកាកបាទក្រហមនៃខេត្តឧត្តរមានជ័យ និងក្រុមប្រឹក្សាសង្កាត់ចំនួន២ របស់ក្រុងសំរោង កំពុងខ្នះខ្នែងដើរស្រង់ស្ថិតិផ្ទះសម្បែងមួយចំនួន ដែលទទួលរងខូចខាតដោយសារខ្យល់កន្ត្រាក់ពេញ ១ថ្ងៃអង្គារ ទី២២ ខែកញ្ញា។
ការស្រង់ស្ថិតិ បានចាប់ផ្ដើមតាំងពីព្រឹកព្រលឹម បន្ទាប់ពីភ្លៀងបានធ្លាក់ខ្លាំង និងខ្យល់កន្ត្រាក់ បំផ្លាញផ្ទះសម្បែងរបស់ប្រជាពលរដ្ឋអស់ជាច្រើនខ្នងមក។
ចៅសង្កាត់សំរោង គឺលោក ចៀប តុប។ លោកអះអាងកាលពីរសៀលថ្ងៃអង្គារ ទី២២ ខែកញ្ញា ថា ខ្យល់កន្ត្រាក់បានបក់បោកបំផ្លាញលំនៅឋានរបស់ប្រជាពលរដ្ឋចំនួន ៣ភូមិ នៅក្នុងសង្កាត់របស់លោក គឺភូមិគោកចំបក់ ភូមិគោករំដួល និងភូមិកណ្ដែក។ ខ្យល់ដែលបោកបក់ខ្លាំងលាយឡំជាមួយភ្លៀងផង កាលពីវេលាម៉ោងជាង ៨យប់ថ្ងៃទី២១ ខែកញ្ញា នោះ គឺបានបំផ្លាញផ្ទះអស់ចំនួន ៦៩ខ្នង៖ «ភ្លៀងខ្លាំងដែរ គ្រាន់តែរលំផ្ទះអស់ ៩ខ្នង វាប៉ះតាមកន្លែង។ ទិន្នន័យយើងធ្វើតាំងពីយប់ ហើយដល់ព្រឹកឡើងយើងធ្វើទៀត ទើបតែសម្រាក»។
ប្រធានសាខាកាកបាទក្រហមកម្ពុជា ខេត្តឧត្តរមានជ័យ លោក ស សៀកហៀង ឲ្យដឹងថា ខ្យល់កន្ត្រាក់ដែលបោកបក់កាលពីរាត្រីថ្ងៃទី២១ ខែកញ្ញា នោះ គឺបានបំផ្លាញផ្ទះប្រជាពលរដ្ឋអស់ចំនួន ៧២ខ្នងនៅក្នុងសង្កាត់សំរោង និងសង្កាត់កូនក្រៀល។ មន្ត្រីកាកបាទក្រហមកម្ពុជា ដដែលបញ្ជាក់ថា នៅពេលនេះកាកបាទក្រហម មានស្បៀងអាហារ និងតង់កៅស៊ូមួយចំនួន ដើម្បីផ្ដល់ជាជំនួយសង្គ្រោះបន្ទាន់ សម្រាប់អ្នកដែលរងគ្រោះធ្ងន់ធ្ងរ៖ «អ្នកបាត់បង់ទីជម្រក វាមានតែតង់ហ្នឹងឯង ដែលកាកបាទក្រហមគេចែកឲ្យគាត់ធ្វើខ្លួនគាត់ទៅ អាចជ្រកកោនបាន»។
មន្ត្រីក្រុមប្រឹក្សាសង្កាត់សំរោង ឲ្យដឹងថា ក្នុងរយៈពេល ៩ខែនៃឆ្នាំ២០១៥ នេះ គឺខ្យល់កន្ត្រាក់បានបក់បោកខ្លាំងចំនួន ៣លើកហើយ ដោយបានបំផ្លាញផ្ទះសម្បែងប្រជាពលរដ្ឋអស់ចំនួនជាង ១៧០ខ្នង។
ចំណែកមន្ត្រីសាខាកាកបាទក្រហម ខេត្តឧត្តរមានជ័យ ឲ្យដឹងថា ក្នុងរយៈពេល ៩ខែឆ្នាំនេះ គឺខ្យល់កន្ត្រាក់បានបក់បោកលើក្រុងសំរោង ស្រុកត្រពាំងប្រាសាទ និងស្រុកបន្ទាយអំពិល បណ្ដាលឲ្យផ្ទះសម្បែងជិត ២០០ខ្នងរងការខូចខាត មានប្រជាពលរដ្ឋម្នាក់រងរបួស និងក្មេងម្នាក់ផ្សេងទៀតបានស្លាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។