ក្រុមហ៊ុនប្រមូលសំរាម ស៊ីនទ្រី (CINTRI) ដែលវិនិយោគលើការប្រមូលកាកសំណល់រឹង និងដឹកជញ្ជូនសំរាមប្រចាំខេត្តព្រះសីហនុ បានប្រកាសឈប់ប្រមូលសំរាមតាមមូលដ្ឋានក្នុងក្រុងទេសចរណ៍នេះទៀតហើយ ចាប់ពីថ្ងៃទី១៥ ខែសីហា ឆ្នាំ២០១៧ តទៅ។
ប្រធានក្រុមហ៊ុន ស៊ីនទ្រី លោក សេង សាវី បានផ្ញើលិខិតជូនរដ្ឋបាលក្រុងព្រះសីហនុ ខេត្តព្រះសីហនុ ឲ្យដឹងថា មូលហេតុដែលក្រុមហ៊ុននេះសុំឈប់ប្រមូលសំរាមនាក្រុងទេសចរណ៍មួយនេះទៀត ដោយសារក្រុមហ៊ុនបានរកស៊ីខាត។ លោកថា សព្វថ្ងៃនេះមានប្រជាពលរដ្ឋរស់នៅក្នុងក្រុងព្រះសីហនុ ត្រឹមតែ ៤០ភាគរយទេដែលបានបង់សេវាប្រមូលសំរាមឲ្យក្រុមហ៊ុន ស៊ីនទ្រី ក្រៅពីនោះមិនបានបង់ជូនទេ។
លិខិត ឬសំណើសុំផ្អាកការផ្តល់សេវាកម្មប្រមូល សម្អាត និងដឹកជញ្ជូនកាកសំណល់រឹងក្នុងក្រុងព្រះសីហនុ បានផ្ញើជូនរដ្ឋបាលខេត្តព្រះសីហនុ ប្រធានក្រុមហ៊ុន ស៊ីនទ្រី លោក សេង សាវី បានបញ្ជាក់ថា ក្រុមហ៊ុន ស៊ីនទ្រី នឹងឈប់ប្រមូលសំរាមចាប់ពីថ្ងៃទី១៥ ខែសីហា ឆ្នាំ២០១៧ តទៅ។
អភិបាលក្រុងព្រះសីហនុ លោក អ៊ី សុខឡេង មានប្រសាសន៍ថា ប្រសិនបើក្រុមហ៊ុន ស៊ីនទ្រី ឈប់ប្រមូលសំរាម ហើយរដ្ឋបាលក្រុងរបស់ខេត្តរកក្រុមហ៊ុនថ្មីមកជំនួសមិនទាន់ពេលទេ គឺក្នុងមួយសប្តាហ៍សំរាមនៅទូទាំងក្រុងទេសចរណ៍នេះមានចំនួនជិត ១.៥០០តោន (១.៤៧០តោន) នឹងត្រូវគរចោលដូចភ្នំនៅតាមចិញ្ចើមផ្លូវសាធារណៈ។
លោកបន្តថា ក្រោយពេលរដ្ឋបាលក្រុងព្រះសីហនុ ទទួលបានលិខិតសុំឈប់ប្រមូលសំរាមពីក្រុមហ៊ុន ស៊ីនទ្រី រដ្ឋបាលខេត្តក៏បានកោះប្រជុំ និងស្នើសុំឲ្យក្រុមហ៊ុនពិចារណាបន្តសកម្មភាពប្រមូលសំរាមជាថ្មីឡើងវិញ ប៉ុន្តែត្រូវប្រធានក្រុមហ៊ុន ស៊ីនទ្រី យល់ព្រមបន្តប្រមូលសំរាមត្រឹមតែរយៈពេល ១ខែទៀតទេ គឺត្រឹមថ្ងៃទី១៥ ខែកញ្ញា។
ត្រង់ចំណុចនេះ លោក អ៊ី សុខឡេង បញ្ជាក់ថា ក្នុងរយៈពេលត្រឹម ១ខែខាងមុខនេះ រដ្ឋបាលក្រុងព្រះសីហនុ ខេត្តព្រះសីហនុ មិនអាចស្វែងរកក្រុមហ៊ុនថ្មីមកជំនួសក្រុមហ៊ុនចាស់ ដើម្បីប្រមូលសំរាមក្នុងក្រុងឲ្យបានទាន់ពេលទេ ហើយថាបើត្រូវកុម្ម៉ង់ទិញរថយន្តដឹកសំរាមមកពីក្រៅប្រទេស យ៉ាងហោចណាស់ត្រូវការចំណាយពេល ២ខែយ៉ាងតិចដែរ ទើបបានមកដល់។
លោក អ៊ី សុខឡេង បានអំពាវនាវដល់បងប្អូនប្រជាពលរដ្ឋរស់នៅក្រុងព្រះសីហនុ ទាំងអស់ ត្រូវភ្ញាក់រលឹកបង់ថ្លៃសេវាប្រមូលសំរាមជូនក្រុមហ៊ុន ស៊ីនទ្រី ឲ្យបានទាំងអស់គ្នា ដើម្បីឲ្យក្រុមហ៊ុននេះមានលទ្ធភាពផ្តល់សេវាប្រមូល និងដឹកជញ្ជូនសំរាមជូនបងប្អូនជាបន្តទៀត។
ចំណែកលោក យន្ត មីន អភិបាលខេត្តព្រះសីហនុ កន្លងទៅបានអំពាវនាវដល់ប្រតិបត្តិករទេសចរ និងប្រជាពលរដ្ឋទាំងអស់ ត្រូវចូលរួមសហការថែរក្សាអនាម័យ ឬសំរាមដើម្បីរួមចំណែកការពារបរិស្ថានខេត្តទេសចរណ៍មួយនេះឲ្យមានអនាម័យ និងត្រូវចូលរួមបង់ថ្លៃសេវាប្រមូលសំរាមជូនក្រុមហ៊ុន ស៊ីនទ្រី ឲ្យបានជាប្រចាំ។ លោកបន្តថា បញ្ហាសំរាមនេះ រដ្ឋបាលខេត្តកំពុងស្វែងរកក្រុមហ៊ុនថ្មីមកជំនួស ប៉ុន្តែនៅក្នុងកាលៈទេសៈដ៏ប្រញាប់នេះ មិនទាន់រកបានក្រុមហ៊ុនថ្មីមកជំនួសទេ ហើយសំរាមត្រូវបានគេគរទុកចោលនៅតាមចិញ្ចើមផ្លូវសាធារណៈ នាំឲ្យប៉ះពាល់ដល់អារម្មណ៍ភ្ញៀវទេសចរ។
លោក យន្ត មីន ក៏សំណូមពរដល់ប្រជាពលរដ្ឋមួយចំនួនដែលកន្លងទៅបានបោះចោលសំរាមនៅតាមអូរ និងបានដឹកសំរាមតាមរថយន្តយកទៅចាក់ចោលតាមចិញ្ចើមផ្លូវសាធារណៈ និងដីឡូត៍ដែលម្ចាស់ទុកចោលគ្មានការអភិវឌ្ឍជាដើម ត្រូវបញ្ឈប់សកម្មភាពនេះ ហើយងាកមករួមចំណែកថែរក្សាអនាម័យ និងបរិស្ថានក្នុងក្រុងទេសចរណ៍មួយនេះជាមួយរដ្ឋបាលក្រុងព្រះសីហនុ ឲ្យបានទាំងអស់គ្នា។
អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី ព្រួយបារម្ភថា បញ្ហាសំរាមត្រូវគេគរចោលនៅតាមចិញ្ចើមផ្លូវ និងគ្មានរថយន្តមកប្រមូល អាចនាំឲ្យប៉ះពាល់ដល់វិស័យទេសចរណ៍ ឬភ្ញៀវទេសចរដែលចូលមកទស្សនាខេត្តនេះ។ អ្នកស្រីស្នើឲ្យរដ្ឋបាលខេត្ត ត្រូវប្រកាសរកក្រុមហ៊ុនប្រមូលសំរាមថ្មីមកវិនិយោគការប្រមូលសំរាមក្នុងក្រុងព្រះសីហនុ ឲ្យបានឆាប់ និងជួយជំរុញដល់ពលរដ្ឋតាមមូលដ្ឋាន ឲ្យបង់តម្លៃសេវាប្រមូលសំរាមជូនក្រុមហ៊ុនឲ្យបានទៀងទាត់៖ « បើយើងនិយាយពីចំនួនប្រជាពលរដ្ឋរស់នៅក្នុងខេត្តព្រះសីហនុ គឺមានចំនួនច្រើន ប៉ុន្តែបើនិយាយពីអ្នកចូលរួមក្នុងការបង់តម្លៃសេវាប្រមូលសំរាមវិញ គឺមិនទាន់បាន ១០០ % នៃអត្រាប្រជាពលរដ្ឋក្នុងក្រុងទាំងមូលនោះទេ។ ហើយបើយើងនិយាយពីទីកន្លែងប្រកបអាជីវកម្មក៏មានច្រើនដែរនៅក្នុងក្រុងព្រះសីហនុ ហើយមិនមែនតែសំរាមនៅលើដីគោកទេ គឺសំរាមនៅលើកោះក៏ត្រូវដឹកតាមទូកមកចោលនៅលើដីគោកដែរ។ បញ្ហាប្រឈមមួយទៀតសម្រាប់ក្រុមហ៊ុន ស៊ីនទ្រី មិនមានទីតាំង ឬម៉ាស៊ីនសម្រាប់ធ្វើការកែច្នៃសំរាមផ្ទាល់ខ្លួននោះទេ។ ដូច្នេះ បញ្ហាប្រឈមដែលក្រុមហ៊ុន ស៊ីនទ្រី ជួបប្រទះ និងឈប់ទទួលយកសេវាប្រមូលសំរាមនៅក្នុងក្រុងព្រះសីហនុ គឺទំនងជាក្រុមហ៊ុននេះមានបញ្ហាប្រឈមច្រើន »។
អភិបាលក្រុងព្រះសីហនុ លោក អ៊ី សុខឡេង បានឲ្យដឹងថា កន្លងទៅ ទោះបីរដ្ឋបាលក្រុង និងមន្ត្រីមន្ទីរបរិស្ថានខេត្ត បានសហការចាប់រថយន្តដឹកសំរាមដែលពលរដ្ឋមួយចំនួនបានដឹកយកទៅចាក់ចោលគ្មានសណ្ដាប់ធ្នាប់ ឬចាក់ចោលតាមអូរជាដើម ដើម្បីផាកពិន័យជាបន្តបន្ទាប់ ក៏ប៉ុន្តែរហូតមកដល់ពេលនេះនៅមានប្រជាពលរដ្ឋមួយចំនួនទៀតនៅបន្តលួចដឹកកាកសំណល់សំរាម យកទៅចាក់ចោលនៅតាមអូរបង្ហូរទឹក តាមចិញ្ចើមផ្លូវសាធារណៈ និងចាក់ចោលនៅតាមទីតាំងដីឡូត៍ដែលត្រូវម្ចាស់ព័ទ្ធរបងទុកចោលជាដើម ដោយមិនទាន់បានចូលរួមថែរក្សាអនាម័យជាមួយអាជ្ញាធរឲ្យបានត្រឹមត្រូវទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។