អគ្គនាយកដ្ឋានពន្ធនាគារនៃក្រសួងមហាផ្ទៃ ឲ្យដឹងថា អង្គភាពនេះមិនទាន់សម្រេច ឬអាចឆ្លើយតបយ៉ាងណានៅឡើយ ចំពោះការស្នើសុំរបស់មន្ត្រីអង្គការសង្គមស៊ីវិល ដើម្បីសុំសួរសុខទុក្ខសកម្មជនការពារបរិស្ថានចំនួន ៤រូប ដែលកំពុងជាប់ឃុំក្នុងពន្ធនាគារខេត្តកោះកុង នៅឡើយ។
ចំណែកសង្គមស៊ីវិល អះអាងថា នឹងធ្វើយុទ្ធនាការតស៊ូមតិថែមទៀត ប្រសិនបើក្រសួងមហាផ្ទៃ មិនអនុញ្ញាត។
អគ្គនាយកដ្ឋានពន្ធនាគារនៃក្រសួងមហាផ្ទៃ នឹងឆ្លើយតបទៅកាន់សង្គមស៊ីវិលយ៉ាងយូរមួយសប្ដាហ៍ទៀត ក្រោយពេលក្រុមជំនាញពិនិត្យសំណើ និងពិភាក្សាគ្នារួចរាល់។
ការអះអាងរបស់អគ្គនាយកដ្ឋានពន្ធនាគារនៃក្រសួងមហាផ្ទៃ នៅពេលនេះ ធ្វើឡើងបន្ទាប់ពីមន្ត្រីអង្គការសង្គមស៊ីវិលដែលធ្វើការពាក់ព័ន្ធនឹងសិទ្ធិមនុស្ស បានដាក់លិខិតកាលពីថ្ងៃទី២៨ មករា ស្នើសុំចូលសួរសុខទុក្ខសមាជិកអង្គការចលនាមាតាធម្មជាតិ ចំនួន ៣រូប និងតំណាងសហគមន៍អារ៉ែងម្នាក់ទៀត ដែលកំពុងជាប់ឃុំក្នុងពន្ធនាគារខេត្តកោះកុង។
ប្រធានការិយាល័យនាយកដ្ឋានប្រតិបត្តិអគ្គនាយកដ្ឋានពន្ធនាគារនៃក្រសួងមហាផ្ទៃ លោក សុត សុភា បានប្រាប់វិទ្យុអាស៊ីសេរី នៅថ្ងៃទី២ ខែកុម្ភៈ ថា នាយកដ្ឋានលោកមិនទាន់បានពិនិត្យលិខិតស្នើសុំរបស់សង្គមស៊ីវិលនៅឡើយទេ ប៉ុន្តែលោកថា តាមនីតិវិធី ក្រោយបានលិខិតនោះ ក្រុមការងារជំនាញ នឹងពិភាក្សា។ ហេតុនេះ លោកស្នើឲ្យសង្គមស៊ីវិល រង់ចាំយ៉ាងយូរដល់ថ្ងៃច័ន្ទ ទី៨ កុម្ភៈ៖ « ការងារវាចូលមកលេខាធិការដ្ឋាន ប្រធានអគ្គនាយកដ្ឋាន បានបញ្ជូនមកជំនាញ ដល់ពេលជំនាញពិនិត្យរួចហើយ បានសំណើទៅថ្នាក់ក្រោម។ ចឹងហើយយ៉ាងហោចណាស់ចំណាយ ១អាទិត្យដែរ » ។
លិខិតរបស់សង្គមស៊ីវិលដែលបានដាក់ជូនអគ្គនាយកដ្ឋានពន្ធនាគារនៃក្រសួងមហាផ្ទៃ កាលពីថ្ងៃទី២៨ មករា សុំសួរសុខទុក្ខសកម្មជនបរិស្ថាន ៤នាក់ រួមមាន លោក សាន់ ម៉ាឡា លោក ទ្រី សុវីគា លោក ស៊ីម សំណាង ដែលអ្នកទាំងនេះមកពីអង្គការចលនាមាតាធម្មជាតិ និងសកម្មជនម្នាក់ទៀត គឺលោក វ៉ែន វ៉ន ជាតំណាងសហគមន៍អារ៉ែង។
សកម្មជនការពារបរិស្ថាននៃអង្គការចលនាមាតាធម្មជាតិ ទាំង ៣នាក់ ត្រូវបានតុលាការចាប់ខ្លួនកាលពីថ្ងៃទី១៧ ខែសីហា និងចោទប្រកាន់ពីបទគំរាមកំហែង និងធ្វើឲ្យខូចខាត ដែលភ្ជាប់នូវបញ្ជាអ្វីមួយ ខណៈពួកគេចុះធ្វើការនៅក្នុងសហគមន៍ប្រជាពលរដ្ឋក្នុងឃុំកណ្ដោល និងឃុំអណ្ដូងទឹក ស្រុកបុទុមសាគរ កាលពីថ្ងៃទី១៧ ខែសីហា ដដែល ដើម្បីទប់ស្កាត់សកម្មភាពបូមខ្សាច់របស់ក្រុមហ៊ុន ដាយរិក អាកសេស (Direct Access)។
ចំណែក លោក វ៉ែន វ៉ន សកម្មជនអារ៉ែង ត្រូវបានសមត្ថកិច្ចចាប់ខ្លួនកាលពីថ្ងៃទី៧ ខែតុលា ឆ្នាំ២០១៥។ តុលាការចោទប្រកាន់ចំនួនពីរបទល្មើស គឺទាក់ទងប្រមូលអនុផលព្រៃឈើដោយគ្មានការអនុញ្ញាត និងលុបបំបាត់វត្ថុតាង។
អគ្គលេខាធិការនៃគណៈកម្មាធិការប្រព្រឹត្តិកម្ម នៃអង្គការសមាគមការពារសិទ្ធិមនុស្សកម្ពុជា តំណាងសង្គមស៊ីវិលចំនួន ២២ស្ថាប័នទៀតដែលបានដាក់លិខិតសុំការអនុញ្ញាតចូលជួបសួរសុខទុក្ខសកម្មជនទាំង ៤នាក់ លោក សួន ប៊ុនស័ក្តិ យល់ថា ការឆ្លើយតបរបស់អង្គភាពពន្ធនាគារ ហាក់មានភាពយឺតយ៉ាវ។ លោកថា សកម្មភាពចុះសួរសុខទុក្ខរបស់សង្គមស៊ីវិល ក្នុងបំណងលើកទឹកចិត្ត និងចង់ដឹងពីស្ថានភាពរបស់ពួកគាត់ ដែលជាសកម្មជនធ្លាប់ពុះពារលើកិច្ចការសង្គមកន្លងមកប៉ុណ្ណោះ។ តំណាងសង្គមស៊ីវិលរូបនេះ ព្រមានថា នឹងធ្វើយុទ្ធនាការតស៊ូមតិផ្សេងៗ ប្រសិនបើអគ្គនាយកដ្ឋានពន្ធនាគារនៃក្រសួងមហាផ្ទៃ នៅតែយឺតយ៉ាវ ឬមិនយល់ព្រមតាមសំណើសុំសួរសុខទុក្ខនេះ ព្រោះសកម្មជនទាំង ៤នាក់ ខ្លះកំពុងមានជំងឺធ្ងន់ធ្ងរ។ លោកសង្ឃឹមថា អាជ្ញាធរនឹងយល់ព្រមតាមសំណើ ព្រោះសកម្មជនទាំង ៤នាក់កំពុងជួបការលំបាក និងត្រូវការលើកទឹកចិត្ត និងការគាំទ្រ៖ « ទោះបីជាអ្នកកាសែត សង្គមស៊ីវិល មន្ត្រីរដ្ឋាភិបាល និងអ្នកពាក់ព័ន្ធនានា ខាងពន្ធនាគារគួរតែជួយសម្រួល ធ្វើយ៉ាងណាកុំឲ្យមានអំពើពុករលួយ ឬការរំលោភសិទ្ធិមនុស្សផង ចឹងហើយត្រូវតែអនុញ្ញាត »។
ទាំងសមាជិកនៃអង្គការចលនាមាតាធម្មជាតិ និងក្រុមគ្រួសារ ឲ្យដឹងថា ក្នុងចំណោមសកម្មជនទាំង ៤នាក់ មានម្នាក់ គឺលោក ស៊ឹម សំណាង កំពុងមានជំងឺក្រពះធ្ងន់ធ្ងរ រហូតឈានដល់ក្អកធ្លាក់ឈាម។
មន្ត្រីសិទ្ធិមនុស្ស ស្នើរដ្ឋាភិបាល និងអ្នកដែលពាក់ព័ន្ធនានា ជួយអន្តរាគមន៍ឲ្យសកម្មជនបរិស្ថានទាំង ៤នាក់នោះ បានរួចពីការឃុំខ្លួនឡើងវិញ ព្រោះអ្នកទាំង ៤នាក់ គឺជាសកម្មជនដែលគ្រាន់តែធ្វើសកម្មភាពដើម្បីការពារផលប្រយោជន៍សង្គម។ ម្យ៉ាង ការជាប់ឃុំនេះ ធ្វើឲ្យជីវភាពគ្រួសារជួបការលំបាកយ៉ាងខ្លាំង ព្រោះនៅក្នុងគ្រួសារមានកូនតូច និងម្ដាយពិការ ដែលកំពុងមានជំងឺនៅក្នុងបន្ទុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។