បច្ចុប្បន្ន សត្វដំរីនៅប្រទេសកម្ពុជា កំពុងបាត់បង់ស្ទើរតែផុតពូជ នៅស្របពេលដែលព្រៃធម្មជាតិជាច្រើនក៏កំពុងតែវិនាសហិនហោច ព្រមទាំងមានអ្នកប្រមាញ់ខ្លះទៀត នៅតែតាមសម្លាប់ដើម្បីយកភ្លុក និងផ្នែកខ្លះទៀតរបស់ដំរី យកទៅជួញដូរខុសច្បាប់។
ក៏ប៉ុន្តែរយៈពេលបីបួនឆ្នាំចុងក្រោយនេះ អង្គការក្រៅរដ្ឋាភិបាលដែលមានប្រភពមកពីខេត្តឈៀងម៉ៃ នៃប្រទេសថៃ កំពុងប្រឹងប្រែងដាំដុះកូនឈើនៅផ្នែកខ្លះនៃតំបន់ព្រៃស្អាក ក្នុងស្រុកអន្លង់វែង ខេត្តឧត្តរមានជ័យ សម្រាប់ជាជម្រកនៃសត្វដំរីឡើងវិញ។
អង្គការក្រៅរដ្ឋាភិបាលមួយឈ្មោះ ខាំបូឌា វ៉ាលឡាយហ្វ សាំងជូរី (Cambodia Wildlife Sanctuary) កំពុងប្រឹងប្រែងអភិរក្សសត្វដំរីនៅប្រទេសកម្ពុជា ឡើងវិញ ព្រមទាំងមានគម្រោងបង្កាត់ពូជដំរីឲ្យកាន់តែច្រើនឡើង ហើយលែងទៅក្នុងព្រៃធម្មជាតិសម្រាប់អនាគត។
បច្ចុប្បន្ន អង្គការក្រៅរដ្ឋាភិបាលមួយនេះបានទិញសត្វដំរីញីពីភាគឦសានរបស់ប្រទេសកម្ពុជា មកថែរក្សា ព្រមទាំងអភិរក្សនៅតំបន់ព្រៃស្អាក ឃុំអន្លង់វែង ស្រុកអន្លង់វែង ដើម្បីផ្សាំងវាឲ្យចេះរស់នៅតាមបែបធម្មជាតិ។
ប្រធានមន្ទីរបរិស្ថាន ខេត្តឧត្តរមានជ័យ គឺលោក ភួង លីណា។ លោកមានប្រសាសន៍កាលពីថ្ងៃទី១១ ខែមីនា ថា សត្វដំរីញីចំនួន ៤ក្បាលដែលគេទើបតែយកមកថែរក្សានៅតំបន់ព្រៃស្អាកនេះ គឺមានបំណងលែងវាឲ្យចេះរស់នៅក្នុងព្រៃធម្មជាតិនៅទីនេះ ព្រមទាំងការពារវាឲ្យមានសុវត្ថិភាពតាមបែបធម្មជាតិផង៖ « ឆ្លងតាមការសិក្សាព្រៃនៅទីនេះ ជាព្រៃដែលដំរីធ្លាប់រស់នៅតាំងពីយូរលង់ណាស់មកហើយ។ យើងមានបំណងអភិរក្សវានៅក្នុងព្រៃតាមបែបធម្មជាតិ។ ទី២ ការអភិរក្សវានៅកន្លែងនេះ ក៏ដើម្បីវិស័យទេសចរណ៍ »។
ប្រធានមន្ទីរបរិស្ថានដដែលឲ្យដឹងថា តាមគម្រោង អង្គការក្រៅរដ្ឋាភិបាលនឹងទិញសត្វដំរីពីតំបន់ផ្សេងៗ ដើម្បីយកមកអភិរក្សនៅតំបន់ព្រៃស្អាកឲ្យបានចំនួន ២០ក្បាល។ អង្គការអភិរក្សសត្វដំរី ក៏មានគម្រោងបង្កាត់ពូជសត្វដំរីទាំងនោះឲ្យមានចំនួនកាន់តែច្រើននៅតំបន់ព្រៃស្អាកដែរ ក៏ប៉ុន្តែពេលនេះ គឺមិនទាន់មានសត្វដំរីឈ្មោលយកមកបង្កាត់ពូជនៅឡើយ។
អ្នកគ្រប់គ្រងទូទៅរបស់អង្គការ ខាំបូឌា វ៉ាលឡាយហ្វ សាំងជូរី (Cambodia Wildlife Sanctuary) លោក ឆាន់ឆៃ រ៉ូចាណាផន (ChanChai Rojanaphorn) មានប្រសាសន៍ថា អង្គការរបស់លោកបានទទួលមូលនិធិមកអភិរក្សសត្វដំរីនៅព្រៃស្អាកនេះពីប្រទេសថៃ (Thailand) និងប្រទេសកាណាដា (Canada)។ លោកបញ្ជាក់ថា គម្រោងរបស់លោកកំពុងដើរទិញសត្វដំរីឲ្យបានចំនួន ២០ក្បាល ដើម្បីយកមកអភិរក្ស ព្រមទាំងលែងវាឲ្យរស់នៅតាមព្រៃធម្មជាតិ៖ « យើងបានចំណាយប្រាក់ទិញដំរី ១ក្បាលថ្លៃជាង ១លានបាតប្រាក់ថៃ គឺស្មើនឹងជាង ៣ម៉ឺនដុល្លារអាមេរិក។ អង្គការរបស់ខ្ញុំកំពុងប្រឹងប្រែងថែរក្សា និងការពារសត្វដំរីទាំងនេះឲ្យបានល្អបំផុត ព្រមទាំងបានចំណាយប្រាក់ជាច្រើនទៀតទៅលើចំណីអាហាររបស់វា »។
បច្ចុប្បន្ន អង្គការ ខាំបូឌា វ៉ាលឡាយហ្វ សាំងជូរី (Cambodia Wildlife Sanctuary) មានបុគ្គលិកជនជាតិខ្មែរ និងថៃ ប្រមាណ ៦០នាក់ កំពុងបម្រើការងារអភិរក្សសត្វដំរីនេះ ព្រមទាំងមានទាហាន និងកងល្បាតប្រមាណ ១០នាក់ទៀតសម្រាប់ការពារសត្វព្រៃផង។
ជាមួយគ្នានេះដែរ គម្រោងអភិរក្សសត្វដំរីនៅតំបន់ព្រៃស្អាក ក៏កំពុងស្វែងរកគ្រាប់ពូជឈើដើម្បីបណ្ដុះ និងដាំកូនឈើឡើងវិញនៅលើផ្ទៃដីជាង ៤.៣០០ហិកតារ ព្រមទាំងដាំរុក្ខជាតិជាច្រើនប្រភេទទៀតសម្រាប់ទុកជាចំណីសត្វដំរី ឲ្យវាអាចរស់នៅបានសុខសាន្តក្នុងព្រៃធម្មជាតិដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។