ពលរដ្ឋរស់នៅឃុំស្រយង់ ស្រុកគូលែន ខែត្រព្រះវិហារ រិះគន់អាជ្ញាធរខែត្រនេះថា មិនយកចិត្តទុកដាក់អភិរក្សព្រៃឈើនៅតំបន់ប្រាសាទកោះកេរ ឬហៅថា ទីក្រុងបុរាណកោះកេរ។ ការរិះគន់នេះធ្វើឡើងក្រោយពីព្រៃឈើរាប់ពាន់ហិកតារព័ទ្ធជុំវិញឧទ្យានជាតិកោះកេរ ត្រូវបានភ្លើងឆេះសន្ធោសន្ធៅបង្កប៉ះពាល់បរិស្ថាន និងប្រាក់ចំណូលរបស់សហគមន៍។
ក្រុមមគ្គុទ្ទេសក៍ និងពលរដ្ឋសម្ដែងការសោកស្ដាយពីការបាត់បង់ធនធានធម្មជាតិ ដែលធ្លាប់តែផ្ដល់ជាម្លប់បៃតង ទាក់ទាញភ្ញៀវទេសចរ ត្រូវបានបំផ្លាញដោយភ្លើងឆេះជាងមួយសប្ដាហ៍មកហើយ។ ពួកគាត់ទាមទារឲ្យអាជ្ញាធរខែត្រព្រះវិហារ ត្រូវទទួលខុសត្រូវបញ្ហានេះ និងរកមធ្យោបាយយ៉ាងណាថែរក្សាបរិស្ថានជុំវិញប្រាសាទនោះឲ្យប្រសើរឡើងវិញ ជៀសវាងកើតមានបាតុភាពនេះនៅឆ្នាំក្រោយៗទៀត។
ពលរដ្ឋរស់នៅឃុំស្រយង់ ស្រុកគូលែន ខែត្រព្រះវិហារ ថ្លែងក្នុងលក្ខខណ្ឌមិនបញ្ចេញឈ្មោះឲ្យដឹងនៅថ្ងៃទី១៦ ខែកុម្ភៈ ថា បើទោះបីជាប្រាសាទកោះកេរ នៅឆ្ងាយពីទីរួមខែត្រសៀមរាប និងទីរួមខែត្រព្រះវិហារ បន្តិចក្ដី ក៏ប៉ុន្តែប្រាសាទនេះ នៅតែទាក់ទាញភ្ញៀវទេសចរជាតិ និងអន្តរជាតិមកទស្សនា។ លោកថា ការបណ្ដោយឲ្យភ្លើងឆេះព្រៃនៅតំបន់ប្រាសាទកោះកេរធ្ងន់ធ្ងរបែបនេះ នឹងធ្វើឲ្យប្រសាទនេះបាត់បង់សោភ័ណភាព និងបរិស្ថានជុំវិញប្រាសាទ មានសត្វស្លាប និងជីវចម្រុះជាដើម។
លោកបន្ថែមថា ទំហំផលប៉ះពាល់ដោយសារភ្លើងឆេះនេះ ជាផ្នែកមួយដែលធ្វើឲ្យប៉ះពាល់ប្រាក់ចំណូលប្រជាជននៅតំបន់នោះដោយផ្ទាល់ និងដោយប្រយោល៖ «វានឹងបាត់បង់ភាពទាក់ទាញសម្រាប់ទីតាំងប្រាសាទ ព្រោះពេលណាដែលភ្លើងឆេះក្នុងលក្ខណៈតិចតួចមិនអីទេ តែបើពុំមានការការពារនឹងធ្វើឲ្យប៉ះពាល់។ ជាទូទៅប្រាសាទហ្នឹងវាធំ ប៉ុន្តែបើបាត់បង់ភាគណាមួយនៃប្រាសាទដោយសារភ្លើងឆេះ នឹងធ្វើឲ្យបាត់បង់ភ្លើងឆេះ និងសម្រស់ប្រាសាទដែលផ្ដល់ការការពារដោយប្រាសាទដែរ»។
មគ្គុទ្ទេសក៍ដែលតែងតែនាំភ្ញៀវទេសចរទៅទស្សនាប្រាសាទកោះកេរ លោក យន់ សុវណ្ណា ឲ្យដឹងថា នៅគ្រាដែលលោកនាំភ្លៀងទេសចរទៅទស្សនាប្រាសាទកោះកេរ ប្រទះឃើញភ្លើងឆេះព្រៃសន្ធោសន្ធៅ ពុំឃើញមានអាជ្ញាធរណាមកអន្តរាគមន៍ពន្លត់ដើម្បីទប់ស្កាត់កុំឲ្យឆេះរាលដាលនោះទេ បង្កប៉ះពាល់ដល់បរិស្ថានធម្មជាតិជុំប្រាសាទបូរាណជាច្រើននៅតំបន់កោះកេរ។ លោកថា ភ្ញៀវទេសចរបរទេសមួយចំនួនសម្ដែងការសោកស្ដាយ និងបង្ហាញទឹកមុខក្រៀមក្រំ នៅគ្រាដែលពួកគេប្រទះឃើញភ្លើងឆេះព្រៃឈើ ដែលសំបូរដោយប្រាសាទបូរាណជិត ១០០ប្រាសាទ នៅតំបន់នោះ៖ «ម្ដុំហ្នឹងព្រៃទាំងអស់ហ្នឹង ហ៊ុមព័ទ្ធ ហើយខ្ញុំឃើញគេដាក់ស្លាកឧទ្យានជាតិកោះកេរអ៊ីចឹងហើយនៅតែឧទ្យានទេ បើភ្លើងឆេះបាត់ហើយ។ ភ្ញៀវទេសចរគាត់ទៅឃើញប្រាសាទក៏អរដែរ តែឃើញភ្លើងឆេះព្រៃខ្មៅ និងខ្មៅនៅតំបន់ប្រាសាទ គាត់បង្ហាញទឹកមុខក្រៀមក្រំ»។
បុរសដដែលបន្ថែមថា ប្រសិនបើអាជ្ញាធរមានឆន្ទៈការពារបរិស្ថានជុំវិញប្រាសាទបូរាណនៅតំបន់នោះ និងស្វែងរកមូលហេតុបាតុភាពនេះ ពលរដ្ឋមួយចំនួននឹងយល់ដឹងពីគុណវិបត្តិភ្លើងឆេះព្រៃ ហើយអាចនឹងប្ដូរឥរិយាបពួកគាត់ឲ្យស្រឡាញ់បរិស្ថានវិញ៖ «យើងការពារទៅ យើងមានឡានទៅទឹកទៅ ការពារនៅតំបន់នោះ និងសួរនាំមូលហេតុពលរដ្ឋ និងរកមុខអ្នកដុត ហើយដាក់ពិនិត្យអីខ្លះអ៊ីចឹងទៅថ្ងៃក្រោយគេលែងហ៊ាន»។
ឧទ្យានជាតិប្រាសាទកោះកេរ ឬហៅថា ទីក្រុងបុរាណមានព្រៃឈើហ៊ុមព័ទ្ធរាប់ម៉ឺនហិកតារគ្រប់គ្រងដោយអាជ្ញាធរជាតិខែត្រព្រះវិហារ។ តំបន់នោះឋិតនៅទិសខាងកើតឆៀងខាងត្បូងពីទីរួមខែត្រសៀមរាប ចម្ងាយជាង ១០០គីឡូម៉ែត្រ (១២០) និងឋិតនៅទិសខាងលិចឆៀងខាងជើងពីទីរួមខែត្រព្រះវិហារ ចម្ងាយ ៥០គីឡូម៉ែត្រ។
អាស៊ីសេរី មិនអាចរកប្រភពទាក់ទងអភិបាលស្រុកគូលែន ដើម្បីសុំការបំភ្លឺបញ្ហានេះបានទេនៅថ្ងៃទី១៦ ខែកុម្ភៈ។
អ្នកលក់សំបុត្រចូលទស្សនាប្រសាទកោះកេរ លោក ហាប់ សារ៉ា ទទួលស្គាល់ថា ព្រៃនៅតំបន់ប្រសាទកោះកេរ រាប់ម៉ឺនហិកតារត្រូវភ្លើងឆេះ ក៏ប៉ុន្តែអាជ្ញាធរនៅពុំទាន់មានគោលការណ៍ឲ្យប្រសើរណាមួយ ជួយការពារមិនឲ្យភ្លើងឆេះបាននៅឡើយទេ ព្រោះពលរដ្ឋរស់នៅតំបន់នោះ មិនសូវប្រុងប្រយ័ត្នក្នុងការប្រើប្រាស់ភ្លើងដូចជាពួកគាត់ទៅដងជ័រទឹក និងបោះកន្ទុយបារីជាដើម។ លោកក៏សម្ដែងកាសោកស្ដាយ និងផលប៉ះពាល់អវិជ្ជមាននានា បណ្ដាលមកពីភ្លើងឆេះនេះដែរ។ លោកថា ភ្ញៀវបរទេសទិញសំបុត្រចូលទស្សនាប្រាសាទកោះកេរ ក្នុងមួយថ្ងៃចាប់ពី ២០សន្លឹក ទៅ ៥០សន្លឹក ហើយក្នុងសំបុត្រមួយតម្លៃ ១០ដុល្លារ៖ «ធម្មតារឿងហ្នឹងទទួលស្គាល់ហើយ បើយើងអភិរក្សបាន និងមានភ្ញៀវទេសចរច្រើន ហើយក្មេងជំនាក់ក្រោយនឹងស្គាល់ដើមបេង ធ្នង់»។
ប្រាសាទកោះកេរ ឬហៅថា ឧទ្យានជាតិកោះកេរ គឺជាទីក្រុងសម័យបុរាណកោះកេរ បានកសាងឡើង នៅឆ្នាំ៩២៨-៩៤២ ក្នុងរជ្ជកាលព្រះបាទជ័យវរ្ម័នទី៤ ឧទ្ទិសថ្វាយព្រះឥសូរតាមបែបព្រហ្មញ្ញសាសនា។ ប្រាសាទនេះមានទំហំ ១៦គីឡូម៉ែត្រ បួនជ្រុងដែលមានប្រាសាទតូចៗចំនួន ៩៨ ប្រាសាទទៀតនៅតំបន់នោះដែរ។ ប្រាសាទនេះមាន ៧ជាន់ មានកម្ពស់ ៣៥ម៉ែត្រ ជាទីចាប់អារម្មណ៍សម្រាប់ភ្ញៀវទេសចរជាតិ និងអន្តរជាតិ តែងតែឡើងទៅលើកំពូលប្រាសាទគយគន់ទេសភាពស្រស់បំព្រងជុំវិញប្រាសាទដែលដណ្ដប់ដោយព្រៃឈើហ៊ុមព័ទ្ធ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។