ក្រុមសហគមន៍ដែលស្ថិតក្រោមខ្សែទឹកនៃតួមេទន្លេមេគង្គ និងអង្គការសង្គមស៊ីវិលដែលសកម្មក្នុងរឿងតវ៉ាប្រឆាំងការសាងសង់ទំនប់វារីអគ្គិសនីដោយប្រទេសឡាវ ដាក់ការព្រួយបារម្ភចំពោះទំនប់វារីអគ្គិសនីដែលចេះតែបន្តសាងសង់មួយហើយមួយទៀត។ ពលរដ្ឋលើកឡើងថា ប្រទេសឡាវ មិនត្រឹមតែផ្គើនប៉ុណ្ណោះទេ ថែមទាំងហាក់មិនចាប់អារម្មណ៍សោះឡើយចំពោះការតវ៉ាក្នុងពេលកន្លងទៅ ដែលស្នើសុំឲ្យផ្អាកការសាងសង់ទំនប់វារីអគ្គិសនីបណ្ដោះអាសន្នស្ថិតនៅតួមេនៃទន្លេមេគង្គនេះ។
កង្វល់ដែលសហគមន៍ផ្សេងៗគ្នាធ្វើបទបង្ហាញនៅពេលនេះ ស្របពេលទំនប់វារីអគ្គិសនីមួយកន្លែងទៀតស្ថិតនៅចំណុចប៉ាក់បេង ស្ថិតនៅក្នុងប្រទេសឡាវ រកឃើញថា កំពុងផ្ដួចផ្ដើមគម្រោងសាងសង់បន្ថែមទៀត។
កាលពីព្រឹកថ្ងៃទី១៤ ខែមិថុនា អ្នកជំនាញផ្នែកទន្លេមេគង្គ សហគមន៍ និងអង្គការមិនមែនរដ្ឋាភិបាល បានជួបជុំគ្នានៅក្នុងទីក្រុងភ្នំពេញ សម្ដែងការបារម្ភពីគម្រោងថ្មីទៀតរបស់ប្រទេសឡាវ ដែលទាញថាមពលតាមរយៈការសាងសង់ទំនប់វារីអគ្គិសនីប៉ាក់បេង។
តំណាងមកពីសហគមន៍បឹងទន្លេសាប គឺលោកស្រី ឆេង គឹមហេង ត្អូញត្អែរថា ការសាងសង់ទំនប់វារីអគ្គិសនីដែលស្ថិតនៅតួមេនៃទន្លេមេគង្គនេះ ផលប៉ះពាល់មិនត្រឹមតែធ្វើឲ្យជម្រកត្រីពងកូនត្រូវបាត់បង់ របបទឹកភ្លៀងលែងទៀងទាត់ និងសត្វផ្សោតប្រឈមនឹងផុតពូជទេ ហើយបញ្ហានេះថែមទាំងជំរុញឲ្យប្រជាពលរដ្ឋត្រូវបង្ខំចិត្តធ្វើចំណាកស្រុកមានការកើនឡើង ព្រោះតែបាត់បង់ចំណូលនៅក្នុងសហគមន៍ ជាដើម។ ស្របពេលកង្វល់ប្រហាក់ប្រហែលគ្នាត្រូវបានលើកឡើងនៅក្នុងកិច្ចពិគ្រោះយោបល់នេះ លោកស្រី ឆេង គឹមហេង ក៏អំពាវនាវសុំឲ្យរដ្ឋាភិបាលចាត់វិធានការដោយម៉ឺងម៉ាត់ និងអន្តរាគមន៍ដោយម៉ត់ចត់ចំពោះគម្រោងថ្មីទៀតរបស់ប្រទេសឡាវ នៅពេលនេះ។ លោកស្រីបន្តថា« ការសាងសង់ទំនប់នេះវាហាក់បីដូចជាគ្មានប្រយោជន៍អីសម្រាប់ប្រជាពលរដ្ឋនៅជុំវិញបឹងទន្លេសាបទាល់តែសោះ។ ទាក់ទងទៅនឹងការប្រើប្រាស់អគ្គិសនី មិនមានប្រយោជន៍សម្រាប់គាត់ទេ »។
បើទោះជាបែបណា អ្នកជំនាញផ្នែកទន្លេមេគង្គ អះអាងថា មកដល់ពេលនេះ ព័ត៌មានពិស្ដារអំពីគម្រោងអភិវឌ្ឍន៍តាមរយៈការទាញថាមពលពីទំនប់វារីអគ្គិសនីប៉ាក់បេងនេះ គឺឡាវ បិទបាំងរហូត។ ក្រុមសហគមន៍លើកឡើងពីការប្រឈមដូចៗគ្នាថា ការសាងសង់ទំនប់វារីអគ្គិសនីដនសាហុង (Don Sahong) និងទំនប់សាយ៉ាបូរី ជាបញ្ហាស្មុគស្មាញមួយទៅហើយ ឥឡូវនេះបន្ថែមបន្ទុកថ្មីទៀត គឺទំនប់ប៉ាក់បេង នេះទៀត។
នាយិកាប្រតិបត្តិនៃសមាគមថែរក្សាបរិស្ថាន និងវប្បធម៌ និងជាប្រធានគណៈកម្មការគ្រប់គ្រងសម្ព័ន្ធទន្លេកម្ពុជា ផង គឺអ្នកស្រី លុយ រស្មី ថ្លែងថា ប្រទេសឡាវ គួរមានជម្រើសផ្សេងក្រៅពីនេះ ដើម្បីទាញយកថាមពល ហើយរក្សាទុកប្រព័ន្ធអេកូឡូស៊ី និងជីវចម្រុះដែលមានរាប់ពាន់ឆ្នាំមកហើយ ឲ្យសហគមន៍ប្រើប្រាស់វិញ។ អ្នកស្រីឲ្យដឹងថា ការបន្តគម្រោងអភិវឌ្ឍន៍ក្រោមហេតុផលទាញថាមពលពីទំនប់វារីអគ្គិសនីនេះ គឺជាការបោកឆ្នាំងបាយរបស់ពលរដ្ឋរាប់លាននាក់ដែលកំពុងរស់នៅក្រោមខ្សែទឹកនៃដៃទន្លេមេគង្គ។ អ្នកស្រីបន្តថា « ធម្មជាតិនៅក្នុងទន្លេ និងប្រព័ន្ធអេកូឡូស៊ីជាច្រើនទៀតដែលចិញ្ចឹមមនុស្សទៅដល់ជាង ៦០ពាន់លាននាក់នៅតាមដៃទន្លេមេគង្គនេះ »។
អ្នកស្រី លុយ រស្មី លើកឡើងថា កម្ពុជា ត្រូវធ្លាក់ចុះចំណូលពន្ធដែលបានមកពីវិស័យជលផលយ៉ាងខ្លាំងក្នុងដំណាក់កាលចុងក្រោយនេះ។ របាយការណ៍ស្រាវជ្រាវតាមបែបវិទ្យាសាស្ត្របង្ហាញថា ចំណូលពន្ធតែមួយមុខបានមកពីវិស័យជលផលនេះ ក្នុងមួយឆ្នាំៗប្រមាណ ១៧ពាន់លានដុល្លារសហរដ្ឋអាមេរិក។
អាស៊ីសេរី ពុំអាចស្នើសុំការឆ្លើយតបបានទេពីមន្ត្រីរដ្ឋាភិបាល ជុំវិញជំហររបស់សហគមន៍ដែលប្រឆាំងគម្រោងសាងសង់ទំនប់វារីអគ្គិសនីថ្មីបន្ថែមទៀតរបស់ប្រទេសឡាវ នៅថ្ងៃទី១៤ ខែមិថុនា។
របាយការណ៍របស់អង្គការក្រៅរដ្ឋាភិបាល បង្ហាញថា សព្វថ្ងៃមានពលរដ្ឋប្រមាណ ៦០លាននាក់កំពុងអាស្រ័យផលដោយផ្ទាល់ពីទន្លេមេគង្គ និង ៣០លាននាក់ផ្សេងទៀត ពឹងផ្អែកដោយប្រយោលពីទន្លេមេគង្គនេះដែរ។ កន្លងទៅ មានទាំងពលរដ្ឋវៀតណាម ថៃ ភូមា ឡាវ ផ្ទាល់ និងកម្ពុជា ផង តែងតវ៉ា និងដាក់ញត្តិជាដរាបទៅរដ្ឋាភិបាលរៀងៗខ្លួន ប្រឆាំងគម្រោងអភិវឌ្ឍន៍នេះ ក៏ប៉ុន្តែចម្លើយជាវិជ្ជមានតបមកវិញពីអន្តររដ្ឋាភិបាលទាំងនេះ សង្គមស៊ីវិលបញ្ជាក់ថា ហាក់ឆ្លើយតបតិចតួចប៉ុណ្ណោះ។
យ៉ាងនេះក្ដី នាយកប្រតិបត្តិវេទិកានៃអង្គការមិនមែនរដ្ឋាភិបាលស្ដីពីកម្ពុជា (NGO-Forum) លោក តឹក វណ្ណារ៉ា នៅតែមានជំនឿថា ការតស៊ូមតិនេះអាចនឹងមានឥទ្ធិពល។ លោកបន្តថា ការចងក្រងបណ្ដាញរវាងសហគមន៍មួយទៅសហគមន៍មួយផ្សេងទៀត ជាពិសេសការតស៊ូមតិឆ្លងប្រទេស នឹងជាសម្ពាធចំពោះគម្រោងអភិវឌ្ឍន៍នេះ។ លោកបន្តថា « យើងមានជំនឿថាគាត់អាចមានឥទ្ធិពលដើម្បីឲ្យអន្តររដ្ឋាភិបាលគិតគូរពិចារណាឡើងវិញ ទាក់ទងគម្រោងទំនប់វារីអគ្គិសនីតួមេនៃទន្លេមេគង្គ ព្រោះនេះជាក្ដីកង្វល់រួម »។
កិច្ចពិគ្រោះយោបល់ដែលរៀបចំឡើងពេញមួយថ្ងៃនៅថ្ងៃទី១៤ ខែមិថុនា ក៏បើកឲ្យមានការសួរដេញដោល និងស្វែងរកមធ្យោបាយបន្តទៀត ដើម្បីឲ្យការតស៊ូមតិនេះមានប្រសិទ្ធភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។