សហភាពអឺរ៉ុប ប្រចាំប្រទេសកម្ពុជា អំពាវនាវឲ្យអាជ្ញាធរនៃប្រទេសកម្ពុជា និងវៀតណាម ស៊ើបអង្កេតករណីជួញដូរឈើដែលកាប់ចេញពីក្នុងតំបន់ព្រៃអភិរក្សនៃប្រទេសកម្ពុជា។ មន្ត្រីរដ្ឋាភិបាលកម្ពុជា ឆ្លើយតបថា មិនមានករណីដូចនេះកើតឡើងនោះទេ។ ចំណែកសកម្មជនបរិស្ថានវិញថា បទល្មើសព្រៃឈើនេះកើតមានយូរហើយ និងជារៀងរាល់ថ្ងៃ ហើយស្នើឲ្យអាជ្ញាធរមានឆន្ទៈពិតប្រាកដក្នុងការបង្ក្រាប រួចស្នើដល់សហភាពអឺរ៉ុប ដាក់សម្ពាធដល់រដ្ឋាភិបាលទាំងពីរ ដើម្បីជំរុញការទប់ស្កាត់ការកាប់ឈើដោយខុសច្បាប់។
ឯកអគ្គរដ្ឋទូតសហភាពអឺរ៉ុប ប្រចាំប្រទេសកម្ពុជា លោក ច្សច អេដហ្គា (George EDGAR) យល់ថា សកម្មភាពកាប់ឈើដែលពិពណ៌នានៅក្នុងរបាយការណ៍របស់ អ៊ី .អាយ.អេ (EIA)គឺជាការព្រួយបារម្ភធ្ងន់ធ្ងរ នៅពេលនិយាយដល់សារសំខាន់នៃឧទ្យានជាតិវីរជ័យ សម្រាប់ភាពសម្បូរបែបនៃសត្វ និងរុក្ខជាតិ និងការរស់នៅរបស់សហគមន៍មូលដ្ឋាន។
អង្គការការពារបរិស្ថានអន្តរជាតិឈ្មោះទីភ្នាក់ងារស៊ើបអង្កេតបរិស្ថាន ហៅកាត់ថា អ៊ី.អាយ.អេ (EIA) នៅថ្ងៃទី៨ ឧសភា បានចេញរបាយការណ៍ស៊ើបអង្កេតមួយបង្ហាញពីអាជ្ញាធរកម្ពុជា និងវៀតណាម បានឃុបឃិតគ្នាទទួលយកប្រាក់សំណូករាប់លានដុល្លារសហរដ្ឋអាមេរិក ពីឈ្មួញឈើ ជាថ្នូរការបើកផ្លូវឲ្យចូលកាប់ឈើក្នុងតំបន់ព្រៃអភិរក្សនៅប្រទេសកម្ពុជា ហើយអនុញ្ញាតឲ្យដឹកឈើចេញឆ្លងទៅប្រទេសវៀតណាម។ បន្ថែមពីលើនេះ អាជ្ញាធរវៀតណាម បានទទួលសំណូកជាថ្នូរនឹងការសម្របសម្រួលផ្នែកឯកសារផ្លូវច្បាប់ ដើម្បីប្រែក្លាយឈើខុសច្បាប់ដែលដឹកចេញពីកម្ពុជា ទៅជាឈើស្របច្បាប់ សម្រាប់ការនាំចេញទៅប្រទេសទីបី ពិសេសសហភាពអឺរ៉ុប។
ឯកអគ្គរដ្ឋទូតសហភាពអឺរ៉ុប លោក ច្សច អេដហ្គា ថ្លែងប្រាប់អាស៊ីសេរី តាមរយៈអ៊ីមែលនៅថ្ងៃទី៨ ឧសភា ថា សហភាពអឺរ៉ុប ជំរុញឲ្យអាជ្ញាធរនៃប្រទេសកម្ពុជា និងវៀតណាម ស៊ើបអង្កេតជាបន្ទាន់នូវសកម្មភាពខុសច្បាប់ដែលបានរកឃើញដោយអង្គការស៊ើបអង្កេតបរិស្ថាន (EIA) និងចាត់វិធានការម៉ឺងម៉ាត់ប្រឆាំងនឹងបុគ្គល និងក្រុមហ៊ុនដែលត្រូវបានរកឃើញថា មានជាប់ពាក់ព័ន្ធសកម្មភាពកាប់ឈើដោយខុសច្បាប់ ហើយអាជ្ញាធរនៃប្រទេសទាំងពីរ ត្រូវចាត់វិធានការថែមទៀត ដើម្បីការពារកុំឲ្យមានសកម្មភាពខុសច្បាប់ទាំងនេះកើតឡើងទៀតនាពេលអនាគត។
បើយោងតាមការស៊ើបអង្កេតរបស់អង្គការស៊ើបអង្កេតបរិស្ថាន (EIA) គណៈកម្មាធិការនៃខេត្តយ៉ាឡាយ (Gia Lai) នៃប្រទេសវៀតណាម កាលពីថ្ងៃទី៣០ ខែកញ្ញា ឆ្នាំ២០១៦ បានចេញកូតាឲ្យក្រុមហ៊ុនវៀតណាម ចំនួន ១៦ អាចនាំចូលឈើចំនួន ៣០ម៉ឺនម៉ែត្រគូបត្រឹមថ្ងៃទី៣០ ខែឧសភា ឆ្នាំ២០១៧។ អាជ្ញាធរនៃខេត្តនេះ ក៏បានបង្កើតក្រុមភ្នាក់ងារមួយ ដើម្បីធានាថាគ្មានឈើនាំចេញលក់នៅក្រៅប្រទេសដែលកាប់ចេញពីប្រទេសវៀតណាម។
សកម្មជនបរិស្ថានកម្ពុជា លោក អ៊ូច ឡេង និងជាប្រធានអង្គការក្រុមកិច្ចការពិសេសសិទ្ធិមនុស្សកម្ពុជា យល់ថា ការដែលវៀតណាម បើកផ្លូវឲ្យនាំចូលឈើនេះ ធ្វើឲ្យមានការកាប់ព្រៃឈើកាន់តែធ្ងន់ធ្ងរនៅប្រទេសកម្ពុជា។
លោកបន្តទៀតថា អាជ្ញាធរកម្ពុជា គួរយកការរកឃើញរបស់អង្គការទីភ្នាក់ងារស៊ើបអង្កេតបរិស្ថាន (EIA) នេះ ទៅស្រាវជ្រាវបន្ថែម ដើម្បីចាប់ជនល្មើសមកផ្ដន្ទាទោស៖ «»។
លោកនាយករដ្ឋមន្ត្រី ហ៊ុន សែន កាលពីដើមឆ្នាំ២០១៦ បានបង្កើតគណៈកម្មការបង្ក្រាប និងទប់ស្កាត់បទល្មើសព្រៃឈើ ហើយបានអនុញ្ញាតប្រើគ្រាប់រ៉ុកកែតបាញ់ដាក់ជនល្មើសព្រៃឈើ។ រដ្ឋាភិបាលកម្ពុជា ក៏បានហាមមិនឲ្យនាំឈើចេញទៅប្រទេសវៀតណាម។
ក៏ប៉ុន្តែរបាយការណ៍របស់អង្គការបរិស្ថានជាតិ និងអន្តរជាតិ តាមដានឃើញថា ឈើនៅតែត្រូវបានគេកាប់នៅតំបន់ហាមឃាត់ ហើយនាំចេញទៅវៀតណាម។
មន្ត្រីស៊ើបអង្កេតជាន់ខ្ពស់នៃអង្គការ Cambodia’s Timber Trade លោក ម៉ាកឺស ហាដជី (Marcus Hardtke) មានប្រសាសន៍ថា គ្រាប់រ៉ុកកែតដែលលោកនាយករដ្ឋមន្ត្រី ហ៊ុន សែន ប្រកាសក្ដែងៗឲ្យបាញ់បង្ក្រាបបទល្មើសព្រៃឈើ គឺជាគ្រាប់រ៉ុកកែតប្រភេទផាវ ដែលឮតែសំឡេងរន្ទឺ ប៉ុន្តែអត់មានប្រសិទ្ធភាពទេ។
ទិន្នន័យរបស់អង្គការស៊ើបអង្កេតបរិស្ថាន (EIA) បង្ហាញថា ចាប់តាំងពីដើមខែវិច្ឆិកា ឆ្នាំ២០១៦ មក ឈើប្រមាណ ៣០ម៉ឺនម៉ែត្រគូប ត្រូវបានដឹកចេញពីប្រទេសកម្ពុជា ដោយខុសច្បាប់ និងត្រូវអាជ្ញាធរវៀតណាម ជួយប្រែក្លាយជាឈើស្របច្បាប់ ដែលវាមានតម្លៃជាង ១៣លានដុល្លារសហរដ្ឋអាមេរិក។
ចំណែករបាយការណ៍របស់អង្គការ Forest Tradesក៏បានរកឃើញថា ប្រទេសកម្ពុជា បាននាំចេញឈើមានតម្លៃ ១២១លានដុល្លារទៅប្រទេសវៀតណាម ក្នុងរយៈពេល ៩ខែដំបូងនៃឆ្នាំ២០១៦។
អ្នកនាំពាក្យក្រសួងបរិស្ថាន លោក សៅ សុភាព ថ្លែងនៅថ្ងៃទី៨ ឧសភា ថា ក្រសួងកំពុងសិក្សាលម្អិតអំពីការរកឃើញរបស់អង្គការស៊ើបអង្កេតបរិស្ថាន៖ «»។
ចំណែកលោក ឈុំ សុជាត អ្នកនាំពាក្យក្រសួងការពារជាតិ ឲ្យដឹងថា លោកបានអានព័ត៌មានស្ដីពីរបាយការណ៍របស់អង្គការស៊ើបអង្កេតបរិស្ថាន (EIA) ក៏ប៉ុន្តែលោកវាយតម្លៃថា ការរកឃើញមិនឆ្លុះបញ្ចាំងពីការពិត៖ «»។
លោក ម៉ាកឺស ហាដជី (Marcus Hardtke) នៃអង្គការ Cambodia’s Timber Trade ឲ្យដឹងថា រដ្ឋាភិបាលកម្ពុជា ទំនងនៅតែបន្តប្រើយុទ្ធសាស្ត្របែបប្រកែកដូចកូនក្មេង។
ទោះជាយ៉ាងណា ឯកអគ្គរដ្ឋទូតសហភាពអឺរ៉ុប លោក ច្សច អេដហ្គា លើកឡើងថា សហភាពអឺរ៉ុប លើកទឹកចិត្តចំពោះសកម្មភាពដែលអាជ្ញាធរកម្ពុជា បានធ្វើកន្លងមក ដើម្បីការពារបណ្ដាញតំបន់ព្រៃអភិរក្សនៅប្រទេសកម្ពុជា ហើយត្រូវខំប្រឹងធ្វើកិច្ចការនេះបន្ថែមទៀត។
សកម្មជនបរិស្ថាន លោក អ៊ូច ឡេង លើកឡើងថា ប្រសិនបើរដ្ឋាភិបាលតាំងចិត្តបង្ក្រាបបទល្មើសព្រៃឈើ រដ្ឋាភិបាលពិតជាអាចធ្វើបាន៖ «»។
លោកបន្ថែមថា សហភាពអឺរ៉ុប គួរជំរុញរដ្ឋាភិបាលកម្ពុជា និងវៀតណាម ដើម្បីបញ្ចប់ការជួញដូរឈើខុសច្បាប់ ហើយលោកថា ប្រសិនបើសហភាពអឺរ៉ុប ឈប់ទិញឈើពីប្រទេសវៀតណាម ដែលត្រូវគេរកឃើញថា បាននាំចេញឈើខុសច្បាប់ពីប្រទេសកម្ពុជា នោះការកាប់ព្រៃឈើនៅតំបន់អភិរក្ស នឹងអាចទប់ស្កាត់បាន។
នៅថ្ងៃទី១១ ឧសភា សហភាពអឺរ៉ុប និងរដ្ឋាភិបាលវៀតណាម គ្រោងចុះហត្ថលេខាលើកិច្ចព្រមព្រៀងដៃគូស្ម័គ្រចិត្តស្ដីពីការអនុវត្តច្បាប់ព្រៃឈើ អភិបាលកិច្ច និងពាណិជ្ជកម្ម ឬ FLEGT [Voluntary Partnership Agreement (VPA) on Forest Law Enforcement, Governance and Trade]។
លោកឯកអគ្គរដ្ឋទូតសហភាពអឺរ៉ុប ប្រចាំប្រទេសកម្ពុជា បដិសេធមិនបកស្រាយលើកិច្ចព្រមព្រៀងនេះ ដោយលោកថា ក្រុមការងាររបស់លោកនៅប្រទេសកម្ពុជា មិនទទួលខុសត្រូវលើការចរចារឿងនេះ។
ទោះជាយ៉ាងណា លោកធានាថានឹងពាំនាំនូវរបាយការណ៍របស់អង្គការ អ៊ី.អាយ.អេ (EIA) នេះឲ្យក្រុមការងារសហភាពអឺរ៉ុប នៅទីក្រុងប្រ៊ុចសែល (Brussels) ប្រទេសបែលហ្ស៉ិក (Belgium) ដែលធ្វើកិច្ចការនេះបានដឹង។
នៅថ្ងៃទី៨ ឧសភា នេះ អ្នកនាំពាក្យនៃសហភាពអឺរ៉ុប នៅទីក្រុងប្រ៊ុចសែល មិនទាន់ឆ្លើយតបនឹងអ៊ីមែលរបស់អាស៊ីសេរី នៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។