ថ្នាក់ដឹកនាំនៅតាមស្ថាប័នពាក់ព័ន្ធខេត្តព្រះសីហនុ ព្រួយបារម្ភអំពីខ្យល់ព្យុះភ្លៀងបន្តបោកបក់ខ្លាំងនៅថ្ងៃទី១១ ខែសីហា។ អាជ្ញាធរបានអំពាវនាវដល់ប្រតិបត្តិករទេសចរណ៍ ឬប្រជានេសាទ ពិសេសភ្ញៀវទេសចរជាតិ អន្តរជាតិ ត្រូវប្រុងប្រយ័ត្នខ្ពស់អំពីសុវត្ថិភាពធ្វើដំណើរទៅកម្សាន្តតាមបណ្ដាកោះនានានៅក្នុងខេត្តនេះ។
សារអំពាវនាវនេះ កើតឡើងស្របពេលខ្យល់ព្យុះភ្លៀងបានបន្តបោកបក់ខ្លាំងពេញមួយថ្ងៃ នាមូលដ្ឋានខេត្តព្រះសីហនុ បណ្ដាលឲ្យជំនន់ទឹកភ្លៀងលិចផ្លូវធ្វើដំណើរ ផ្ទះប្រជាពលរដ្ឋ និងទីផ្សារជាដើម នៅថ្ងៃព្រហស្បតិ៍ ទី១១ ខែសីហា។
ត្រង់ចំណុចនេះ អភិបាលខេត្តព្រះសីហនុ លោក យន្ត មីន បានរំលឹកដល់សមត្ថកិច្ចស្ថាប័នពាក់ព័ន្ធមូលដ្ឋាននេះ ត្រូវសហការគ្នាត្រៀមលក្ខណៈជួយសង្គ្រោះប្រជាពលរដ្ឋប្រកបរបរលើលំហសមុទ្រ ពិសេសភ្ញៀវទេសចរជាតិ អន្តរជាតិ ដែលនិយមទៅកម្សាន្តតាមកោះនានា។ លោកបានណែនាំឲ្យសមត្ថកិច្ចជំនាញចុះណែនាំដល់ប្រជានេសាទ និងអ្នកបម្រើការសេវាទេសចរណ៍ដឹកជញ្ជូនតាមសមុទ្រ ត្រូវគិតអំពីសុវត្ថិភាពភ្ញៀវទេសចរឲ្យបានច្រើនថែមទៀតនៅពេលមានព្យុះភ្លៀងកំពុងបោកបក់ខ្លាំង។
លោក យន្ត មីន សង្កត់ធ្ងន់ថា សមត្ថកិច្ចត្រូវហាមប្រតិបត្តិករទេសចរណ៍ទាំងនោះមិនឲ្យចេញទូកដឹកជញ្ជូនភ្ញៀវនៅពេលកំពុងមានព្យុះភ្លៀងនោះទេ គឺត្រូវស្នើឲ្យផ្អាកជាបណ្ដោះអាសន្ន ដោយរង់ចាំរលកសមុទ្រស្ងប់ព្យុះភ្លៀងទើបអនុញ្ញាតឲ្យដំណើរឡើងវិញ។
ស្រដៀងគ្នាដែរ លោក ឌឹម សំបូរ អនុប្រធានអង្គភាពបង្ក្រាបបទល្មើសលើផ្ទៃសមុទ្រផ្ដល់សម្ភាសន៍តាមទូរស័ព្ទថា ស្ថាប័នខ្លួនក៏មិនខុសគ្នានឹងអង្គភាពដទៃទៀតដែរ គឺបានត្រៀមទូក ឬកប៉ាល់បំពាក់សម្ភារៈសង្គ្រោះ និងកម្លាំងជំនាញប្រចាំការជាអចិន្ត្រៃយ៍ រង់ចាំជួយសង្គ្រោះប្រជាពលរដ្ឋ ទោះមានរបរជាអ្នកនេសាទ ឬភ្ញៀវទេសចរក្តី ពេលពួកគេជួបគ្រោះអាសន្ននៅលើលំហសមុទ្រនៅរដូវមានភ្លៀងធ្លាក់ខ្លាំងនេះ។
លោក ឌឹម សំបូរ ប្រកាសលេខទូរស័ព្ទសម្រាប់សង្គ្រោះបន្ទាន់ជូនប្រជាពលរដ្ឋ ពិសេសភ្ញៀវទេសចរនៅពេលជួបគ្រោះអាសន្នលិចទូក ឬមានបញ្ហាផ្សេងៗ នៅលើលំហសមុទ្រមកកាន់ស្ថាប័នលោកដើម្បីបញ្ជូនកម្លាំងសង្គ្រោះឲ្យបានទាន់ពេល តាមរយៈទូរស័ព្ទ ១២ ៦៤៥ ៧៧៧ និង ០៩៧ ៣០៤ ៥៧៧៧។
ត្រង់ចំណុចនេះ លោក ប៊ួន ណារិទ្ធិ មន្ត្រីសម្របសម្រួលអង្គការលីកាដូ (LICADHO) ប្រចាំខេត្តព្រះសីហនុ ដែលផុងខ្លួនក្នុងការិយាល័យ ដាច់បាយក្រហាយទឹក និងរាំងស្ទះមិនអាចធ្វើដំណើរចុះពិនិត្យការងារមួយចំនួននៅជាយក្រុង ដោយសារផ្លូវលិចទឹកបញ្ជាក់ថា បញ្ហាលិចលង់នេះ ម្យ៉ាងគឺបណ្ដាលមកពីអាជ្ញាធរខេត្តនេះ មិនបានស្ថាបនាលូ បង្ហូរទឹកឲ្យបានគ្រប់ចំនួន ហើយទឹកភ្លៀងបានហូរកាត់ផ្លូវគ្រប់ច្រក ព្រោះគ្មានប្រភពបង្ហូរទឹកចេញ។ ម្យ៉ាងទៀត គឺបណ្ដាលមកពីប្រជាពលរដ្ឋភាគច្រើនបានយកសំរាមទៅបោះចោលក្នុងអូរ ឬលូបង្ហូរទឹក នាំឲ្យស្ទះចរន្តទឹកមិនអាចហូរបានដោយរលូន។ ជាងនេះទៀត ក៏មានប្រជាពលរដ្ឋមួយចំនួនបានយកដីចំណីមាត់អូរបង្ហូរទឹក ចាក់ដីលុបសម្រាប់សង់លំនៅឋានរស់នៅអនាធិបតេយ្យជាដើម៖ «កត្តាមនុស្ស គឺដោយសារតែរីកចម្រើនខាងសេដ្ឋកិច្ច ត្រូវម្ចាស់ផ្ទះ ឬអ្នកមានទីលំនៅក្នុងក្រុងមួយចំនួនចាប់ផ្ដើមពង្រីកទីតាំងដីឡូត៍ របស់ខ្លួនសង់ជាបន្ទប់ជួល ហើយបានសាងសង់រំលោភទៅលើទៅដីចំណីលូ និងអូរធម្មជាតិសម្រាប់បង្ហូរទឹកនៅក្នុងក្រុងយើងនេះ»។
ចាប់ពីព្រឹកព្រលឹមរហូតមកដល់រសៀលថ្ងៃព្រហស្បតិ៍ ទី១១ ខែសីហា នាតំបន់ឆ្នេរខេត្តព្រះសីហនុ គេសង្កេតឃើញខ្យល់ព្យុះភ្លៀងបានបោកបក់មកយ៉ាងខ្លាំងបណ្ដាលឲ្យផ្លូវថ្នល់ក្រាលកៅស៊ូសំខាន់ៗផ្ទះប្រជាពលរដ្ឋ និងទីផ្សារមួយចំនួននាខេត្តទេសចរណ៍មួយនេះ ត្រូវលិចលង់ធ្ងន់ធ្ងរស្ទើរមិនអាចឲ្យមធ្យោបាយធ្វើដំណើរបើកឆ្លងកាត់បានទេពេលកំពុងមានភ្លៀងធ្លាក់។ ក្នុងនោះមាននៅម្ដុំផ្សារវាលរេញ ស្ថិតក្នុងស្រុកព្រៃនប់ និងផ្លូវក្រាលកៅស៊ូជាច្រើននៅក្នុងក្រុងព្រះសីហនុ គឺនៅម្ដុំផ្លូវសេតេ ផ្លូវអូរសំអាត ឬផ្លូវអូរ១ ជាដើម ត្រូវជំនន់ទឹកភ្លៀងជន់លិចធ្ងន់ធ្ងរ។ ជំនន់ទឹកភ្លៀងនេះ នាំឲ្យផ្លូវក្រាលកៅស៊ូ ទីផ្សារ និងផ្ទះប្រជាពលរដ្ឋនៅតាមតំបន់ខ្លះក្នុងក្រុងព្រះសីហនុ ត្រូវទឹកភ្លៀងជនលិចចាប់ពីត្រឹមជង្គង់រហូតត្រឹមចង្កេះក៏មាន។ ចំណែកស្ថានភាពនៅតាមតំបន់ឆ្នេរ និងនៅលើលំហសមុទ្រនាខេត្តព្រះសីហនុវិញ គឺមានខ្យល់បោកបក់ និងមានព្យុះភ្លៀងខ្លាំងនៅថ្ងៃព្រហស្បតិ៍ ទី១១ ខែសីហា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។