ព្រះសង្ឃ និងប្រជាពលរដ្ឋជាច្រើន កំពុងប្រឹងប្រែងការពារព្រៃឈើសម្រាប់លក់ឥណទានកាបូនទៅឲ្យអន្តរជាតិមួយទំហំជាង ១ម៉ឺន ៨ពាន់ហិកតារ នៅក្នុងភូមិសាស្ត្រប្រជុំបីស្រុក គឺក្រុងសំរោង ស្រុកចុងកាល់ និងស្រុកអន្លង់វែង ខេត្តឧត្តរមានជ័យ។
ក៏ប៉ុន្តែបច្ចុប្បន្ន ព្រៃឈើដែលការពារដោយសហគមន៍សង្ឃរុក្ខវ័ន្តនេះ កំពុងទទួលរងការលួចកាប់ពីក្រុមជនល្មើសយ៉ាងខ្លាំងក្លា ហើយអ្នកលួចកាប់ឈើខ្លះក្នុងចំណោមនោះ ក៏មានជាប់ពាក់ព័ន្ធនឹងទាហានប្រដាប់ដោយអាវុធដែរ។
សហគមន៍ការពារព្រៃឈើសង្ឃរុក្ខវ័ន្ត ខេត្តឧត្តរមានជ័យ បានចោទប្រកាន់ទាហានខ្លះក្នុងអង្គភាពកងពលតូចលេខ៤២ ថាបានធ្វើសកម្មភាពប្លន់យកវត្ថុតាង នៃបទល្មើសព្រៃឈើជាច្រើនប្រភេទពីគណៈកម្មការ ដែលទើបតែបង្ក្រាបបានពីក្រុមអ្នកលួចកាប់ឈើខុសច្បាប់។
ប្រធានសហគមន៍ការពារព្រៃឈើសង្ឃរុក្ខវ័ន្ត គឺព្រះភិក្ខុ ប៊ុន សាលួត។ ព្រះអង្គមានថេរដីកានៅរាត្រីថ្ងៃទី៧ ខែមិថុនា ថា កាលពីថ្ងៃទី៦ ខែមិថុនា កន្លងទៅ ព្រះអង្គបានដឹកនាំគណៈកម្មការសហគមន៍របស់ព្រះអង្គ ចុះបង្ក្រាបបទល្មើសព្រៃឈើនៅតំបន់ភ្នំរូងដែក ក្នុងភូមិសាស្ត្រភូមិចារ នៃឃុំលំទង ស្រុកអន្លង់វែង។ ការចុះល្បាតការពារព្រៃឈើនោះ គឺនៅវេលាម៉ោងប្រហែលជា ១០ព្រឹក ក្រុមគណៈកម្មការបានប្រទះឃើញមនុស្សមួយក្រុម កំពុងតែលួចកាប់ឈើនៅក្នុងព្រៃសហគមន៍ ក៏ចាត់វិធានការបង្ក្រាប។ ភ្លាមៗនោះ ក្រុមអ្នកលួចកាប់ឈើក៏នាំគ្នារត់ចោលម៉ាស៊ីនអារឈើចំនួន ៣គ្រឿង ម៉ូតូចំនួន ២គ្រឿង ព្រមទាំងក្ដារចំនួន ៥២សន្លឹក។ ព្រះភិក្ខុ ប៊ុន សាលួត មានព្រះថេរដីកាទៀតថា បន្ទាប់មកគណៈកម្មការសហគមន៍ការពារព្រៃឈើ បានរឹបអូសយកវត្ថុតាងទាំងនោះដឹកតាមគោយន្ត ១គ្រឿង ត្រឡប់មកកន្លែងស្នាក់នៅក្នុងទឹកដីក្រុងសំរោង វិញ ក៏ប៉ុន្តែទើបតែមកដល់ពាក់កណ្ដាលផ្លូវ ស្រាប់តែមានទាហាន ៨នាក់ប្រដាប់ដោយអាវុធចំនួន ២ដើម មកសម្លុតគំរាម ហើយដណ្ដើមយកវត្ថុតាងនៃបទល្មើសព្រៃឈើទៅវិញអស់៖ «ទាហាននោះជាក្រុមដែលគេទៅដោះមីនឲ្យក្រុមហ៊ុនស៊ីណូហាយដ្រូ (Shino Hydro) ក្នុងអង្គភាពកងពលតូចលេខ៤២ នៃវរៈលេខ៤២១ មកប្លន់យកទៅវិញមិនដឹងយកទៅណា អាត្មាកំពុងតែឆ្ងល់»។
ទោះយ៉ាងណា វិទ្យុអាស៊ីសេរី មិនអាចទាក់ទងមេបញ្ជាការកងពលតូចលេខ៤២ លោកឧត្តមសេនីយ៍ ប៉ែន វ៉ូយ ដើម្បីសុំប្រតិកម្មជុំវិញការចោទប្រកាន់នេះបានថាយ៉ាងណានៅឡើយ។
ចំណែកអភិបាលខេត្តឧត្តរមានជ័យ លោក ស ថាវី មានប្រសាសន៍ថា លោកទើបតែបានទទួលព័ត៌មាននេះពីព្រះភិក្ខុ ប៊ុន សាលួត។ លោក ស ថាវី បញ្ជាក់ទៀតថា លោកកំពុងចាត់មន្ត្រីជំនាញឲ្យចុះពិនិត្យរឿងនេះ ថាតើអ្នកទៅគំរាមកំហែង និងដណ្ដើមយកវត្ថុតាងបទល្មើសព្រៃឈើពីសហគមន៍សង្ឃរុក្ខវ័ន្តនោះ គឺពិតជាទាហានមែន ឬក៏គ្រាន់តែក្រុមជនដែលលួចកាប់ឈើបន្លំខ្លួន? លោក ស ថាវី បង្ហាញជំហរថា អាជ្ញាធរខេត្តឧត្តរមានជ័យ នៅតែគាំទ្រសហគមន៍សង្ឃរុក្ខវ័ន្ត ក្នុងកិច្ចការពារព្រៃឈើទំហំជាង ១ម៉ឺន ៨ពាន់ហិកតារឲ្យគង់វង្ស៖ «ខ្ញុំនៅតែចាត់វិធានការតាមផ្លូវច្បាប់ដដែល ហើយបើមានបទល្មើសនោះមែន គឺយើងនឹងចាត់ការតាមនីតិវិធី បញ្ជូនទៅតុលាការ»។
អ្នកសម្របសម្រួលសមាគមការពារសិទ្ធិមនុស្សអាដហុក (adhoc) ខេត្តឧត្តរមានជ័យ លោក ស្រី ណារ៉េន មានប្រសាសន៍ថា នៅតំបន់ជាប់ព្រំដែនខ្មែរ-ថៃ នេះ ទាហានខ្លះគ្មានវិន័យ និងមិនស្គាល់តួនាទីរបស់ខ្លួន ថាសព្វថ្ងៃត្រូវការពារអ្វីទេ។ លោកបញ្ជាក់ថា ព្រៃសហគមន៍ជាច្រើនកន្លែងទៀតក្នុងខេត្តឧត្តរមានជ័យ ត្រូវទទួលរងការកាប់បំផ្លាញ ហើយអ្នកពាក់ព័ន្ធមួយចំនួន គឺទាហាន។
ព្រៃសហគមន៍សង្ឃរុក្ខវ័ន្តទំហំ ១៨.២៦១ហិកតារ គឺជាព្រៃតំណាងឲ្យតំបន់អាស៊ីប៉ាស៊ីហ្វិក ដែលរដ្ឋាភិបាលខ្មែរធ្លាប់បានចុះហត្ថលេខា លក់ឥណទានកាបូនទៅឲ្យទីផ្សារអន្តរជាតិ។ ដូច្នេះ ព្រៃនេះមានសារសំខាន់យ៉ាងខ្លាំងសម្រាប់ជួយដល់បរិស្ថានពិភពលោក ដែលមិនអាចឲ្យបាត់បង់ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។