តំណាងសហគមន៍ការពារព្រៃឈើភូមិឡែ ឃុំលំជ័រ ស្រុកអូរយ៉ាដាវ ខេត្តរតនគិរី ចោទប្រកាន់កូនប្រុសប្រធានភូមិ ថាគំរាមសមាជិកសហគមន៍ដែលជូនដំណើរសកម្មជនអង្គការអាដហុក (ADHOC) ចុះពិនិត្យព្រៃការពារ ខណៈកូនប្រុសមេភូមិ កំពុងដឹកជញ្ជូនឈើដែលពួកគេកាប់យកពីក្នុងព្រៃអភិរក្ស។
តំណាងសហគមន៍ការពារព្រៃឈើភូមិឡែ អះអាងថា នឹងរៀបចំពាក្យប្ដឹងកូនប្រុសមេភូមិឡែ ទៅស្ថាប័នអយ្យការពីបទកាប់យកឈើក្នុងព្រៃការពារ និងគំរាមក្រុមល្បាតសហគមន៍ដែលចុះពិនិត្យកន្លែងកាប់យកឈើខុសច្បាប់នោះ។
ក្រុមល្បាតសហគមន៍បីនាក់ រួមដំណើរជាមួយមន្ត្រីផ្នែកអង្កេតសមាគមអាដហុក ខេត្តរតនគិរី កាលពីថ្ងៃទី១៩ ខែឧសភា បានចុះទៅមើលទីតាំងកាប់ឈើមួយកន្លែងក្នុងតំបន់ព្រៃការពារសហគមន៍ ហើយបានប្រទះឃើញកូនប្រុសប្រធានភូមិ គឺលោក សល់ វិត និងបក្សពួកមានគ្នា ៨នាក់ កំពុងជញ្ជូនឈើដែលពួកគេអារយកពីព្រៃ ដាក់លើរថយន្ត។ គ្រានោះ កូនប្រធានភូមិបានកាន់ដំបងដើរមកគំរាមក្រុមល្បាតមិនឲ្យថតសកម្មភាព និងរថយន្តពួកគេ ព្រមទាំងទាញយកទូរស័ព្ទអនុប្រធានសហគមន៍មកពិនិត្យរករូបថតដែលគេសង្ស័យថា សហគមន៍បានថតទុក។
អនុប្រធានសហគមន៍ភូមិឡែ កញ្ញា រម៉ាស់ គុជ បញ្ជាក់នៅថ្ងៃទី២១ ខែឧសភា ថា សហគមន៍ និងមន្ត្រីសិទ្ធិមនុស្ស បានផ្តល់ព័ត៌មាននេះជូនអាជ្ញាធរឃុំភ្លាមក្រោយការគំរាម។ កញ្ញាបញ្ជាក់ថា កូនប្រធានភូមិឡែ គឺជាមុខសញ្ញាអ្នកពាក់ព័ន្ធកាប់យកឈើមូលក្នុងព្រៃការពារ លក់ទៅឲ្យឈ្មួញច្រើនខែមកហើយ បើទោះបីសហគមន៍បានធ្វើរបាយការណ៍សុំឲ្យអាជ្ញាធរទប់ស្កាត់ ក៏ប៉ុន្តែមិនឃើញមានចំណាត់ការអ្វីឡើយ៖ « គាត់ថាបើចង់សុខ កុំថត បើមិនចង់សុខ ថតទៅ ប្រយ័ត្ន ! គាត់ខ្លាចខ្ញុំថតគាត់កំពុងលើកឈើដាក់ឡាន »។
ឆ្លើយតបការចោទប្រកាន់នេះ កូនប្រុសប្រធានភូមិ គឺលោក សល់ វិត បដិសេធថាមិនបានគំរាមសហគមន៍ និងមន្ត្រីសិទ្ធិមនុស្សទេ ក៏ប៉ុន្តែទទួលស្គាល់ថា ពិតជាកាប់យកឈើមកធ្វើលំនៅឋាន។ លោកថា ឈើក្នុងព្រៃការពារត្រូវបានសមាជិកសហគមន៍ភូមិឡែ និងសហគមន៍ជិតខាងចូលកាប់អស់ស្ទើរគ្មានសល់ ដោយសារតែក្រុមសមត្ថកិច្ចនៅតំបន់នោះ គឺជាអ្នកទទួលយកផលប្រយោជន៍ពីអ្នកកាប់ឈើ៖ « ខ្ញុំអារជាលក្ខណៈគ្រឿងផ្ទះខ្ញុំទេ ថ្ងៃមុនអាដហុកចូលទៅខ្ញុំ សួរមនុស្សស្រី ខ្ញុំថាថតស្អីខ្ញុំដឹកសសរផ្ទះខ្ញុំទេ។ ខ្ញុំអត់មានដឹកឈើប្រណិតស្អី »។
អាជ្ញាធរឃុំប៉ាតេ រួមជាមួយសហគមន៍ភូមិឡែ គ្រោងដាក់ពាក្យប្ដឹងសមាជិកសហគមន៍ ១១នាក់ ក្នុងនោះមានកូនប្រុសប្រធានភូមិ ទៅស្ថាប័នអយ្យការដោយសារតែពាក្យប្ដឹងរបស់សហគមន៍សុំឲ្យអាជ្ញាធរជួយទប់ស្កាត់ មិនឃើញមានចំណាត់ការពីអាជ្ញាធរពាក់ព័ន្ធ។
មេឃុំលំជ័រ លោក សេវ ស្វាន បញ្ជាក់ថា សហគមន៍បានផ្តល់ព័ត៌មានទាក់ទិនការគំរាមរបស់កូនប្រធានភូមិ និងការកាប់ឈើក្នុងព្រៃ។ ហេតុនេះ លោកនឹងធ្វើរបាយការណ៍បន្ថែមករណីនេះជូនអាជ្ញាធរស្រុក៖ « ធ្វើរបាយការណ៍ទៅស្រុក យើងទៅមើលជាក់ស្តែងមើលឈើហ្នឹងយ៉ាងម៉េច »។
មន្ត្រីផ្នែកអង្កេតសមាគមអាដហុក (ADHOC) លោក សេង ហាន បានថតរូបឈើដែលក្រុមជនល្មើសកាប់នៅក្នុងព្រៃការពារ ដើម្បីធ្វើរបាយការណ៍អង្កេតបទល្មើសព្រៃឈើនៅភូមិឡែ។ លោកថា សកម្មភាពកូនប្រុសមេភូមិនៅក្នុងព្រៃ គឺជាការគំរាមកំហែងសហគមន៍ និងមន្ត្រីសិទ្ធិមនុស្ស៖ « ទង្វើទាំងអស់ហ្នឹងជាទង្វើខុសច្បាប់ អាជ្ញាធរគួរតែចុះទប់ស្កាត់ »។
កាលពីចុងខែមីនា ក្រុមល្បាតសហគមន៍ និងមន្ត្រីអាដហុក រងការគំរាមសម្លាប់ពីសមាជិកសហគមន៍អ្នកកាប់យកឈើក្នុងព្រៃការពារ ខណៈពួកគេចុះពិនិត្យមើលកន្លែងកាប់ឈើក្នុងព្រៃការពារភូមិឡែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។