ប្រជាពលរដ្ឋខេត្តព្រះសីហនុ ព្រួយបារម្ភចំពោះសារជាតិពុល ឬជាតិគីមីនានា តាមរយៈការបង្ហូរទឹកកខ្វក់ ឬទឹកស្អុយចេញពីរោងចក្រ និងសហគ្រាសផ្សេងៗ នាខេត្តព្រះសីហនុ ចូលទៅតំបន់រក្សាប្រភពទឹកស្អាតក្បាលឆាយ ដោយមិនឆ្លងកាត់អាងចម្រោះទឹកស្អាតត្រឹមត្រូវ។
បញ្ហានេះ ក្រុមប្រជាពលរដ្ឋបានស្នើដល់រដ្ឋាភិបាល ពិសេសថ្នាក់ដឹកនាំស្ថាប័នពាក់ព័ន្ធខេត្តព្រះសីហនុ មានវិធានការទប់ស្កាត់ ឬគ្រប់គ្រងការបង្ហូរទឹកកខ្វក់តាមលូ ឬអូរចូលទៅក្នុងតំបន់ទឹកស្អាតក្បាលឆាយ ឲ្យបានត្រឹមត្រូវ។
មន្ត្រីស្ថាប័នពាក់ព័ន្ធខេត្តព្រះសីហនុ នៅមិនទាន់គ្រប់គ្រងកាកសំណល់សំរាម និងទឹកស្អុយកខ្វក់ដែលត្រូវម្ចាស់សណ្ឋាគារ ផ្ទះសំណាក់ ក្រុមហ៊ុន និងសហគ្រាសនានា បង្ហូរតាមលូ ឬអូរចូលទៅក្នុងតំបន់រក្សាប្រភពទឹកស្អាតក្បាលឆាយឲ្យបានត្រឹមត្រូវទេ។
ផ្ដើមពីបញ្ហានេះ ប្រជាពលរដ្ឋមានលំនៅឋាននៅក្នុងសង្កាត់លេខ១ ខេត្តព្រះសីហនុ បង្ហាញក្តីព្រួយបារម្ភពីសារធាតុគីមីផ្សេងៗ ដែលអាចហូរចូលទៅក្នុងតំបន់ស្តុកទឹកសាប ឬទឹកស្អាតក្បាលឆាយសម្រាប់ប្រើប្រាស់ក្នុងខេត្តជាប់មាត់សមុទ្រមួយនេះ។
តំណាងប្រជាពលរដ្ឋម្នាក់មានលំនៅឋានក្នុងសង្កាត់លេខ១ ខេត្តព្រះសីហនុ លោក ព្រំ វុទ្ធី ឲ្យដឹងថា នៅពេលភ្លៀងធ្លាក់មកម្តងៗ លោកតែឃើញកាកសំណល់ និងទឹកមានពណ៌ខ្មៅខាប់ ត្រូវក្រុមហ៊ុនសហគ្រាស និងប្រជាពលរដ្ឋ បោះចោលបង្ហូរតាមលូ និងប្រឡាយចូលទៅតំបន់ស្តុកទឹកស្អាតក្បាលឆាយ ក្នុងសង្កាត់១ ខេត្តព្រះសីហនុ។
ពលរដ្ឋរូបនេះ ស្នើដល់អភិបាលខេត្តព្រះសីហនុ លោក ឈិត សុខុន និងស្ថាប័នពាក់ព័ន្ធជួយមានវិធានការអប់រំ ឬទប់ស្កាត់បញ្ហានេះ ឲ្យបានទាន់ពេលវេលាដើម្បីសុវត្ថិភាព និងសុខភាពពលរដ្ឋក្នុងមូលដ្ឋាននៅថ្ងៃអនាគត៖ «ការប៉ះពាល់មកពីរោងចក្រ គឺបានបង្ហូរកាកសំណល់ជាច្រើនពីរោងចក្រញ៉ូស្តារ ចូលមកក្នុងអូរ ឬប្រឡាយ។ រោងចក្រនៅពេលមានភ្លៀងបានឆ្លៀតឱកាសបានបង្ហូរកាកសំណល់ផ្សេងៗមកតាមទឹកភ្លៀង។ កាកសំណល់ និងទឹកស្អុយកខ្វក់ទាំងនេះ គឺបានបង្ហូរចេញពីផ្ទះជួល និងរោងចក្រជាដើម។ ទឹកអូរហូរទៅក្បាលឆាយនេះ ឥឡូវសូម្បីតែត្រីក្ដាម ក៏មិនអាចរស់នៅបានដូចពីមុនទៀតទេ។ ដូច្នេះមានន័យថា ទឹកបង្ហូរតាមប្រឡាយទៅតំបន់ក្បាលឆាយអាចមានបញ្ហាអ្វីកើតឡើងហើយ ទើបបានជាត្រី និងក្ដាមមិនអាចរស់នៅក្នុងទឹកអូរហ្នឹងបានទៀត»។
ដូចគ្នាដែរ សម្រាប់ពលរដ្ឋច្រើនទៀត ក៏ព្រួយបារម្ភពីកាកសំណល់ និងទឹកលូស្អុយដែលក្រុមហ៊ុន ឬសហគ្រាសនានា បង្ហូរតាមលូ និងតាមប្រឡាយ ហូរធ្លាក់ចូលទៅតំបន់រក្សាប្រភពទឹកស្អាតតំបន់ក្បាលឆាយ។ ពលរដ្ឋខេត្តព្រះសីហនុ ស្នើឲ្យមន្ត្រីពាក់ព័ន្ធខេត្តនេះ ជួយគិតគូរលើបញ្ហាគ្រប់គ្រងកាកសំណល់ ឬទឹកស្អុយចេញពីរោងចក្រ និងសហគ្រាសនានាឲ្យបានត្រឹមត្រូវ៖ «មិនមែនតែក្រុមគ្រួសារខ្ញុំទេ គឺប្រជាពលរដ្ឋទូទៅបានប្រើទឹកនៅតំបន់ក្បាលឆាយ។ ដូច្នេះបើទឹកបង្ហូរតាមលូ ឬប្រឡាយនេះធ្លាក់ទៅតំបន់ក្បាលឆាយពិតមែន គួរតែអាជ្ញាធរក្រុង និងរដ្ឋាភិបាលជួយមានវិធានការទប់ស្កាត់កាកសំណល់ និងទឹកកខ្វក់បង្ហូរចូលទៅតំបន់ក្បាលឆាយឡើងវិញ។ ខ្ញុំព្រួយបារម្ភថា នៅពេលមានភ្លៀងធ្លាក់មកម្តងៗ មិនដឹងថា កាកសំណល់រឹងរាវ និងប្រេងម៉ាស៊ីនខាប់ហូរតាមប្រឡាយមកណាទេ។ ព្រោះឃើញទឹកនៅក្នុងអូរ ឬប្រឡាយសុទ្ធតែប្រេងម៉ាស៊ីនខាប់ខ្មៅនៅក្នុងទឹក។ ខ្ញុំខ្លាចប្រជាពលរដ្ឋនៅម្តុំតំបន់ក្បាលឆាយ មានជំងឺផ្សេងៗ ហើយតំបន់ក្បាលឆាយនេះ គឺប្រជាពលរដ្ឋនៅទូទាំងខេត្តព្រះសីហនុ បានយកទឹកនោះមកប្រើប្រាស់ ដូច្នេះបើកាលណាទឹកកខ្វក់ ឬកាកសំណល់ផ្សេងៗហូរចាក់ទៅតំបន់ក្បាលឆាយ គឺអាចនឹងអាចមានគ្រោះថ្នាក់ដល់ប្រជាពលរដ្ឋប្រើប្រាស់ទឹក»។
ទាក់ទិនបញ្ហានេះ លោក ហែម សារឿន ប្រធានមន្ទីរបរិស្ថានខេត្តព្រះសីហនុ បានគេចវេះមិនធ្វើអត្ថាធិប្បាយជុំវិញបញ្ហាបង្ហូរកាកសំណល់ និងទឹកស្អុយចូលទៅតំបន់ស្តុកទឹកក្បាលឆាយនេះទេ។
យ៉ាងនេះក្តី លោក ឈិត សុខុន អភិបាលខេត្តព្រះសីហនុ ធ្លាប់បានបញ្ជាក់ថា អាជ្ញាធរធ្លាប់បានណែនាំដល់គ្រប់ម្ចាស់ធ្វើអាជីវកម្មនានា និងប្រជាពលរដ្ឋត្រូវទុកដាក់កាកសំណល់រាវរឹងឲ្យបានត្រឹមត្រូវ ជាពិសេសនៅតាមក្រុមហ៊ុនសហគ្រាស ផ្ទះសំណាក់ និងសណ្ឋាគារជាដើម ត្រូវបង្កើតឲ្យមានអាងចម្រោះទឹកស្អាតមុននឹងបង្ហូរទឹកកខ្វក់ទាំងនោះចូលសមុទ្រ។
ជាងនេះទៀត លោក ថោង ខុន រដ្ឋមន្ត្រីក្រសួងទេសចរណ៍ ក៏ធ្លាប់បានចុះណែនាំដល់ម្ចាស់ប្រកបអាជីវកម្មតាមឆ្នេរ និងដីកោះ ត្រូវវេចខ្ចប់កាកសំណល់ និងបង្កើតឲ្យមានអាងចម្រោះទឹកកខ្វក់ នៅតាមទីកន្លែងរៀងៗខ្លួន មុននឹងបង្ហូរចូលសមុទ្រ ឬបង្ហូរតាមលូ។
ទោះយ៉ាងណា ប្រជាពលរដ្ឋអះអាងថា ម្ចាស់សហគ្រាសរោងចក្រ សណ្ឋាគារ ឬផ្ទះសំណាក់ជាដើម មិនបានគោរព ឬអនុវត្តតាមការណែនាំនេះទេ ហើយបានបន្តបង្ហូរកាកសំណល់ មានថង់ប្លាស្ទិក ឬទឹកស្អុយកខ្វក់ចូលសមុទ្រនៅបន្តកើតមាន ហើយមន្ត្រីជំនាញខេត្តព្រះសីហនុ ក៏មិនឃើញមានវិធានការទប់ស្កាត់ ឬវិធានការតាមផ្លូវច្បាប់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។