អង្គការមូលនិធិសកលសម្រាប់អភិរក្សធនធានធម្មជាតិប្រចាំកម្ពុជា (WWF-Cambodia) រកឃើញថា សត្វផ្សោតនៅតាមដងទន្លេមេគង្គនៅខែត្រក្រចេះ និងខែត្រស្ទឹងត្រែង កើនឡើង ១០ក្បាលក្នុងឆ្នាំ២០១៦ ក្នុងនោះ ៧ក្បាលនៅខែត្រក្រចេះ និង ៣ក្បាលទៀតនៅខែត្រស្ទឹងត្រែង។
របាយការណ៍របស់អង្គការមូលនិធិសកលសម្រាប់អភិរក្សធនធានធម្មជាតិប្រចាំកម្ពុជា (WWF-Cambodia) បង្ហាញថា អត្រាស្លាប់របស់សត្វផ្សោតនៅទន្លេមេគង្គខែត្រក្រចេះ នៅឆ្នាំ២០១៦ ធ្លាក់ចុះ ៣០ភាគរយ បើធៀបនឹងឆ្នាំ២០១៥ និងថយចុះ ៦៨ភាគរយបើធៀបកាលពីឆ្នាំ២០០៦។
មន្ត្រីផ្នែកទំនាក់ទំនងនៃអង្គការមូលនិធិសកលសម្រាប់អភិរក្សធនធានធម្មជាតិប្រចាំកម្ពុជា លោក ឆេង សំបូរ មានប្រសាសន៍ថា បើទោះបីជាចំនួនសត្វផ្សោតនៅឆ្នាំ២០១៦ នេះកើនឡើងក្តី ក៏ប៉ុន្តែការប្រឈមគ្រោះថ្នាក់របស់សត្វផ្សោតនៅតែមានកម្រិតខ្ពស់នៅឡើយ ដូចជាបទល្មើសនេសាទឋិតក្នុងតំបន់ហាមឃាត់នៅរដូវប្រាំង ឬឋិតក្នុងទីតាំងសត្វផ្សោតរស់នៅ និងការអភិវឌ្ឍទំនប់វារីអគ្គិសនីតាមដងទន្លេមេគង្គ បណ្ដាលឲ្យប្រែប្រួលគុណភាពទឹក ហើយអាចប៉ះពាល់ដល់ការចិញ្ចឹមជីវិតរបស់សត្វផ្សោត៖ « សត្វផ្សោតរស់នៅក្នុងអន្លង់មានទឹកជ្រៅ នៅពេលដែលគុណភាពទឹកប្រែប្រួល ធ្វើឲ្យសត្វផ្សោតលំបាកក្នុងការធ្វើដំណើរ។ ចឹងផ្សោតច្បាស់ជាមិននៅមួយកន្លែងទេ ហើយកន្លែងដែលមួយហ្នឹង មិនមែនតែផ្សោតនៅទេ ច្បាស់ជាមានត្រីផ្សេងៗនៅហ្នឹង ដែលផ្តល់ឱកាសងាយស្រួលដល់អ្នកនេសាទទៅចាប់ត្រី ទៅយកត្រី។ បញ្ហាទាំងអស់ហ្នឹងជាក្តីបារម្ភមួយដែលខាងអង្គការសង្គមស៊ីវិលយើងកំពុងព្រួយបារម្ភ »។
លោក ឆេង សំបូរ បន្ថែមថា តួលេខចុងក្រោយដែលរកឃើញដោយអង្គការ WWF ឲ្យដឹងថា សត្វផ្សោតនៅទន្លេមេគង្គនៅខែត្រក្រចេះ និងខែត្រស្ទឹងត្រែង មានចំនួន ៨០ក្បាល ហើយចំនួននេះក៏ងាយនឹងជិតផុតពូជផងដែរ។ អង្គការ WWF ចាត់ទុកសត្វផ្សោតជាប្រភពប្រាក់ចំណូលយ៉ាងសំខាន់ចំពោះសេដ្ឋកិច្ចប្រទេសកម្ពុជា និងផ្តល់អត្ថប្រយោជន៍ច្រើនដល់សហគមន៍ តាមរយៈវិស័យទេសចរណ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។