ប្រមុខដឹកនាំរាជរដ្ឋាភិបាល បានរំលឹកដល់ថ្នាក់ដឹកនាំនៅតាមរាជធានី-ខេត្តនៅទូទាំងប្រទេស ពិសេសរដ្ឋបាលខេត្តព្រះសីហនុ ត្រូវការពារតំបន់ឆ្នេរសមុទ្រ និងអភិរក្សធនធានធម្មជាតិនៅតាមមូលដ្ឋានរៀងៗខ្លួនឲ្យបានគង់វង្ស ប្រយោជន៍ដើម្បីទប់ស្កាត់មហិច្ឆតារំលោភកាន់កាប់របស់បុគ្គលមានអំណាចមួយចំនួន។
ការប្រកាសព្រមានមន្ត្រីថ្នាក់ក្រោមរបស់លោកនាយករដ្ឋមន្ត្រី នៅក្នុងវេទិកាស្ដីពីការពារ និងអភិរក្សធនធានធម្មជាតិ ដែលរៀបចំឡើងនៅវិមានសន្តិភាពនៅព្រឹកថ្ងៃទី២២ ខែសីហា។
ប្រមុខដឹកនាំបានលើកឡើងបែបនេះ គឺចង់សំដៅទៅដល់ថ្នាក់ដឹកនាំនៅតាមក្រសួងពាក់ព័ន្ធមួយចំនួន ត្រូវការពារ និងអភិរក្សធនធានធម្មជាតិនានា មានបទល្មើសព្រៃឈើ បទល្មើសនេសាទខុសច្បាប់ ពិសេសត្រូវរក្សាតំបន់ឆ្នេរសមុទ្រ និងថែរក្សាអនាម័យបរិស្ថានឆ្នេរនានានៅខេត្តជាប់សមុទ្រទាំង៤ ឲ្យបានគង់វង្ស និងសមជាឆ្នេរស្អាតលំដាប់ពិភពលោក។
លោកនាយករដ្ឋមន្ត្រី ហ៊ុន សែន បានរំលឹកដល់ថ្នាក់ដឹកនាំក្រសួង និងថ្នាក់ដឹកនាំនៅតាមខេត្តជាប់ឆ្នេរសមុទ្រទាំង៤ មានខេត្តកែប កំពត ព្រះសីហនុ និងខេត្តកោះកុង ត្រូវពង្រឹងការការពារធនធានធម្មជាតិ ឬទប់ស្កាត់បទល្មើសព្រៃកោងកាង និងបទល្មើសនេសាទខុសច្បាប់ ពិសេសត្រូវការពារឆ្នេរសមុទ្រដែលជាតារារះនាទិសនិរតីឲ្យបានគង់វង្ស និងស័ក្តិសមការប្រសិទ្ធិនាម៖ «ដីព្រៃកោងកាងនៅតាមខេត្តជាប់ឆ្នេរសមុទ្រទាំង៤ ហ្នឹង ដកតែកម្មសិទ្ធិចេញ វាក្លាយទៅជាទ្រព្យសម្បត្តិរបស់រដ្ឋដោយស្វ័យប្រវត្តិហើយ។ អ៊ីចឹងរឿងនេះ ឯកឧត្តម ជា សុផារ៉ា ត្រូវពិនិត្យមើលឡើងវិញអំពីបញ្ហាទាក់ទងទៅនឹងតំបន់ឆ្នេរ ការចាក់ដីលុបព្រៃកោងកាង និងលុបឆ្នេរសមុទ្រ។ បញ្ហាចាក់ដីលុបព្រៃកោងកាងនេះ ប្រធានគណៈកម្មការទាក់ទងទៅនឹងដីតំបន់ឆ្នេរ គឺរដ្ឋមន្ត្រីក្រសួងដែនដី ហ្នឹងហើយ ព្រមទាំងក្រសួងមួយចំនួនទៀត បូករួមរដ្ឋបាលខេត្តជាប់សមុទ្រទាំង ៤ ខេត្តកោះកុង ព្រះសីហនុ កំពត និងខេត្តកែប។ អ៊ីចឹងសូមកុំមើលស្រាលអំពីបញ្ហាការអភិវឌ្ឍនៅតាមតំបន់ឆ្នេរដែលការអភិវឌ្ឍនោះនាំទៅដល់ការបំផ្លិចបំផ្លាញធនធានធម្មជាតិ និងបរិស្ថានរបស់ប្រទេសយើង»។
លោកនាយករដ្ឋមន្ត្រីបានរំលឹកដូច្នេះ គឺជាការឆ្លើយតបសំណូមពរ និងការព្រួយបារម្ភរបស់តំណាងមន្ត្រីសង្គមស៊ីវិល និងផ្នែកពាក់ព័ន្ធមួយចំនួន ដែលបានលើកឡើងនៅក្នុងវេទិកាជាតិលើកទីពីរនេះ។
ប្រធានអង្គការស្រាវជ្រាវជាតិកម្ពុជា ឬហៅកាត់ថា ស៊ីអ៊ិនរ៉ូ (CNRO) សាខាខេត្តព្រះសីហនុ លោក សុខ សុខុម មានប្រសាសន៍ថា កន្លងទៅ ធនធានធម្មជាតិមានដីព្រៃកោងកាង និងដីចំណីឆ្នេរសមុទ្រជាដើម ត្រូវមន្ត្រីមានអំណាច និងឈ្មួញមានទ្រព្យមួយចំនួនឃុបឃិតជាមួយមន្ត្រីនៅតាមមន្ទីរជំនាញខ្លះនៃរដ្ឋបាលខេត្តនេះ បានទន្ទ្រានធ្វើកម្មសិទ្ធិ ប៉ុន្តែអាជ្ញាធរខេត្តមិនហ៊ានទប់ស្កាត់ទេ។ ជាក់ស្តែង ដីគម្របព្រៃឈើបៃតងឆ្នាំ២០០២ ដីព្រៃកោងកាងមានទីតាំងនៅក្រុងព្រះសីហនុ នៅស្រុកព្រៃនប់ និងស្រុកស្ទឹងហាវ ជាដើម ត្រូវមន្ត្រីមានអំណាច និងឈ្មួញមួយចំនួនទន្ទ្រានធ្វើកម្មសិទ្ធិ ហើយថែមទាំងមានប្លង់កម្មសិទ្ធិស្របច្បាប់ចេញដោយស្ថាប័នជំនាញថែមទៀតផង៖ «សូមគោរពសម្តេចតេជោនាយករដ្ឋមន្ត្រី សូមមានវិធានការឲ្យបានតឹងរ៉ឹង ដើម្បីការពារធនធានធម្មជាតិព្រៃកោងកាង ជីវចម្រុះឲ្យបានគង់វង្ស បើមិនដូច្នេះទេ ផលប៉ះពាល់គឺធនធានធម្មជាតិ និងជីវចម្រុះ នឹងកើតមានឡើងដោយបាត់បង់ទាំងឆ្នេរសមុទ្រ បាត់បង់ទាំងធនធានធម្មជាតិ បាត់បង់ទាំងភ្ញៀវទេសចរជាតិ អន្តរជាតិ ដែលគេមកកម្សាន្តប្រទេសកម្ពុជា ដែលជាតំបន់ឆ្នេរស្អាតបំផុតនៅលើពិភពលោក»។
ឆ្លើយតបបញ្ហានេះ អភិបាលខេត្តព្រះសីហនុ លោក យន្ត មីន មានប្រសាសន៍ថា នឹងខិតខំការពារធនធានធម្មជាតិ និងជីវចម្រុះនានាដែលមាននៅមូលដ្ឋាននេះ ឲ្យស្របតាមការចង្អុលបង្ហាញរបស់ប្រមុខដឹកនាំ ដោយធានាការពារមិនឲ្យមានអ្នករំលោភបំពានខុសច្បាប់ទៀតទេ។ លោកបន្តថា កន្លងទៅ រដ្ឋបាលខេត្តព្រះសីហនុ បានសហការជាមួយក្រសួងស្ថាប័នជំនាញពាក់ព័ន្ធ និងប្រជាពលរដ្ឋក្នុងមូលដ្ឋាន ការពារធនធានធម្មជាតិ និងការងារថែរក្សាអនាម័យបរិស្ថានឆ្នេរសមុទ្រជាដើមមានដំណើរការល្អ៖ «អារឿងដីព្រៃកោងកាងមានប្លង់កម្មសិទ្ធិរួចហើយ ហើយថ្នាក់ជាតិដឹកនាំដោយឯកឧត្តម ជា សុផារ៉ា មានចំណាត់ការដូចម្តេច ឬខិតខំទ្រព្យសម្បត្តិដែលយើងខិតខំការពារបាន គឺយើងខិតខំការពារជាបន្តទៀត ហើយគាត់មកសហការឲ្យខេត្តចូលរួមទៀត គឺរដ្ឋបាលខេត្តនឹងបន្តអនុវត្តការងារហ្នឹងជាមួយថ្នាក់ដឹកនាំថ្នាក់ជាតិជាបន្តទៀត គឺមិនមានបញ្ហាអ្វីកើតឡើងនោះទេ»។
ទាក់ទិនបញ្ហានេះ អ្នកឃ្លាំមើលការអភិវឌ្ឍសង្គមមួយចំនួន បានស្វាគមន៍ចំពោះយន្តការការពារធនធានធម្មជាតិ និងការរកដំណោះស្រាយបញ្ហាផ្សេងៗទៀតរបស់លោកនាយករដ្ឋមន្ត្រី ហ៊ុន សែន នៅក្នុងវេទិកាស្ដីពីការការពារ និងអភិរក្សធនធានធម្មជាតិពេលនេះ។ ទន្ទឹមគ្នានេះ អ្នកឃ្លាំមើលសង្គមទាំងនោះ ក៏ស្នើឲ្យប្រមុខដឹកនាំជួយតាមដានទៅលើសកម្មភាពរបស់ថ្នាក់ដឹកនាំនៅតាមរាជធានី-ខេត្តទូទាំងប្រទេស ថាតើបានចុះអនុវត្តការងារការពារធនធានធម្មជាតិ មានព្រៃកោងកាង និងដីចំណីឆ្នេរសមុទ្រ ជាដើម មានប្រសិទ្ធភាពដែរឬទេ ព្រោះតាមការកត់សម្គាល់កន្លងទៅ ការអនុវត្តមិនមានប្រសិទ្ធភាពនោះទេ។
ទាក់ទិនបញ្ហានេះ កន្លងទៅ ដីចំណីឆ្នេរសមុទ្រ ដីព្រៃកោងកាង និងដីបឹងអូរធម្មជាតិជាដើម មានទីតាំងនៅតាមតំបន់មួយចំនួននាស្រុកព្រៃនប់ ស្រុកស្ទឹងហាវ និងក្រុងព្រះសីហនុ ត្រូវឈ្មួញ និងមន្ត្រីមានអំណាចមួយចំនួនបានឃុបឃិតជាមួយមន្ត្រីជំនាញខ្លះនៃរដ្ឋបាលខេត្តព្រះសីហនុ បានទន្ទ្រានធ្វើកម្មសិទ្ធិឯកជន ហើយថាសកម្មភាពដឹកដីលុបព្រៃកោងកាង និងដីចំណីឆ្នេរសមុទ្រនាខេត្តព្រះសីហនុ កន្លងទៅ គឺបានបំផ្លាញដល់ព្រៃកោងកាងដែលជាជម្រកត្រីសមុទ្រគ្រប់ប្រភេទបន្តពូជ និងបំផ្លាញជីវចម្រុះបាតសមុទ្រមានផ្កាថ្ម ជាដើម។
យ៉ាងនេះក្តី លោកនាយករដ្ឋមន្ត្រី ហ៊ុន សែន បានប្រកាសឲ្យមន្ត្រីក្រោមឱវាទត្រូវផ្ដោតការយកចិត្តទុកដាក់ និងជំរុញឲ្យថ្នាក់ដឹកនាំខេត្តជាប់ឆ្នេរសមុទ្រទាំង៤ ត្រូវពង្រឹងទៅលើការងារការពារជីវចម្រុះ ធនធានធម្មជាតិនានា និងថែរក្សាអនាម័យបរិស្ថានឆ្នេរសមុទ្រ ឬដីចំណីឆ្នេរសមុទ្រ ជាដើម ដើម្បីអភិរក្ស និងរក្សាឲ្យបានគង់វង្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។