មន្ត្រីមន្ទីរបរិស្ថានខេត្តព្រះវិហារ អំពាវនាវឲ្យប្រជាពលរដ្ឋរស់នៅតាមដងស្ទឹងសែន នៃស្រុកជ័យសែន និងស្រុករវៀង កុំយកត្រីដែលងាប់គ្រប់ប្រភេទទៅចម្អិនធ្វើម្ហូប ឬក៏យកទៅលក់ឲ្យអ្នកដទៃឲ្យសោះ ខ្លាចក្រែងមានការប៉ះពាល់ដល់សុខភាពដោយប្រការណាមួយ។
ការអំពាវនាវ បានធ្វើឡើងបន្ទាប់ពីរយៈពេលជាងមួយសប្ដាហ៍មកហើយ នៅតាមដងស្ទឹងសែន គឺមានត្រីងាប់ជាបន្តបន្ទាប់ ដោយគេមិនទាន់ហ៊ានសន្និដ្ឋានថា បណ្ដាលមកពីអ្វីនៅឡើយទេ។
ក្រុមការងារជំនាញរបស់មន្ទីរបរិស្ថានខេត្តព្រះវិហារ បានចុះទៅពិនិត្យនៅតាមដងស្ទឹងសែនជាច្រើនកន្លែង នៅថ្ងៃច័ន្ទ ទី២៧ ខែមីនា ដើម្បីស្វែងរកមូលហេតុឲ្យពិតប្រាកដថា តើត្រីជាច្រើនប្រភេទរាប់ម៉ឺនក្បាលដែលកំពុងតែងាប់បន្តបន្ទាប់គ្នាបណ្ដាលមកពីអ្វី?
ប្រជាពលរដ្ឋម្នាក់ក្នុងចំណោមជាច្រើនទៀតរស់នៅភូមិសំរោង នៃឃុំតស៊ូ ស្រុកជ័យសែន គឺលោក ថាច កួយ។ លោកមានប្រសាសន៍នៅរសៀលថ្ងៃច័ន្ទ ទី២៧ ខែមីនា ថា រយៈពេល ៣ថ្ងៃមកហើយនៅតាមដងស្ទឹងសែន ជិតកន្លែងពួកគាត់រស់នៅ គឺមានត្រីជាច្រើនប្រភេទងាប់បន្តបន្ទាប់គ្នា។ លោក និងអ្នកភូមិជាច្រើន បាននាំគ្នាអុំទូកដើររើសត្រីងាប់ទាំងនោះយកទៅចម្អិនធ្វើម្ហូប និងខ្លះទៀតយកទៅទុកធ្វើជាប្រហុក។
លោក ថាច កួយ បញ្ជាក់ទៀតថា បច្ចុប្បន្ន ត្រីកំពុងបន្តងាប់នៅតាមដងស្ទឹងសែន នៃភូមិដូនម៉ា ក្នុងឃុំរក្សា ស្រុករវៀង ចម្ងាយជាង ១០គីឡូម៉ែត្រប៉ែកខាងក្រោមទៀត៖ « នៅតែងាប់ ធំក៏មាន តូចក៏មាន។ ត្រីចម្រុះងាប់អណ្ដែតពេញទឹក មានត្រីឆ្លាំង ត្រីតានិល ត្រីខ្យា »។
អ្នកភូមិមិនដឹងពីមូលហេតុអ្វីច្បាស់លាស់ ដែលបណ្ដាលឲ្យត្រីងាប់នោះទេ ប៉ុន្តែគេសង្ស័យថា ប្រហែលបណ្ដាលមកពីក្រុមហ៊ុនស្ករអំពៅរបស់ចិន ឈ្មោះ រួយ ហ្វេង (Rouy Feng) បង្ហូរជាតិពុលចូលទៅក្នុងស្ទឹង ពីព្រោះតែគេឃើញទឹកស្ទឹងសែនមានពណ៌ខ្មៅ ព្រមទាំងមានក្លិនស្អុយផង។
ប្រធានមន្ទីរបរិស្ថានខេត្តព្រះវិហារ លោក អ៊ា សុខា មានប្រសាសន៍ថា លោកបានដឹកនាំក្រុមមន្ត្រីជំនាញចុះពិនិត្យមើលស្ថានភាពត្រីរាប់ម៉ឺនក្បាល ដែលងាប់នៅតាមដងស្ទឹងសែននោះហើយ ក៏ប៉ុន្តែលោកមិនទាន់ហ៊ានសន្និដ្ឋានថា តើបណ្ដាលមកពីមូលហេតុអ្វីនៅឡើយទេ។
លោក អ៊ា សុខា អំពាវនាវឲ្យប្រជាពលរដ្ឋដែលរស់នៅតាមដងស្ទឹងសែន នៃស្រុកជ័យសែន និងស្រុករវៀង កុំរើសយកត្រីដែលងាប់នោះយកទៅចម្អិនទទួលទាន និងលក់ដូរឡើយ ខ្លាចក្រែងប៉ះពាល់ដល់សុខភាពដោយប្រការណាមួយ៖ « គាត់សប្បាយ ឃើញត្រីមានច្រើន គាត់នាំគ្នាឆក់យកទៅលក់ដូរ។ ខ្ញុំសូមឲ្យប្រជាពលរដ្ឋផ្អាកការយកត្រីនោះសិន ដើម្បីរង់ចាំលទ្ធផលតើបណ្ដាលមកពីអ្វីពិតប្រាកដ ?»។
មន្ត្រីបរិស្ថានបានដងយកទឹកស្ទឹងសែននោះបញ្ជូនទៅពិនិត្យនៅមន្ទីរពិសោធន៍ ហើយក៏សង្ស័យទៅលើអ្នកភូមិខ្លះ អាចដាក់ថ្នាំពុលដើម្បីចាប់យកត្រីដែរ។
ទោះជាយ៉ាងណា ក្រុមការងារបណ្ដាញសហគមន៍ស្រុកឆែប និងស្រុកជ័យសែន លោក វង្ស សុខេងលី នៅតែសង្ស័យថា មូលហេតុដែលត្រីរាប់ម៉ឺនក្បាលងាប់នៅតាមដងស្ទឹងសែននោះ អាចបណ្ដាលមកពីក្រុមហ៊ុនចិន រួយ ហ្វេង បង្ហូរកាកសំណល់មានជាតិពុលចេញពីរោងចក្រស្ករអំពៅ។
លោក វង្ស សុខេងលី អះអាងថា កាលពីឆ្នាំ២០១៣ គឺធ្លាប់មានហេតុការណ៍ពុលត្រីងាប់នៅតាមដងស្ទឹងសែននេះម្ដងមកហើយ នៅពេលដែលក្រុមហ៊ុនចិន បង្ហូរកាកសំណល់តាមអូរព្រាលចូលមកស្ទឹងសែន៖ « កាលពីឆ្នាំណានោះ ពេលមានភ្លៀង គឺចិន បើកបង្ហូរកាកសំណល់មកចូលស្ទឹង គឺមានងាប់ត្រីដូចជាពេលនេះដែរ »។
លោក វង្ស សុខេងលី មិនជឿថា ប្រជាពលរដ្ឋមានថ្នាំពុលទៅដាក់ក្នុងទឹក ធ្វើឲ្យងាប់ត្រីរាប់ម៉ឺនក្បាលរហូតដល់ទៅចម្ងាយដីជាង ២០គីឡូម៉ែត្រ នៅតាមដងស្ទឹងដូច្នេះទេ។
អាស៊ីសេរី មិនអាចស្វែងរកការទាក់ទងអ្នកគ្រប់គ្រងរបស់ក្រុមហ៊ុនចិន រួយ ហ្វេង ដើម្បីសុំប្រតិកម្មជុំវិញការសង្ស័យពីអ្នកភូមិនោះបានថាយ៉ាងណានៅឡើយ នៅថ្ងៃទី២៧ ខែមីនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។